8
Tok Kawk Ngu
1 Simiang Siyiex krai ah nin ka Mose,
2 “Krai ah nin ka Arun, yam tok maix kawk ngu, kawk ngu aliah mu tak kieh jhan riang ka piang pang jawk ten khri khawm ra plak.”
3 Arun yuh awm an, nawh tok kawk ngu sonsang jhan riang ka piang pang jawk ten khri khawm ra plak, awm gumlox pa hoik tawm Simiang Siyiex ka Mose.
4 Grawng pa yuh ka jawk ten khri in, hoik yuh awm pakpeung pa krai Simiang Siyiex ka Mose, pang nawh kho tai nawh khankix hoik mawh pa tawk ti yuh ka khri khawm kreng, tom lih ti mawh jawk ten khri heue.Ref 8:1-4 Lih 25:31-40; 37:17-24.
Pa Yuh Pui Lewix Singax Appong
5 Simiang Siyiex krai ah nin ka Mose,
6 “Teei ceu pui Lewix khankix lih khaing daux sinax pui Isarelax mai kieh kix singax.
7 Sonsang singax kix maix tak yuh in khankix, teei ka rawm singax mai phruah ka piang kix mai kieh kix khlao hauk pa koe ka piang tokaux ti khawmuik mai kieh kix sidaux kraung ceep tix sonsang yuh kix tokaux ti singax.
8 Kieh kix teei mawie mhaing awn ju tix mu mai krax tan phawng nghox ca im pa mhawm pa hoik klao ti mai bee mai baox teei mawie mhaing awn ju tix mu son krax tan pa pluat ploi phimap.
9 Maix tak viex ceu pui Lewix khankix hoek sivoe nyiex gox bwan man bang kum mai kieh ceu pui Isarelax khawmuik khrawm paox tix.
10 Maix tak viex ceu pui Lewix khankix hoek sivoe ngai Simiang Siyiex mai ceu pui Isarelax tak deuh taix ti ka piang ceu pui Lewix khankix,
11 Arun tak appong ceu pui Lewix ka plak sivoe ngai Simiang Siyiex, son krax tan yang yeuh, tang ceu pui Isarelax khankix, sonsang pon yuh kix kaing jhaw Simiang Siyiex.
12 Ceu pui Lewix khankix tak deuh taix ti ka piang kaing mawie mhaing awn ju an khankix mai maix tak tan tix mu son krax tan pa pluat ploi phimap mai tan an tix mu son krax tan pa gleeing ka Simiang Siyiex, sonsang yuh pa khyox khaw mai pa pluat ploi son ceu pui Lewix khankix.
13 Maix tak viex ti deuh ceu pui Lewix sivoe Arun mai kawn simex nawh khankix mai appong ti tawx kix son krax tan pa yang yeuh ka Simiang Siyiex.
14 “Maix tak tang gwieh ti deuh ceu pui Lewix khaing daux sinax ceu pui Isarelax mai ceu pui Lewix tak mawh pui Aux heue.
15 Khaix an ceu pui Lewix tak hu laig yuh kaing ka daux nyiex gox bwan man bang kum maix tak kieh kix singax mai appong kix son krax tan pa yang yeuh.
16 Kix mawh pa hoik laug tix tawx Aux khawmuik khaing daux sinax ceu pui Isarelax, Aux hoik teei ti cie pa liang tix keh khaing sinax ceu pui Isarelax khankix.Ref 8:16 Lih 32:26-29.
17 Grawh grawng nawh kawn Ai pa keh khaing daux sinax ceu pui Isarelax khankix, pui khawm totiag mawh cie Aux, ka daux singaix khaix hoik ciyang Aux kawn Ai pa keh ka daux haktiex Ejiptux khankix, Aux hoik kieh kix mawh pa singax singeh son Cao tix.Ref 8:17 Lih 13:2.
18 Aux hoik teei ceu pui Lewix, son tang kawn Ai pa keh khaing ceu pui Isarelax khankix.
19 Aux hoik tawx ceu pui Lewix khankix awm totaix tix ceu son Arun mai kawn simex nawh khankix khaing daux sinax ceu pui Isarelax, sonsang yuh kix kaing son ceu pui Isarelax ka daux nyiex gox bwan man bang kum mai sonsang yuh kix krax pa khyox khaw mai krax pa pluat ploi son ceu pui Isarelax khankix, son ang krax pa laux leeing lai koe daux sinax ceu pui Isarelax, yam hoek ceu pui Isarelax khankix dex dah dee pa singax heue.”
20 Mose mai Arun mai cub pui hun ceu pui Isarelax appong ka ceu pui Lewix, awm gumlox pa hoik tawm Simiang Siyiex ka Mose son grawng pa dex mai ceu pui Lewix khankix, mawh kheu nan ceu pui Isarelax yuh an ka ceu pui Lewix.
21 Ceu pui Lewix yuh tokaux tix singax mai sidaux kraung ceep tix, mai Arun appong kix, awm krax tan pa yang yeuh sivoe Simiang Siyiex, Arun tak yuh krax khyox khaw mai krax pa pluat ploi son kix, sonsang kieh kix singax heue.
22 Khaix an ceu pui Lewix laig ka daux nyiex gox bwan man bang kum, ka plak sivoe Arun mai kawn simex nawh khankix, sonsang yuh kix kaing jhaw awm lox pa hoik tawm Simiang Siyiex ka Mose son grawng pa dex mai ceu pui Lewix, mawh kheu nan kix yuh an ka piang kix heue.
23 Simiang Siyiex krai ah nin ka Mose,
24 “In mawh grawng pa dex mai ceu pui Lewix khankix, pui pa hoik koe ju tixnga phwan num haok plak piang tak yaox ti laig yuh kaing jhaw ka daux nyiex gox bwan man bang kum,
25 yam hoik hoek ju kix tix phwan num, kix tak laux tix khaing kaing pa yuh tix mai kix tak ang lai baox yuh kaing tix bawg kawx,
26 kix tak yaox ti yuh kaing jhaw pa teem ka puxaik tix ka daux nyiex gox bwan man bang kum, viang mawh nan kix tak ang pon ti teei beeh glawm tix ceu kawx maix tak yuh nawh ka ceu pui Lewix awm grawng beeh glawm pa dex dawd mai kix heue.”