1 Yam ngawm maix ti sawm tau mai simiang, keud ceu pa koe sivoe ngai maix mhawm mhawm awx. 2 Phan maix cha nie luan ih, hoik teei gawn mai nyeu ka ghok maix heue. 3 Paw lai simie tix ih ka priex ih simiang, grawh grawng nawh, ceu pa ih an, chix pie lhen ka maix heue. 4 Paw lai coca ka sonsang pon mau khri, paw deuh rhawm ka pingnya tokaux tix. 5 Khex caw tix sawg ka ceu pa chix grai pa koe sivoe ngai maix khankix lie? Phan ah tete, ceu an khankix, chix yuh pruik tix po hu, awm pa po klang preng piang raoma heue. 6 Paw lai ih priex pa yuh pui pa koeng riang ciang khoi mai paw lai simie ka pa ih kix. 7 Nawh yuh awm pa keud rhawm nawh, viang nawh ah ih nyaux ka maix kawx, nawh ang koe rhawm pa simie ti tawx ka maix. 8 Maix tak sang deeh hao pa ih tix mai lox mhawm pa krai maix kawx, tak grai hu heue. 9 Paw lai sikah tom mhong pui caox, lox pa sikah maix ka pingnya khankix, ha nawh kox yuh pa ang cee ang cak ka heue. 10 Paw lai greed ka mee hak tiex pa sum tom dix, paw lai tud rhim ti teei kraung kawn doe khankix. 11 Grawh grawng nawh, cao pa laug ti teei ka kix, mawh pa ting sibrawm mai priex kix heue. 12 Priex lox pa sidiex gau ka daux rhawm maix jheung jheung mai nghiet ka lox pingnya pa tawng yung awx. 13 Paw lai yuh tix ang sidiex gau ka kawn nyawm, viang teei khaox saux sivied nawh kawx, nawh ang yum. 14 Teei khaox saux sivied nawh mai taoh ju khwan nawh khaing meung yum heue. 15 Kawn simex aux eue, phan rhawm maix koe pingnya, rhawm aux mai tokaux aux tak gaux rhawm heue. 16 Yam krai jheeh maix lox pa mawh meh, sok lax aux tak jih jhang hang haih heue. 17 Paw lai boh rhawm ka pui pa koe phimap, kieh koe rhawm pa lhat graung ka Siyiex leeing singaix. 18 Bawg yam prawng ca tak sang hoek tete, krax krox jun maix ang laux heue. 19 Kawn simex aux eue, nghiet lox aux mai kieh mawh pui pa koe pingnya mai kieh rhawm maix hawt hu ka daux krax an heue. 20 Paw lai yuh paox pie ka pui pa cha nie luan nyaux rawm plix siiet mai pui pa cha nie luan ih nex heue. 21 Pui pa cha nie luan ih luan nyaux rawm plix siiet khankix, tak hoek krax pa hot sibhawm mai rhawm pa cha nie luan it, chix ceep kraung pa caox pa blai ka praix heue. 22 Nghiet ka lox keeing maix pa kieh maix koe awx. Paw yuh pa ang cee cag ka miex maix pa hoik riex ju. 23 Liag ti teei ka pa rahsee (pa mawh meh) mai paw lai coh, pingnya ang ah, lox pa sidiex gau pingnya pa tawng pa yung ang ah, liag ti cie heue. 24 Keeing pui rahsee, mawh pa kied si daing gaux rhawm mai pui pa keh kawn pa koe pingnya, gaux rhawm gaux rhi mai kawn an heue. 25 Kieh miex keeing maix gaux rhawm mai kieh miex cao keh maix kawx, tak gaux rhawm heue. 26 Kawn simex aux eue, tawx rhawm maix ka aux, kieh ngai maix jhak ti priex ka krax hu aux liak. 27 Bun coh kaux awm daux pong pa kied raux mai bun pa ang mhawm been, awm daux tiex pa sikhawp sikhiep heue. 28 Nawh chix jawm ti jhak, awm pui con mai nawh chix yuh simex tom nie lud heue. 29 Pui mawx pa koe krax khi rhawm mai pui mawx pa koe krax kha rhawm, pui mawx pa yaox krax simah, pui mawx pa yaox krax yiiem krax doe, pui mawx pa ang koe krax koe grawng mai mat lheet tix mai pui mawx pa koe pa raoh ngai. 30 Mawh kix pui pa rheung nyaux rawm plix siiet mai pui pa chix sawg rawm plix siiet, pa hoik pawng mai sidah khankix heue. 31 Paw lai jhak ka rawm plix siiet pa raoh, pa toh riang ka daux kawk pa nyawm pa tie ti ih. 32 Dee sidah chix kiied awm siuing mai chix tut saux awm siuing pa cai heue. 33 Ngai maix tak jhak ka bun pa ang mhawm been mai rhawm maix kawx, tak chix krai lox pa kawk vawk heue. 34 Maix awm pui pa it, ka daux sigreung rawm pang lai mai tak awm pui pa it piang toh rong nyiex reu ting heue. 35 Kix hoik tap toi aux, viang mawh nan, aux ang saux, kix hoik tawk hoik klah aux mai aux ang tawng, aux tak siduad lai mawx? Aux deeh sawg ka ceu an tix bawg maix tak ah nan heue.