1 Balam ah nin ka Baliet, “Sum khu dee tan son aux aliah mu tin, khre ti tawx mawie mhaing aliah mu mai yung mhaing aliah mu son aux.” 2 Baliet yuh awm pa krai Balam, Baliet mai Balam tan mawie mhaing tix mu mai yung mhaing tix mu, ka piang khu dee tan ku mu. 3 Balam ah nin ka Baliet, “Cung dex praok krax tan pa gleeing maix mai aux tak lih hu, aux bak Simiang Siyiex sang hoek ti rieb ka aux, mai can ceu pa jhi Nawh Cao ka aux khankix, aux tak krai ka maix.” Mawh kheu nan nawh kawx haok ka dee pa kied lhaong. 4 Siyiex rieb ti yaox Balam mai Balam ah nin ka Nawh Cao, “Aux hoik khre rien khu dee tan aliah mu mai hoik tan mawie mhaing tix mu mai yung mhaing tix mu ka piang khu dee tan ku mu.” 5 Simiang Siyiex sau lox tix ka daux jheeh Balam ah nin, “Deeh ing ka Baliet mai maix tak krai awm in.” 6 Balam deeh ing ka Baliet mai yaox Baliet mai cao kaing Mawbax khankix kawn cung dex praok krax tan pa gleeing ti. 7 Balam krai lox jhai ah nin, “Baliet simiang pui Mawbax, viex aux hoek khaing haktiex Aram mai khaing gawng plak lih singaix, hoek heue, jhax lawg ka pui Yakop son aux mai hoek heue. Ap pui Isarelax khankix hoek krax laux leeing. 8 “Aux tak sang jhax lawg ka pui pa ang Siyiex jhax lawg yuh ka mawx? mai aux tak sang ap pui pa ang Siyiex nyang ap hoek yuh krax laux leeing yuh ka mawx? 9 Mawh kheu Aux yaox nawh khaing ka piang choek gawng mai hoik simi nawh khaing ka piang ton, jhak heue ceu pui tix cub ot nong nong, ang lai neuex tix daux sinax ceu pui tang ceu! 10 Mawh pui mawx pa pon simin ka ceu pui Yakop pa nie awm phawng tiex, phan ang mawh nan, mawh pui mawx pa pon simin ka ceu pui Isarelax pa koe pon son tix son! kieh aux yum awm pui rahsee mai kieh dee sidah aux, awm dee sidah nawh. 11 Baliet ah nin ka Balam, “Hoik yuh maix patix ka aux? aux kok maix, sonsang jhax lawg maix ka pui pa koeng tix mai jhak heue maix ang yuh tidtix mai hoik nawb bwanson ka piang kix, ” 12 Nawh pawk lox ah nin, “Mawh ang aux Khaw tix rien lox sikah ceu pa hoik deuh Simiang Siyiex ka daux jheeh aux lie?”

13 Baliet ah nin ka nawh, “Hoek tau mai aux ka tang dah, khaing dee chix yaox maix kix, maix tak yaox ngie kix ceeix ceeix mai ang yaox kix khawmuik, mai maix jhax lawg ka kix son aux dee an.” 14 Nawh viex Balam hoek ka daux kaung Zophim ka piang choek gawng Pisaga mai sum khu dee tan aliah mu mai tan mawie mhaing tix mu mai yung mhaing tix mu, ka piang khu dee tan ku mu. 15 Balam ah nin ka Baliet, “Cung dex praok krax tan pa gleeing maix tin, yam kawn hu pub aux ka Simiang Siyiex plak an.” 16 Simiang Siyiex pub Balam mai sau lox sikah tix ka daux jheeh nawh ah nin, “Deeh ing ka Baliet mai maix tak sikah awm in.” 17 Balam deeh hoek ka nawh, yaox kawn cung nawh praok krax tan pa gleeing ti tau mai cub cao kaing Mawbax khankix mai Baliet ah nin ka nawh, “Simiang Siyiex krai lox patix?” 18 Balam krai lox jhai ah nin, “Simiang Baliet kaoh mai nghiet heue, kawn simex Ziphaw nghiet ka lox aux heue, 19 “Siyiex ang mawh kawn pui pa sang pie lhen mai ang mawh kawn pui pa sang doh keud, ang Nawh Cao yuh awm pa hoik ah ti lie? Awm koe sijax mukheu Nawh mai Nawh Cao ang yuh awm pa hoik krai tix lie? 20 Jhak heue aux hoik pon rieb lox tawm son pa nawb bwanson, Nawh Cao hoik nawb bwanson mai aux ang lai pon preet ka bwanson an. 21 “Nawh Cao ang doh pon yaox ka krax kha rhawm ka daux ceu pui Yakop mai ang doh pon yaox ka pa caox caig, ka daux pui Isarelax khankix. Simiang Siyiex kix ot tau mai lox kok yo simiang koe sinax kix. 22 Siyiex hoik viex kix lih khaing meung Ejiptux, mai hoik kieh kix koe riang rao awm rung mawie praix. 23 “Ang koe pui simeed sonsang yuh ka ceu pui Yakop laux, mai ang koe pui yuh sibawk sonsang yuh ceu pui Isarelax laux, yam in hoik mawh bawg yam ah pui lox ceu in ka pui Yakop mai ka pui Isarelax, Siyiex tak sang yuh ka mawx? 24 Jhak heue, pui tix cub tak kaoh awm sivai sangsi shiang mai yaog ti kaoh awm sivai sangsi mhaing, nawh ang lai it lai tum tom ang nawh nyang ih kug pa pon ti mai yot ka nham totiag pa hoik pah tix.” 25 Baliet ah nin ka Balam, “Paw doh jhax lawg ka kix mai paw doh nawb bwan ka kix.” 26 Balam pawk lox Baliet ah nin, mawh ang aux hoik dawg krai lox ka maix mai aux tak sang yuh awm lox pa hoik krai Simiang Siyiex khawmuik ang mawh lie?”

27 Mai Baliet ah nin ka Balam, “Hoek heue, Aux tak viex maix hu ka tang dah, Aux bak an mawh pa khaw pa caw rhawm Siyiex, sonsang jhax lawg maix kix, son aux ka dee an.” 28 Baliet viex Balam haok ka piang choek gawng Pegurax, pa veeh ngai tix ka tiag Yeshimon. 29 Balam ah nin ka Baliet, “Sum khu dee tan son aux aliah mu mai khre mawie mhaing aliah mu mai yung mhaing aliah mu ka son aux. 30 Baliet yuh awm pa hoik krai Balam mai tan mawie mhaing tix mu mai yung mhaing tix mu, ka piang khu dee tan ku mu heue.