5
Pui Ang Singax Ot Nong Nong
1 Simiang Siyiex krai ka Mose ah nin,
2 “Tawx lox ka ceu pui Isarelax khankix, sonsang kieh pui saux sipawg mai pui pa koe jhawm saux lih nham seeing ku kaux mai can pui pa seeing brai ka hu teeh tokaux pa yum khankix deuh ka plak praix dee bang kix.
3 Maix tak deuh simex mai bun khankix ot ka plak praix, khaing bang son ang kix pon kieh dee bang seeing brai ka dah dee ot Aux.
4 Ceu pui Isarelax yuh an khankix mai deuh kix ka plak praix nyiex bang kix, awm pa hoik tawm Simiang Siyiex ka Mose, mawh kheu nan ceu pui Isarelax khankix, hawt ti yuh awm an heue.
Khyox Khaw Pa Deeh Plud
5 Simiang Siyiex ah nin ka Mose,
6 “Krai ka ceu pui Isarelax khankix, yam lud simex ang ah, bun ang ah, awm pa yie lud kawn pui mai nawh lud ka Simiang Siyiex.
7 Nawh tak krai doh ka phimap pa hoik yuh tix mai nawh jhaw ti khyox khaw heue. Mai nawh deeh plud ka pui pa lud nawh kah mai baox naok ti tawx phwan son tix son ka piang an,
8 viang mawh nan phan pui pa lud nawh ka hoik yum mai ang lai koe pao nyiex sonsang rieb ti krax pa pluat son pa lud nawh mai nawh tak hu ka cao giex kaing li Simiang Siyiex mai tan kawn yung mhaing tix mu sonsang pluat ploi phimap pa yuh nawh.Ref 5:5-8 Krub 6:1-7.
9 Krax tan kuceu pa singax ceu pui Isarelax khawmuik, pa viex kix hoek ka cao giex kaing li tak mawh cie kix.
10 Can ceu pa singax pa tan pui ku kaux ka cao giex kaing li tak mawx cie cao giex kaing li khankix heue,
Been Pa Dex Mex Moeng
11 Simiang Siyiex krai ah nin ka Mose,
12 “Krai ka ceu pui Isarelax khankix ah nin ka kix, phan moeng ti kaux kaux sawg ti hu vung viang mai yuh krax pa ang kaux sijax ka mex nawh,
13 Phan simex tix kaux, it tau mai nawh phan mex nawh ang tawng mai mawh pa mox tix mai laux min pakngai, ka grawng pa ang singax ka tokaux ti mai pa ang koe mhai ruk mai viang pui ang yaox dee lud kiex kawx,
14 Phan laux pakngai ang ah, ang laux ang ah, phan nawh ang yum rhawm ka moeng ti,
15 nawh tak viex moeng ti hoek ka cao giex kaing li mai nawh tak viex krax tan phawng nghox ca im, tix epha kao son tix son ka pa tan son nawh. Nawh tak ang pon ti see bee ka piang an mai ang pon ti see bee Lawpan pa sioe bhawng ka piang an, kheu mawh an krax tan pa ang yum rhawm ka moeng tix mai sonsang doh keut ka phimap pa yuh tix.
16 “Cao giex kaing li tak viex nawh hoek dee dex mai deuh nawh ka plak sivoe Simiang Siyiex,
17 Cao giex kaing li tak teei rawm pa singax mai sau daux aw tiex mai teei phawng tiex, pa koe ka piang tiex daux nyiex gox bwan man mai sau ankix ka daux rawm.
18 Cao giex kaing li tak deuh bun an ka plak sivoe ngai Simiang Siyiex mai plak ti tik pa kheem ka piang kaing bun mai sau krax tan son pa doh keud, ka daux taix nawh, pa mawh krax tan phawng nghox ca im, pa viex krax pa ang yum rhawm mai cao giex kaing li tak giex ti deuh kawk rawm song pa viex krax pa jhax lawg ka daux tawm taix tix.
19 Cao giex kaing li tak kieh nawh tiextu mai nawh ah nin ka bun an, phan simex tang kaux, ang it tau mai maix mai phan maix ang lud mai simex tang kaux mai ang seeing brai, kieh maix lawt luan khaing rawm song in pa viex krax pa jhax lawg.
20 Viang mawh nan phan maix hoik lud ka simex tang kaux ka piang mex tix mai hoik kieh tokaux tix seeing brai mai phan simex tang kaux pa ang mawh mex maix hoik it tau mai maix,
21 Cao giex kaing li tak kieh bun an tiextu tix ka gumlox pa jhax lawg mai nawh tak ah nin ka bun an. Simiang Siyiex tak sang tawx krax pa jhax lawg mai krax pa tiextu, ka piang maix, khaing daux sinax ceu pui maix, Simiang Siyiex tak kieh ba maix fit hu mai kieh vaig maix uah.
22 Rawm pa hoik jhax lawg, tak sang laig daux vaig maix mai kieh vaig maix uah mai kieh khawn ba maix fit hu mai bun an tak sang ah, Amen, Amen.
23 “Cao giex kaing li tak tiem ti deuh gumlox pa tiextu ka daux phuk lai mai nawh tuk taik ti sau an ka daux rawm pa song.
24 Nawh tak tawx bun an nyaux rawm pa song, pa viex krax pa jhax lawg an mai rawm song pa viex krax pa jhax lawg, tak laig daux nawh, sonsang lih ti mawh pa song.
25 Cao giex kaing li tak teei krax tan phawng nghox ca im pa ang yum rhawm ka moeng tix mai yuh krax tan yang yeuh ka sivoe Simiang Siyiex mai viex nawh hoek ka khu dee tan,
26 cao giex kaing li tak teei krax tan an tix jhawp ka taix tix, son pa doh keud mai gleeing an ka piang khu dee tan, khaix an nawh tak tawx bun nyaux rawm an heue.
27 Khaix hoik tawx nawh bun an nyaux rawm, ceu an lih ti mawh, phan nawh hoik yuh pa seeing ka tokaux tix mai hoik yuh pa lud piang mex tix, rawm an pa viex krax pa jhax lawg tak laig ka daux nawh mai lih ti mawh pa song mai vaig nawh tak uah mai ba nawh tak fit hu mai bun an tak lih ti mawh pa pon krax jhax lawg, khaing sinax ceu pui nawh khankix heue.
28 Viang mawh nan phan bun ang nyang yuh pa seeing ka tokaux tix mai phan nawh mawh pa singax, khaix an nawh tak lawd luan mai nawh tak deeh koe kaux.
29 “In mawh gumlox beenli pa ang yum rhawm ka moeng tix, pa lud ka simex tang kaux piang mex tix mai koe pa seeing brai,
30 yam ang simex koe krax yum rhawm ka piang moeng tix, khaix an nawh tak deuh ka plak sivoe ngai Simiang Siyiex mai cao giex kaing li tak prawng ca nawh awm gumlox beenli in,
31 simex tak lawd luan khaing phimap, bun tak yaox ti kham geu ka phimap tix heue.