27
Been Pa Dex Dawd Mai Sinngao
1 Yam an kawn bun Zelophehat mawh Mala, Nawa, Hawgala, Milaka, Tiraza, khaing Hepha, khaing kawn simex Gilat, khaing kawn simex Makhirax, khaing kawn simex Manashe, khaing kawn simex Yosiep.
2 Kix cung ka plak sivoe Mose mai ka plak sivoe Eliza cao giex kaing li mai ka plak sivoe cao kaing cao kap mai ka plak sivoe pui hun ka diang siviex laig ka daux nyiex gox bwan man bang kum pui hun ah nin,
3 keeing yix yum ka daux tiag, nawh ang laig ka daux sinax cub pa kraix khrawm paox ti tieh feen ka Simiang Siyiex, tau mai cub Korax, viang mawh nan nawh yum kheu phimap tix mai nawh ang koe kawn simex tix kaux kawx.
4 Mawh kheu ang keeing yix koe kawn simex tix kaux kawx, tak sang tik yix khaing daux doeh nyiex ma nawh lie? Mawh kheu nan, tawx sinngao cie yix khaing daux sinax puxaik keeing yix khankix liak.”
5 Mose viex Grawng see kix hoek sivoe Simiang Siyiex.
6 Simiang Siyiex ah nin ka Mose,
7 “Lox krai kawn bun Zelophihat khaw heue, maix tak tawx kix cie sinngao ka daux sinax puxaik keeing kix mai kieh sinngao keeing kix mawh cie kix.Ref 27:7 Si 36:2.
8 Maix ah nin ka pui Isarelax khankix, phan pui tix kaux kaux pa ang koe kawn simex yum maix tak kieh sinngao nawh mawh son kawn bun nawh.
9 Phan nawh ang koe kawn bun maix tak tawx sinngao nawh ka puxaik nawh khankix.
10 Phan nawh ang koe puxaik maix tak tawx sinngao nawh ka puxaik keeing nawh khankix.
11 Phan keeing nawh ang koe puxaik maix tak tawx sinngao nawh ka ru pa dex dawd mai doeh nyiex ma nawh khankix mai nawh tak pon ti cie ka an. An tak mawh been lox tat jhawm prawng ka son kawn praix Isarelax, awm pa hoik tawm Simiang Siyiex ka Mose heue.”
Yawsux Mawh Cao Kaing Pui Isarelax
12 Simiang Siyiex ah nin ka Mose, “Haok ka piang gawng Abarim mai jhak ka haktiex pa hoik tawx Aux ka pui Isarelax.”
13 Yam hoik yaox maix ka an maix kawx tak khrawm tix tau mai pui, awm khrawm puxke maix Arun tix tau mai kix,
14 mawh kheu pax hoik tieh feen ka gumlox Aux ka daux tiag Zin, yam thung thiang pui hun paox ti maix ang yungyi ka Aux ka plak sivoe ngai kix.Ref 27:12-14 Pi 3:23-27; 32:48-52. In mawh rawm klawng Meribax pa koe hawt Kadesha ka daux tiag Zin.
15 Mose ah nin ka Simiang Siyiex,
16 “Kieh Simiang Siyiex pa mawh Khwan ka piang kawn pui khankix laug pui tix kaux thung ka pui hun,
17 pui pa sang pon hu laig ka plak sivoe kix mai pui pa pon thung kix lih mai pa pon viex kix laig, sonsang ang pui Simiang Siyiex khankix awm yung pa ang koe cao liang.”
18 Simiang Siyiex deeh ah nin ka Mose, “Kok Yawsux Ref 27:18 Lih 24:13. kawn simex Nun pa mawh pui pa koe khwan ka daux nawh mai deuh taix tix ka piang nawh,
19 “Kieh nawh cung sivoe ngai Eliza cao giex kaing li mai sivoe ngai pui hun mai ap beeh glawm nawh ka plak sivoe kix.
20 Tak tawx min siawp sibrawm tix ka nawh tiblah, sonsang cu nghiet cub pui hun Isarelax ka nawh.
21 Nawh tak cung ka plak sivoe Eliza cao giex kaing li mai cao giex kaing li tak chawk cheng grawng krax prawng ca been UrimRef 27:21 Lih 28:30; 1Sa 28:6. ka plak sivoe ngai Simiang Siyiex ka son nawh, mai pui ku kaux tak lih tak laig awm gumlox nawh, tau mai nawh khawm pui Isarelax mai cub pui hun khankix.”
22 Mose yuh awm lox pa hoik tawm Simiang Siyiex ka nawh, nawh kok Yawsux mai kieh nawh cung sivoe ngai Eliza cao giex kaing li mai pui hun khankix.
23 Nawh deuh taix tix ka piang Yawsux mai ap beeh glawm ka nawh, Ref 27:23 Pi 31:23. awm pa hoik tawm Simiang Siyiex ka Mose heue.