6
Gumlox Been Son Nazarix
1 Simiang Siyiex krai ah nin ka Mose,
2 “Krai ah nin ka ceu pui Isarelax khankix, simex ang ah, bun ang ah, yam tiextu nawh tokaux ti yuh sijax mukheu ka gumlox been Nazarix mai sonsang tang gwieh nawh tokaux tix ka son Simiang Siyiex,
3 Nawh tak twah rawm plix siiet mai plai khiien, nawh tak ang pon ti nyaux plai rawm plix siiet pa niex pa hoik yuh ka plix siiet, nawh tak ang pon ti nyaux ka rawm plix siiet ang pon ti ih ka plix siiet pa im ang ah, pa kroh ang ah.
4 Glang yam tang tiah nawh tokaux tix, nawh tak ang pon ti ih khaing nhu plix siiet tix ceu kawx, pa mawh simie ang ah, glhaok ang ah.
5 “Glang yam kawn yuh nawh sijax mukheu mai tang tiah tokaux tix, nawh tak ang pon ti khlao hauk kaing tix tom hoek singaix grum naog, krax pa tang tiah tokaux ti son Simiang Siyiex, nawh tak caw ti singax singeh, khaix an nawh tak kieh hauk kaing tix kwah tom lang.
6 “Glang yam kawn tang tiah nawh tokaux cao tix son Simiang Siyiex, nawh tak ang pon ti hu dex tokaux pa yum.
7 Nawh tak ang pon yuh tokaux tix seeing yam yum keeing nawh ang ah, miex nawh ang ah mai pux aik pux o nawh ang ah, mawh kheu hoik tang tiah nawh ti ot son Siyiex, koe ka piang kaing nawh.
8 Glang yam kawn tang tiah nawh tokaux ti son Simiang Siyiex, nawh tak caw tix singax singeh.
9 “Phan pui tix kaux kaux yum sijaox hawt dex nawh mai nawh kieh kaing pa appong ti singax seeing brai, nawh tak khlao hauk kaing tix, ka daux singaix pa sang deeh kieh nawh tokaux tix singax ka daux singaix aliah.
10 Ka daux daix singaix nawh tak viex sikaux ra mu, phan ang mawh nan kawn keukie ra mu ang ah, cao giex kaing li hawt diang siviex nyiex gox bwan man bang kum,
11 mai cao giex kaing li tak tan son krax tan pa pluat ploi phimap tix mu mai tang mu tan son krax tan pa gleeing mai yuh krax pa khyox khaw, son krax pa pluat ploi son nawh, kheu hoik lud nawh, ka Grawng tokaux pa yum. Nawh tak kieh kaing tix singax tau ka daux singaix an.
12 Nawh tak viex kawn yung pa naog num son krax tan pa pluat ploi son krax lud mai appong tokaux tix son Simiang Siyiex ka bawg yam pa hoik tang tiah nawh tokaux tix singaix pa hoik luan khankix, tak mawh pa grai pa grup, mawh kheu pa hoik tang tiah nawh tokaux ti hoik mawh pa seeing.
13 “In mawh gumlox been son Nazarix yam hoik grum naog singaix pa tang tiah nawh tokaux tix mai tak viex nawh hoek ka diang siviex nyiex gox bwan man bang kum.
14 Nawh tak tan kawn yung mhaing pa naog num pa loig tix mu son krax tan pa gleeing ka Siyiex mai kawn yung shiang, pa naog num pa loig tix mu son krax tan pa pluat ploi phimap mai pex pa loig tix mu son krax tan pa nhim,
15 blah pa ang sau susaix tix khrawng, blah plah phawng nghox ca im ceu pa mhawm, pa hoik klao ti tau mai bee, blah rhi khlawp pa hoik klao tau mai bee mai krax tan phawng nghox ca im, khawm krax tan pa nyaux khankix.
16 Cao giex kaing li tak viex an khankix hoek sivoe ngai Simiang Siyiex mai yuh krax tan pa pluat ploi phimap mai krax tan pa gleeing,
17 Nawh tak tan pex mhaing son krax tan pa nhim ka Simiang Siyiex tau mai blah pa ang sau susaix tix khrawng, cao giex kaing li tak tan krax tan phawng nghox ca im mai krax tan pa nyaux.
18 Pui Nazarix tak khlao hauk kaing pa hoik appong ti hawt diang siviex nyiex gox bwan man bang kum mai kix teei hauk khankix khaing kaing pa appong ti mai sau ka piang ngu greem krax tan pa nhim pa tan tix.
19 Cao giex kaing li tak teei klip taix pex mhaing pa hoik ngaik tix tau mai blah pa ang sau susaix tix plah khaing daux khrawng mai blah rhi khlawp pa ang sau susaix tix khlawp mai deuh an ka piang taix pui Nazarix khaix hoik khlao nawh hauk kaing pa appong ti khankix,
20 cao giex kaing li yang yeuh an son krax tan pa yang yeuh sivoe Simiang Siyiex, nex eek krax tan pa yang yeuh mai nex ba krax tan pa yaox mawh pa singax singeh son cao giex kaing li, khaix an pui Nazarix pon ti nyaux rawm plix siiet heue.
21 “In mawh beenli son pui Nazarix pa yuh sijax mukheu son pa yuh nawh krax tan pa tang tiah tix ka Simiang Siyiex, lheu khaing an, can krax pa pon yuh nawh khankix, mawh krax pa yuh nawh sijax mukheu, nawh tak caw ti hawt yuh awm beenli pa hoik tang tiah nawh ti yuh sijax mukheu pa yuh tix heue.”
Bwanson Pa Nawb Cao Giex Kaing Li
22 Simiang Siyiex krai ah nin ka Mose,
23 “krai ah nin ka Arun mai kawn simex nawh khankix, in mawh grawng pa sang nawb maix bwan, ka ceu pui Isarelax maix tak ah nin ka kix,
24 kieh Simiang Siyiex nawb bwan ka maix mai priex rien ka maix,
25 kieh Simiang Siyiex jhan pa riang pakngai tix ka piang maix mai tawx bwanson krax pa caux rhawm tix ka maix,
26 kieh Simiang Siyiex maong ti jhak ka piang maix, mai tawx krax pa nhim ka maix.
27 Kix tak deuh min ceu kaux Aux, ka piang ceu pui Isarelax mai Aux tak nawb bwanson ka kix heue.”