36
Bun Koe Mex Plud Sinngao
1 Cao kaing cao kap nyiex ma pui Gilat kawn simex Makhirax pa mawh kawn simex Manashe, khaing daux nyiex ma kawn simex Yosiep khankix, hoek ka plak sivoe Mose mai pa mawh cao kaing ru pui Isarelax,
2 Kix ah nin “Simiang Siyiex hoik tawm lox ka cao Simiang ex kieh yuh nieb mai gwieh haktiex sonsang tawx sinngao, son pui Isarelax khankix mai cao Simiang ex hoik pon lox pa tawm Simiang Siyiex, sonsang tawx sinngao puxaik yix, Zelophat ka kawn bun nawh khankix.Ref 36:2 Si 27:7.
3 Phan kix mawh pa mex ka kawn simex doeh ru tang ru daux pui Isarelax khankix, sinngao kix tak teei lih khaing doeh ru keeing ex mai deeh naok ka piang sinngao doeh ru pa mex kix, mawh kheu nan sinngao yix tak mawh pa dieh hu khaing yix.
4 Yam hoek num Jubili pui Isarelax khankix, sinngao kix tak mawh pa deeh naok tix ka piang sinngao doeh ru pa mex kix, mawh kheu nan tak teei sinngao kix lih khaing sinngao cie doeh ru keeing ex sax.”
5 Mose krai awm lox tawm Simiang Siyiex ka pui Isarelax khankix ah nin, “Can lox pa krai ru kawn simex Yosiep mawh pa Khaw pa caw.
6 In mawh lox pa tawm Simiang Siyiex, son Grawng pa dex mai kawn bun Zelophat pa ah nin.Kieh kix mex ka pui pa simie kix tix mex, viang mawh nan kix tak yaox ti mex ka daux doeh ru nyiex ma keeing tix khaing.
7 Mawh kheu nan sinngao pui Isarelax khankix, tak ang pon ti luan khaing daux tawm taix doeh ru mawx ru an. Mawh kheu pui Isarelax khankix, tak priex sinngao doeh ru keeing tix.
8 Bun pa pon ti cie sinngao, ka daux doeh ru pui Isarelax khankix ku cub, tak yaox ti mex khaing daux doeh ru keeing tix, sonsang pon nawh ti cie sinngao keeing tix.
9 Mawh kheu nan sinngao pon kix, tak ang lai yaox ti gah khaing daux tawm taix doeh ru kix tix cub mai tix cub, kix tak priex rien ka sinngao cie cao tix”
10 Awm lox pa hoik tawm Simiang Siyiex ka Mose, kawn bun Zelophat khankix hawt ti yuh awm an.
11 Kawn bun Zelophat mawh Mala, Tiraza, Hawgala, Milakha mai mex Nawa mawh kawn simex puxke keeing kix.
12 Kix teei ti mex daux doeh ru Manashe kawn simex Yosiep mai sinngao kix tak kaux ka daux doeh ru nyiex ma keeing kix khawmuik.
13 In mawh been lox tat jhawm prawng pa hoik tawm Simiang Siyiex ka pui Isarelax khankix, ka daux tawm taix Mose ka daux lung haktiex Mawbax, hawt rawm klawng Yawdan, pa koe ka plak toi veng Yerikho heue.