1 Paw lai bo rhawm ka pui pa ang rahsee mai paw si mie ti yuh pao pie mai kix. 2 Ka daux rhawm kix, chix keud sonsang yuh pui laux, jheeh kix kawx, chix ah lox caox heue. 3 Nyiex pa sum mai pingnya chix kaux cong heue. 4 Kheu pingnya pa tawng yung, chix kieh kraung khrai pa ngawh mai kraung pa khaw rhawm kuceu khawmuik, naog ka daux lawg heue. 5 Pui pa koe pingnya khankix, koe sibrawm mai pui pa grum tawng ka pingnya, chix ting lhaong riang rao nawh heue. 6 Khaix hoik kum kawng tau mai pui pa koe pingnya, caw ti hu yuh naing, phan pui tawx krax keud koe tom nie, chix luan khaing krax khi rhawm heue. 7 Mawh kheu kied lhaong pingnya, pui caox khankix ang krup ang hoek, kix ang pon ang jheeh ka diang siviex veng. 8 Pui pa keud ti yuh pa ang mhawm khankix, tak kok kix mawh pui pa caox heue. 9 Krax pa keud pui caox khankix, mawh phimap mai pui pa yuh pa ang cee ang cag khankix mawh ceu pa seeing brai pui kah heue. 10 Phan maix laux rhawm, singaix yam yaox maix see, riang rao maix iak hu heue. 11 Taoh ka pui pa sang teei yum ka daux simeeig mai teei lih ka pui pa sang dex pah yum. 12 Viang maix ah ex ang tawng ka kix kawx, cao pa sawg ti yaox ka daux rhawm keud kawn pui khex ang tawng lie? Nawh tak sang deeh viied bwanson phimap pa yuh kaux pui mawx kaux pui an ang mawh lie? 13 Kawn simex aux eue, ih rawm hia, kheu mhawm mai ih ka rawm kaing hia pa nyawm pa tie awx. 14 Awm an, pingnya pa tawng yung maix kieh grum naog jhawm pa nyawm ka ju khwan maix, son ang laux krax pa krox jun mai maix tak pon bwanson pa mhawm heue. 15 Pui pa ang rahsee eue, paw lai jawm ti jhak ka nyiex pui rahsee mai paw lai yuh laux ka dee ot kix. 16 Pui rahsee khankix, viang goh aliah bawg kawx, tak deeh kaoh, phan mawh pui pa ang rahsee, yam goh nawh tak som heue. 17 Yam goh pui pa koeng ka maix, paw lai gaux rhawm kah, yam sideeing nawh caong tix kawx, paw koe pa gaux rhawm gaux rhi. 18 Phan koe, Siyiex tawng mai Nawh ang khaw rhawm mai krax pa song rhawm Siyiex gah hu khaing nawh heue. 19 Maix paw khi rhawm, kheu pa ang rahsee, paw lai boh rhawm ka pui pa caox. 20 Grawh grawng nawh, pui pa ang rahsee khankix, dee sidah ang pon bwanson mai kawk ngu pui pa yuh pa caox tak yeet heue. 21 Kawn simex aux eue, lhat graung ka Siyiex mai simiang awx. Paw yuh paox pie tau mai pui lukliak khankix heue. 22 Ceu pa khi rhawm chix hoek pa piang kiex dom mawx dom an, mawh pui mawx pa tawng ka ceu pa kieh kiex laux? 23 Lheu khaing an, ceu pa dex mai pui pa koe pingnya mawh nin, yam prawng see, ang khaw tix jhak plakngai pui. 24 Pui pa ah ka pui pa ang rahsee an yuh nin, maix mawh pui rahsee heue. Pa ah nan, ceu pui khankix tak jhax lawg mai salao ka nawh mai ceu pui kuceu tak seeing brai ka nawh heue. 25 Pui pa sidiex gau ka pui pa deuh phimap ka tix, pon pa nyawm rhawm mai tak pon bwanson pa mhawm piang kix heue. 26 Pui ku kaux, nghiet ka jheeh pui pa chix krai lox pa khaw caw heue. 27 Khre kaing maix plak praix mai khre ma kaung son maix, khaix an maix tak sum nyiex ot maix. 28 Phan ang koe krax grawng, paw kham sakse ka paox plawg tix, paw kieh jheeh maix pie lhen ti ih ka pui tang kaux. 29 Aux tak yuh ka nawh, awm pa yuh nawh ka aux, paw lai ah tix deeh viied ka nawh, awm pa hoik yuh nawh. 30 Yam hu lailing aux, ka praok kaung pui pa nieh mai sipeem plix siiet pui pa ang koe pingnya. 31 Aux yaox ka pa hoik kheem pang kat khawm gwang mai yaox ka hoik grhup guh simaox pa hoik vie heue. 32 Aux yaox mai keud tix yaox mhawm mhawm mai aux pon ceu pa hawt gau ti yuh heue. 33 Ah it tivud ha mai it, yam bhok maix taix sonsang laig it tivud. 34 krax pa hot sibhawm tak sang hoek piang maix, awm pui pa hu krax mai kraung khrai maix tak sang som nai awm hoek pui naing piang maix heue.Ref 24:33-34 Kab 6:10-11.