34
Grawng Tat Mee Haktiex Meung Khanan
1 Simiang Siyiex ah nin ka Mose,
2 “Tawx lox maix ka pui Isarelax khankix ah nin, yam hoik hoek pex ka daux haktiex Khanan, in mawh haktiex sinngao pa sang pon pex, pa mawh mee haktiex Khanan.
3 Daog haktiex plak seh, jah khaing daux tiag Zin dex hawt mee haktiex Edom, mee haktiex plak seh jah khaing taoh rawm sigrit sigra kih ka plak lih singaix,
4 mai deeh gah tix bleeh ka praok plak seh ton gawng Akarabim mai deeh sitoe ti hu ka plak yaong Zin mai bleeh ka plak seh yaong Kadeshax Banax mai deeh sitoe ti hu ka yaong Hazaadax mai deeh bleeh ka yaong Azamon,
5 deeh veeh ti khaing yaong Azamon mai hawt ka kawn klawng Ejiptux, tom hoek sidah hawt rawm sigrit sigra.
6 “Son mee haktiex plak klip singaix, mawh rawm sigrit sigra ting in, tak mawh mee haktiex pex, ka plak klip singaix.
7 Mee haktiex plak laong, jah khaing rawm sigrit sigra ting, pex tak mhai ti deuh rhoi mee hawt ka gawng Hawrax,
8 jah khaing gawng Hawrax, pex tak mhai ti deuh rhoi mee hoek ka diang krax laig ka veng Hamat mai phlat hu ka plak yaong Zedax,
9 mai deeh sitoe ti hu ka plak yaong Zipharon, tom sidah hoek hawt yaong Hazaraenan. In tak mawh mee haktiex pex plak laong.
10 Pex tak mhai ti deuh mee haktiex plak lih singaix, jah khaing yaong Hazaraenan, tom hoek ka yaong Shephan.
11 Mee haktiex in tak lih khaing yaong Shephan mai hoek ka yaong Ribalax, pa koe plak lih singaix yaong A-inax, deeh hu plak jee mai hoek ka plak lih singaix ka rawm nhawng Ginesiet.
12 Mee haktiex in tak hu hawt praok klawng Yawdan mai sidah ka rawm sigrit sigra Kih. In tak mawh haktiex pex tau mai mee haktiex hawt vung viang khankix heue.”
13 Mose tawx lox ka pui Isarelax khankix ah nin, “In mawh haktiex sinngao pa sang pon pex ti cie ka daux krax pa yuh nieb, awm pa hoik tawm Simiang Siyiex ka doeh ru pex dim ceu mai tix plak.Ref 34:13 Si 26:52-56.
14 Mawh kheu doeh ru Rubin mai doeh ru Gat, awm krax pa koe doeh nyiex ma keeing kix, hoik pon rieb ti cie sinngao cie kix mai doeh ru Manashe tix plak, hoik pon ti cie ka sinngao cie kix.
15 Doeh ru an ra cub mai doeh ru an tix plak, hoik pon rieb ti cie sinngao kix ka praok plak in khaing rawm klawng Yawdan, toi veng Yerikho ka plak lih singaix heue.”Ref 34:13-15 Yaw 14:1-5.
Laug Cao Kaing Son Gwieh Haktiex
16 Simiang Siyiex ah nin ka Mose,
17 “In khankix mawh ceu kaux pui pa sang gwieh tix tawx haktiex sinngao ka daux sinax pex, an mawh cao giex kaing li Eliza mai Yawsux kawn simex Nun.
18 Maix tak laug cao kaing tix kaux khaing doeh ru kix ku cub, sonsang teem ka kiex.
19 In mawh ceu kaux pui khankix pa sang laug maix, khaing daux doeh ru Yudax, tak mawh Kaliep kawn simex Yephunie.
20 Khaing daux doeh ru Simion, mawh Shemoelax, kawn simex Amihut.
21 Khaing daux doeh ru Binyamin mawh Elidat, kawn simex Khisalon.
22 Cao kaing tix kaux khaing daux doeh ru Dan, mawh Bukhix kawn simex Yawgalix.
23 Khaing daux kawn simex Yosiep, cao kaing tix kaux khaing doeh ru Manashe, mawh Hanelax kawn simex Ephot.
24 Cao kaing tix kaux khaing daux doeh ru Epharem, mawh Kemoelax kawn simiex Shiphatan.
25 Cao kaing tix kaux khaing daux doeh ru Zebulon, mawh Elizaphan kawn simex Panat.
26 Cao kaing tix kaux khaing daux doeh ru Issakha, mawh Palatelax kawn simex Azan.
27 Cao kaing tix kaux khaing daux doeh ru Asha, mawh Arihut kawn simex Shelawmix.
28 Cao kaing tix kaux khaing daux doeh ru Napthalix, mawh Pedahelax kawn simex Amihut.”
29 Inkix mawh pui pa hoik tawm Simiang Siyiex lox sonsang gwieh kix tix tawx sinngao daux sinax pui Isarelax khankix, ka daux haktiex Khanan heue.