9
Grawng Pawie Pasakha Bawg Ra
1 Simiang Siyiex sikah mai Mose ka daux tiag Sina, ka daux num ra khix tix khaix hoik lih kix khaing meung Ejiptux ah nin,
2 “Kieh ceu pui Isarelax khankix yuh pawie Pasakha ka daux bawg yam pa hoik tat ti deuh.
3 Daux khix in kao pon ngaix plak bo maix tak yuh pawie an, ka daux bawg yam pa hoik tat ti deuh, awm pa koe been mai pa hoik tat ti deuh khankix pex tak yuh nawh.
4 Mose krai ka ceu pui Isarelax khankix, sonsang yuh kix pawie Pasakha.
5 Kix yuh pawie Pasakha ka daux khix tix kao pon ngaix, ponbo, ka daux tiag Sina, awm lox pa hoik tawm Simiang Siyiex ka Mose, mawh kheu nan ceu pui Isarelax khankix yuh pawie an.Ref 9:1-5 Lih 12:1-13.
6 Yam an koe pui tiblah, pa hoik seeing yuh tokaux ti ka pa yum pui son ang tix lai pon yuh pawie Pasakha ka daux singaix an, mai kix hoek ka plak sivoe ngai Mose mai Arun daux singaix an,
7 kix ah nin ka nawh, “Yix hoik seeing yuh tokaux tix ka pa yum, mawh sang pon kieh maix yix viex krax tan tix ka Simiang Siyiex ka daux bawg yam pa hoik tat ti deuh daux sinax ceu pui Isarelax khankix lie?
8 Mose ah nin ka kix, “Jun ha, Aux sang krox tix nghiet Simiang Siyiex sang ah yuh ka mawx ka grawng pa dex mai pex.”
9 Simiang Siyiex krai ah nin ka Mose,
10 “Krai ka ceu pui Isarelax khankix, ka daux pex mai doeh ru pex tix kaux kaux seeing yuh tokaux tix ka pa yum, phan ang mawh nan hu krax deeh singai ang ah, nawh tak pon ti yuh pawie Pasakha cie Simiang Siyiex.
11 Ka daux khix ra kao pon ngaix plak bo, kix tak pon ti yuh pawie, kix tak ih nex kawn yung tau mai blah pa ang sau susaix mai taux lhax pa song.
12 Kix tak ang pon ti kieh nex an deuk tom hoek plak ponngawb mai ang pon ti kieh si-ang pot tix nyaing kawx, Ref 9:12 Lih 12:46; Yaog 34:20; Yo 19:36. kix hawt ti yuh awm koe been pawie Pasakha.
13 Phan mawh pui pa singax mai pa ang koe krax hu, phan nawh ang yuh pawie Pasakha, tak teei ti tik kaw an khaing daux sinax pui ceu nawh, kheu ang nawh viex krax tan tix hoek ka Simiang Siyiex, ka daux bawg yam pa hoik tat ti deuh, nawh tak yaox ti kham geu phimap.
14 Nyo sinie pa hoek ti peung sinax pex tivud ticu, phan nawh simie ti yuh pawie Pasakha cie Simiang Siyiex, nawh tak hawt ti yuh awm pa koe been pawie Pasakha mai yuh awm pa hoik tat kix ti deuh, ka son kawn praix pa keh daux haktiex pex ka son nyo sinie ang ah tak koe been tix ceu khaing heue.
Grawng Paiawm Ngu Pa riang
(Lih 40:34-38)
15 Ka daux singaix yam jung ka nyiex gox bwan man, paiawm hoik kheem ka piang nyiex gox bwan man pa koe teug pa kham mhai ruk, jah ponbo tom hoek ponngawb, an hoik awm grang ngu.
16 Ponngaix paiawm kheem ka nyiex gox bwan jheung jheung, ponsawm jhan riang awm grang ngu.
17 Yam hoik yaog paiawm tix haok khaing ka piang nyiex gox bwan man, ceu pui Isarelax khankix yaox ti hu krax mai yam jung paiawm tix ot dee mawx ang ah, ceu pui Isarelax khankix tak sum nyiex bang tix tan.
18 Awm lox pa tawm Simiang Siyiex, ceu pui Isarelax khankix tak lih hu krax mai awm lox pa tawm Simiang Siyiex, kix tak sum nyiex bang tix mai glang kawn ot paiawm ka piang nyiex gox bwan man, kix ca kawn ot daux nyiex bang.
19 Glang kawn ot paiawm ka piang nyiex gox bwan man tom rheung singaix, ceu pui Isarelax khankix yuh awm pa tawm Simiang Siyiex mai ang lai hu krax.
20 Bawg blah yam kawn kheem paiawm ka piang nyiex bang tivud ticu, awm lox tawm Simiang Siyiex kix ca kawn ot ka daux nyiex bang, mai awm lox tawm Simiang Siyiex kix tak lih hu krax.
21 Bawg blah yam kawn kheem paiawm, jah ponbo tom hoek ponngawb mai yam deeh yaog paiawm tix haok ponngawb, kix tak hu krax, ponngaix ang ah, ponsawm ang ah, yam deeh yaog paiawm tix kix tak hu krax.
22 Ra singaix, tix khix ang ah, tix num ang ah, yam kawn kheem paiawm ka piang nyiex gox bwan man, ceu pui Isarelax khankix, kix ot daux nyiex bang mai kix ang pon ti hu krax, viang mawh nan, yam hoik deeh yaog paiawm tix kix hu krax.
23 Awm lox pa tawm Simiang Siyiex, kix ca kawn ot ka daux nyiex bang mai awm lox pa tawm Simiang Siyiex kix hu krax, kix yuh awm pa tawm Simiang Siyiex, awm lox tawm Simiang Siyiex ka Mose heue.