22
Simiang Baliet Kok Ka Balam
1 Khaix an pui Isarelax deeh gah tix mai bang tix ot ka daux lung Mawbax plak lih singaix hawt praok rawm klawng Yawdan plak toi veng Yerikho.
2 Baliet kawn simex Ziphaw yaox ka pa hoik yuh pui Isarelax ka ceu pui Amawrix.
3 Pui haktiex Mawbax kied lhat graung ka pui Isarelax kheu kied haoh hun kix.
4 Pui Mawbax ah nin ka kwad song nong yu pui Midian, “Awm mawie sawm rib pa koe rawb rim tix, cub pui hun in khankix tak yuh can ceu pa koe rawb rim ex laux leeing, “yam an Baliet kawn simex Ziphaw mawh simiang pui Mawbax.
5 Nawh ploi pui cau khankix hu ka Balam kawn simex Bawrax, pa ot ka veng Petaw pa koe dex rawm klawng Yufrethix haktiex Amaw mai kok nawh ah nin, “Jhak heue, pui khankix hoek khaing Ejiptux, mai kix hoik kheem ka piang haktiex mai kix hoik ot see aux.
6 Yuh bwanson jhax lawg ka pui in khankix son aux liak, mawh kheu kied ting riang kix khaing aux, aux bak tix pon grheu kix lih khaing daux haktiex in, mawh kheu tawng aux pui pa nawb maix bwan ka pon bwanson mai pui pa jhax lawg maix ka kawx tak pon pa jhax lawg.”
7 Mawh kheu nan kwad song nong yu pui Mawbax mai kwad song nong yu pui Midian, viex totaix mau sonsang yuh simeed ka taix tix mai hoek ka Balam mai krai lox simiang Baliet ka nawh.
8 Balam ah nin ka kix, “Paung tin daux sawm in, aux tak deeh krai lox ka pex, awm pa krai Simiang Siyiex ka aux.” Mawh kheu nan cub cao kaing Mawbax khankix, ot tau mai Balam.
9 Siyiex hoek ah nin ka Balam, “Pui in khankix pa ot tau mai maix mawh pui mawx?”
10 Balam deeh ah nin ka Siyiex, “simiang Baliet kawn simex Mawbax, ploi pui hoek ah nin ka aux,
11 “Jhak heue, pui tix cub kaoh khaing meung Ejiptux mai hoik kheem ka piang haktiex, yam in hoek jhax lawg kix son aux liak, aux bak ti pon puing kix mai grheu kix.”
12 Siyiex ah nin ka Balam, “Paw lai hu mai kix. Maix tak ang pon ti jhax lawg ka pui in khankix, mawh kheu kix mawh ceu pui pa pon bwanson.”
13 Balam kaoh ponngawb ah nin ka cao kaing cao kap cie Baliet khankix, “Deeh ing ka haktiex pex, mawh kheu Simiang Siyiex hoik thiang aux ang hu mai pex.”
14 Cao kaing cao kap Mawbax khankix kaoh mai ing ah nin ka Baliet, “Balam thiang ti ang hoek mai yix.”
15 Baliet baox ploi cao kaing cao kap tom nie pa nie lheu ting min plakngai khaing pa hu sivoe.
16 Kix hoek ka Balam ah nin ka nawh, “Baliet kawn simex Ziphaw ah yuh nin, paw kieh pa tiebtie tix ceu kawx koe ka maix, sonsang hoek maix ka aux,
17 Mawh kheu aux tak yaog maix ting min mai aux tak yuh can ceu pa ah maix ka aux khankix, hoek mai jhax lawg pui inkix son aux liak.”
18 Balam deeh pawk lox ah nin ka pui cau simiang Baliet, “Viang simiang Baliet sang tawx mau khri tom naog ka nyiex haw tix kawx, aux tak ang pon lheu lox tawm Simiang Siyiex tix, sonsang yuh tix kaing ceu pa ting mai ceu pa iak ang ah.
19 “Mawh kheu nan pex baox ot tin daux sawm in, sonsang tawng aux ceu pa sang baox ah Simiang Siyiex ka aux.
20 Siyiex hoek ka Balam ponsawm ah nin ka nawh, “Phan pui hoek kok maix kaoh hu tau mai tix, viang mawh nan maix tak yuh awm pa hoik krai Aux ka maix khaing.”
21 Awm an Balam kaoh ponngawb mai sau an brug tix ka piang la mai lih hu tau mai cub cao kaing Mawbax heue.
Balam Mai Kawncau Siyiex
22 Simiang Siyiex song rhawm kheu lih hu nawh, mai kawncau Simiang Siyiex tix kaux cung ka daux krax mai tiebtie ka nawh. Nawh brug la tix mai hu tau mai kawncau tix ra kaux.
23 La yaox ka cung kawncau Simiang Siyiex ka daux krax tau mai vaig pa lawd ka daux taix nawh, la veeh ti hu ka praok krax mai laig daux kaung, mai Balam sivied ka la sonsang lawng daux krax.
24 Kawncau Simiang Siyiex deeh cung ka dee sikhawp krax pa koe guh lhaong khawm ra plak sinax sipeem plix siiet,
25 Yam yaox la ka kawncau Simiang Siyiex, nawh greed tix ka plak guh mai yeen caong Balam ka guh, mawh kheu nan Balam baox sivied ka la.
26 Khaix an kawncau Simiang Siyiex hu sivoe mai cung ka dee sikhawp krax dee ang krax via lai koe ka plak dawm mai plak gwiex.
27 Yam yaox la ka kawncau Simiang Siyiex, la gup ti ka greem Balam mai Balam song rhawm mai baox sivied la ka khaox grix tix.
28 Khaix an Simiang Siyiex paoh jheeh la ah nin ka Balam, “Hoik yuh aux ceu ti ka maix, maix lai sivied aux tom loe bawg?”
29 Balam ah nin ka la, “Mawh kheu hoik map maix ka aux. Aux simie ti koe vaig tix kre daux taix tix sonsang pah aux ka maix.
30 La deeh ah nin ka Balam, “Aux mawh la pa hoik brug maix jih jang glang gleeing tom hoek in singaix ang mawh lie? Khex sax yuh aux ceu in ka maix lie?” Balam deeh ah nin, “Maix ang sax yuh.”
31 Khaix an Simiang Siyiex paoh ka ngai Balam mai nawh yaox kawncau Simiang Siyiex pa cung daux krax, tau mai vaig pa lawd tix ka daux taix tix, Balam num kaing tix mai gup ngai tix.
32 Kawncau Simiang Siyiex ah nin ka nawh, “Kheu maix lai sivied la tix, tom loe bawg? Jhak heue, Aux hoek ti cung sonsang tiebtie tix ka maix, mawh kheu krax hu maix mawh krax pa lud ka plak sivoe Aux,
33 Phan La ang yaox Aux mai via khaing Aux loe bawg, Aux hoik dawg pah maix yam an mai kieh la im ju.”
34 Balam ah nin ka kawncau Simiang Siyiex, “Aux hoik lud kheu ang aux tawng Maix Cao cung ka daux krax, sonsang tiebtie ka aux. Phan ang mawh pa khaw ka plak sivoe ngai Maix aux tak deeh ing.”
35 Kawncau Simiang Siyiex ah nin ka Balam, “Hu mai pui an khankix, viang mawh nan maix tak krai awm lox pa kieh Aux maix krai ngie.” Mawh kheu nan Balam hu tau mai kawncau Baliet.
36 Yam mhong Baliet ka hoek Balam, Baliet lih hu rieb nawh ka veng Mawbax, ka toh mee hawt rawm klawng Anon,
37 Baliet ah nin ka Balam, “Aux ploi pui hu kok maix, tix bawg hoik tix bawg ang mawh lie? yuh ka mawx maix lai ang cu tix hoek ka aux ang aux mawh pa pon yaog min maix lie?”
38 Balam deeh ah nin ka Baliet, “Jhak heue, Aux hoek ka maix phao! mawh koe sibrawm aux tix sang krai tix ceuceu lie? Aux sang krai ngie lox pa deuh Siyiex ka daux jheeh aux khaing.”
39 Khaix an Balam hu tau mai Baliet mai kix hoek ka veng Kiriyat Huzot.
40 Baliet yuh krax tan ka mawie mhaing mai yung mai ap krax tan an ka Balam khawm cao kaing pa hoek tau mai nawh heue.
41 Ka daux singaix pasax Baliet kok ka Balam mai viex nawh haok ka dee pa singax dee koe siyiex Balax, khaing tan nawh pon simi ti jhak ka pui Isarelax pa ot dee dex heue.