1 Simiang Siyiex sikah ka Mose ka daux lung Mawbax, hawt rawm klawng Yawdan, ka plak toi veng Yerikho ah nin. 2 “Tawx lox maix ka pui Isarelax khankix mai kieh kix tawx veng ka ceu pui Lewix, sonsang ot kix ka daux, khaing haktiex sinngao cie tix mai tawx haktiex pa koe hawt vung viang veng an ka ceu pui Lewix khankix. 3 Veng an khankix mawh sonsang ot kix ka daux mai haktiex pa koe hawt vung viang veng, tak mawh haktiex dee eei kix mawie, yung, to brie khankix mai son dee deuh kix kraung khawmuik. 4 Haktiex hawt vung viang pa sang tawx pex ka ceu pui Lewix, tak kieh vieh khaing ka plak praix, hawt vung viang guh veng tix rheng sawk. 5 Tiag plak praix veng, ka praok plak lih singaix ra rheng sawk, ka plak seh ra rheng sawk, ka plak klip singaix ra rheng sawk mai ka plak laong ra rheng sawk, veng tak mawh pa koe ka daux sigreung. In tak mawh haktiex son veng cie kix. 6 Khaing ka daux sinax veng pa sang tawx pex ka ceu pui Lewix khankix, tak tat ti deuh veng liah veng son dee peung pan pui pa loe ti pah pui tix klawd ka. Lheu khaing veng inkix, tak baox tawx veng tixpon ra veng ka kix. 7 Veng pa sang tawx maix ka ceu pui Lewix khankix, tak mawh tixpon daix veng. Maix tak tawx in khankix tau mai haktiex hawt vung viang khawmuik ka kix. 8 Veng pa sang tawx maix khankix, tak mawh khaing daux cie pui Isarelax khankix, khaing daux doeh ru pa nie lheu pon maix tak teei ti tawx tom nie mai khaing daux doeh ru pa iak pon maix tak teei ti tawx iak, ku cub tak tawx veng cie tix, tiblah ka ceu pui Lewix, khaing daux sinngao pa pon kix ku cub heue.Ref 35:1-8 Yaw 21:1-42.

9 Simiang Siyiex ah nin ka Mose, 10 “Krai ka pui Isarelax khankix, yam tiang pex rawm klawng Yawdan mai hoek ka daux haktiex Khanan, 11 Khaix an pex tak tat ti deuh veng khankix son tix, sonsang mawh veng pa to pui pa lud loeRef 35:9-28 Yaw 20:1-9. tix pah pui mai hoek peung tix klawd ka. 12 Veng an khankix tak mawh veng pa sang hoek pui pa lud loe ti pah pui tix peung, son ang pui pa pah pui an sang pon ti yum ka cao pa pawk bix, tom hoek bawg yam cung nawh ka plak sivoe cub caw pui hun khankix, ka daux pa prawng ka. 13 Veng pa sang tawx pex khankix, son pui pa hoek to ti peung koe liah veng. 14 Pex tak laug veng loe veng ka plak lih singaix rawm Yawdan mai loe veng ka daux haktiex Khanan, pa sang peung kix kah. 15 Veng inkix liah veng, tak mawh dee peung pui lud tix pah pui, son pui Isarelax, son nyo sinie mai son pui pa hoek ot tivud ticu daux sinax pex, sonsang pon kix tix klawd kah. 16 “Phan nawh tawk nawh tom yum ka rhiem, nawh mawh pa pah ka pui. Cao pah an tak hoek krax yum. 17 Phan nawh tawk nawh tom yum ka simaox pa koe daux taix tix, nawh mawh pa pah ka pui. Cao pa pah an tak hoek krax yum. 18 Phan nawh tawk nawh tom yum ka khaox giex tix, nawh mawh pa pah ka pui. Cao pa pah an tak hoek krax yum. 19 Cao pa pawk bix son nham tokaux pui yum an, phan yaox ka cao pa pah pui an yam mawx ang ah tak pon ti deeh pah ka nawh. 20 Phan nawh nyhot nawh ka daux pa koeng tix ang ah, yam jawm tix khwang nawh tom yum ka tix ceuceu ang ah, 21 phan tawk nawh tom yum ka taix tix, ka daux pa koe rhawm koeng tix ka nawh, nawh mawh pa pah pui yum. Cao pa pawk bix son nham tokaux pui yum an, phan yaox ka cao pa pah pui an yam mawx ang ah, tak pon ti deeh pah ka nawh. 22 “Phan ang mawh nan, phan nawh nyhot mai ang tix koe rhawm koeng mai khwang nawh ka tix ceuceu daux pa ang tix jawm ang ah, 23 mai phan nawh khwang ka simaox yum yuh pui tix kaux, ka daux pa ang nawh yaox ka pui an mai ang mawh pui koeng nawh ka mai ang su ti yuh ka nawh ang ah, 24 cub pui hun tak prawng sinax cao pah pui mai cao pa pawk bix nham tix, awm pa koe lox lai beenli. 25 Cub pui hun tak ploi ka cao pa pah pui an, khaing daux tawm taix cao pa pawk bix nham tix, tak deeh tawx nawh hu ka veng dee peung pui to tix klawd ka. Nawh tak ot tan, tom sidah yum cao giex kaing li pa ting, pa hoik groi kix rawm bee pa singax singeh ka piang. 26 Phan cao pa pah pui an lih plak praix ka mee veng khaing pa hoik tat kix ti deuh, sonsang pon nawh ti klawd kah, 27 cao pa pawk bix nham, phan yaox nawh ka plak praix mee veng pa hoik tat kix ti deuh son pui to ti klawd mai pah nawh yum, cao pa pah tak ang koe phimap. 28 Grawh grawng nawh, nawh tak caw ti ot ka daux veng pa peung pui to tix klawd, tom sidah yum cao giex kaing li an, khaix hoik yum cao giex kaing li pa ting cao pa pah pui an tak deeh pon ti ing ka haktiex cao tix. 29 “In mawh gumlox beenli mai lox tat jhawm prawng, son doeh ru pex khankix mai ka can dee ot pex khankix, 30 Can pui pa pah ka pui, pa mawh cao pa hoik pah pui tak pah nawh yum ka daux pa koe mhai ruk, viang mawh nan phan mhai ruk koe tix kaux khaing tak ang pon ti pah nawh yum.Ref 35:30 Pi 17:6; 19:15. 31 Lheu khaing an pex tak ang pon ti teei mau deeh taoh ka nawh, tix ceu kawx son ju cao pa pah pui pa koe phimap krax yum, mawh kheu nawh tak yaox ti yum tete. 32 Pex tak ang pon teei mau pa deeh taoh ka pui pa hoik pon to ti klawd ka daux veng peung pui to, sonsang deeh ing ot ka daux haktiex cao tix, sivoe ang cao giex kaing li pa ting nyang yum. 33 Pex tak ang pon ti kieh haktiex ot tix seeing brai. Mawh kheu nham mawh pa kieh haktiex seeing brai, lheu khaing nham nawh pa deeh jah son an ang koe tix ceu kawx pa pon kieh haktiex singax. 34 Mawh kheu nan paw kieh haktiex ot pex seeing brai ka daux sinax dee ot Aux. Mawh kheu Aux mawh Simiang Siyiex pa ot ka daux sinax pui Isarelax khankix heue.”