28
Krax Tan Son Ku Singaix
(Lih 29:38-46)
1 Simiang Siyiex ah nin ka Mose,
2 “Tawm lox ka pui Isarelax ah nin ka kix, krax tan son Aux, pa ih Aux mai krax tan pa gleeing ka ngu pa mawh krax tan pa sioe bhawng pa khaw rhawm Aux maix tak yuh satix tix yam tan maix ka Aux, ka daux bawg yam pa hoik tat ti deuh.”
3 Maix tak ah nin ka kix, “In mawh krax tan pa gleeing ka ngu, pa sang tan maix ka Simiang Siyiex, tak mawh kawn yung mhaing iak pa naog num, pa loig ra mu tix ngaix hoik tix ngaix jheung jheung.
4 Maix tak tan kawn yung iak ponngawb tix mu mai tan ka plakbo tix mu tau,
5 mai phawng nghox ca ceu pa mhawm kao son tix son khaing tix epha pa mawh krax tan phawng nghox ca im, pa hoik klao ti tau mai bee sanlon pa krid tix lih khaing plix sanlon pon son tix son khaing tix heng.
6 An mawh krax tan pa gleeing jheung jheung pa hoik tat ti deuh ka piang gawng Sina krax tan pa sioe bhawng pa khaw rhawm Siyiex pa mawh krax tan pa gleeing ka ngu.
7 Maix tak tan kawn yung tix mu tau mai krax tan pa nyaux, pon son tix son khaing tix Hing, maix tak hieh krax tan pa nyaux an dee pa singax singeh son Simiang Siyiex.
8 Maix tak tan kawn yung tang mu ka plakbo awm krax tan phawng nghox ca im ka plak ponngawb tau mai krax tan pa nyaux. Maix tak tan krax tan pa gleeing ka ngu mai krax tan pa sioe bhawng pa khaw rhawm Simiang Siyiex heue.
Krax Tan Son Singaix Twah
9 “Ka daux singaix twah maix tak tan kawn yung iak pa naog num pa loig ra mu mai phawng nghox ca ceu pa mhawm pa hoik klao tau mai bee kao son ra son khaing tix epha, tau mai krax tan pa nyaux,
10 lheu khaing krax tan pa gleeing tau mai krax tan pa nyaux jheung jheung, in tak mawh krax tan pa gleeing son singaix twah ku twah heue.Ref 28:9-10 Mat 12:5.
Krax Tan Son Ku Khix
11 Haok khix khraox tix ngaix maix tak viex ti tan kawn mawie mhaing ra mu, kawn yung mhaing tix mu mai kawn yung pa naok num pa loig aliah mu son krax tan pa gleeing ka Simiang Siyiex,
12 Mai phawng nghox ca ceu pa mhawm, kao son loe son khaing tix epha mawh son mawie mhaing tix mu, krax tan phawng nghox ca ceu pa mhawm pa hoik klao tau mai bee kao son ra son khaing tix epha son yung tix mu,
13 phawng nghox ca ceu pa mhawm kao son tix son khaing tix epha pa hoik klao ti tau mai bee, son kawn yung iak ku mu, mai son krax tan pa gleeing pa sioe bhawng, pa mawh krax tan pa gleeing ka ngu pa khaw rhawm Simiang Siyiex.
14 Krax tan pa nyaux kix rawm plix siiet tix plak heng mawh son mawie mhaing tix mu mai loe son tix son khaing tix heng mawh son yung tix mu mai pon son tix son khaing tix heng mawh son kawn yung tix mu, in mawh krax tan pa gleeing son ku khix, tom sidah num.
15 Lheu khaing krax tan pa gleeing jheung jheung mai krax tan pa nyaux, maix tak baox viex kawn pex tix mu son krax tan son phimap ka Simiang Siyiex heue.
Krax Tan Son Pawie Pasakha
(Krub 23:1-44)
16 “Ka daux khix tix kao pon ngaix mawh pawie Pasakha Simiang Siyiex.Ref 28:16 Lih 12:1-13; Pi 16:1-2.
17 Ka daux khix in kao phwan ngaix mawh singaix pawie, ka daux aliah ngaix tak yaox ti ih blah pa ang sau susaix.Ref 28:17-25 Lih 12:14-20; 23:15; 34:18; Pi 16:3-8.
18 Ka daux singaix jah pex tak khrawm paox tix ka daux pa singax singeh. Pex tak ang pon ti yuh kaing jhaw tix ceu kawx,
19 mai pex tak yuh krax tan pa yuh ka ngu, son krax tan pa gleeing ka Simiang Siyiex, ka mawie mhaing ra mu, yung tix mu mai kawn yung iak pa naog num aliah mu, an khawmuik tak mawh pa loig.
20 Krax tan phawng nghox ca ceu pa mhawm pa hoik klao tau mai bee kao son loe son khaing tix epha mawh son mawie mhaing tix mu mai kao son ra son mawh son yung tix mu,
21 pex tak tan kao son tix son khaing tix epha son kawn yung iak an kix khawm aliah mu,
22 son krax tan pa pluat ploi phimap pex tak yuh krax tan pa khyox khaw ka pex mhaing tix mu son pex.
23 Lheu khaing krax tan pa gleeing ka plak ponngawb, pa mawh krax tan pa gleeing jheung jheung pex tak tan krax tan in khankix.
24 Krax tan pa gleeing jheung jheung mai krax tan pa nyaux khankix pex tak tan pa ih pa mawh krax tan pa yuh ka ngu aliah singaix pa sioe bhawng pa khaw rhawm Simiang Siyiex.
25 Ka daux singaix aliah pex tak khrawm paox tix ka daux pa singax singeh, pex tang ang pon ti yuh kaing jhaw heue.
Tan Son Pawie Singaix Twah
26 “Awm an ka daux singaix tan pex plix pa liang, pex tak tan krax tan phawng nghox ca pa khraox ka Simiang Siyiex ka daux pawie aliah vang twah, Ref 28:26-31 Lih 23:16; 34:22; Pi 16:9-12. pex tak khrawm paox tix ka daux pa singax singeh, pex tak ang pon ti yuh kaing jhaw,
27 pex tak viex krax tan pa gleeing pa sioe bhawng pa khaw rhawm Simiang Siyiex. Pa mawh kawn mawie mhaing ra mu mai kawn yung tix mu mai kawn yung pa naog num aliah mu tau,
28 mai krax tan pa mawh phawng nghox ca ceu pa mhawm pa hoik klao mai bee kao son loe son khaing tix epha son mawie mhaing tix mu mai kao son ra son, son yung tix mu,
29 kao son tix son, son kawn yung aliah mu tau,
30 mai kawn yung mhaing tix mu, sonsang yuh krax pa khyox khaw son pex.
31 Lheu khaing krax tan pa gleeing jheung jheung tau mai krax tan phawng nghox ca, pex tak tan krax tan pa nyaux, an kix tak mawh pa loig heue.