21
Som Pui Khanan Gawng Hawma
1 Yam mhong simiang Arat ceu pui Khanan pa ot ka Nekep ka hoek ceu pui IsarelaxRef 21:1 Si 33:40. khankix, ka krax Etarim, nawh puing ka pui Isarelax khankix mai giex kix tiblah mawh pui giex pui laung.
2 Pui Isarelax khankix yuh sijax ka Simiang Siyiex ah nin, “Phan Maix Cao ap kix daux tawm taix yix, yix tak yuh veng kix laux lak pak leeing.”
3 Simiang Siyiex nghiet ka lox pui Isarelax mai ap pui Khanan ka kix mai yuh kix mai veng laux lak pak leeing, mawh kheu nan tom kok ceu kaux dee an mawh Hawma heue.
Grawng Rieng Siuing Tawng
4 Kix lih krax khaing gawng Hawrax mai hu ka plak rawm sigrit sigra raoh, sonsang via ka rawb rim haktiex Edom, Ref 21:4 Pi 2:1. mai kix kied laux rhawm kheu nu krax.
5 Pui khankix ah lox tieh feen ka Siyiex mai Mose, “Kheu maix lai viex yix lih hu khaing meung Ejiptux sonsang yum ka daux tiag lie? Mawh kheu pa ih mai rawm kawx ang koe, yix hoik seeing ka blah pa ang koe jhawm jheet in.”
6 Mawh kheu nan Simiang Siyiex ploi siuing ngu, ka sinax pui khankix mai siuing tut ka pui khankix mai pui Isarelax yum tom nie.
7 Pui khankix hoek ka Mose ah nin, “Yix hoik yuh phimap kheu hoik ah yix lox tieh feen ka Simiang Siyiex mai maix, yuh bwanson rawg bwan ka Simiang Siyiex, sonsang teei Nawh Cao ti tik siuing ngu hu singai khaing yix liak.” Mawh kheu nan Mose rawg bwan son pui khankix.
8 Simiang Siyiex ah nin ka Mose, “Yuh riang siuing ngu tix mu mai deuh ka piang khaox tix gawng, yam pui pa hoik tut siuing maong ti jhak ka an nawh tak deeh im.”
9 Mawh kheu nan Mose yuh riang siuing tawng tix mu mai deuh ka piang khaox tix gawng, Ref 21:9 Yo 3:14. phan siuing tut ka pui tix kaux kaux, yam maong nawh ti jhak ka riang siuing tawng an nawh tak im heue.
Hawrax Tom Hoek Mawbax
10 Yam in pui Isarelax khankix, gah tix mai hu bang ka Awbok.
11 Kix gah tix khaing Awbok mai bang ka hawt Iyeabarim, ka daux tiag pa koe see Mawbax ka plak lih singaix.
12 Kix deeh gah tix khaing tan mai bang daux ngawd Zariet.
13 Kix deeh gah ti hu khaing tan mai bang praok rawm klawng Anon ka praok plak an, pa koe daux tiag pa kleuk ti daux khaing mee haktiex Amawrix, mawh kheu rawm klawng Anon mawh mee haktiex Mawbax mai haktiex Amawrix.
14 Awm pa hoik tiem ti deuh ka daux phuk lai naing Simiang Siyiex pa mawh baoh Wahiet awm Suphax, khawm rawm klawng Anon khankix,
15 mai lih ka baoh plak seh tom hoek ka haktiex Arax mai mawh pa koe ka piang mee haktiex Mawbax.”
16 Kix lih khaing tan mai hu ka Berax pa mawh rawm daux dee hoik ah Simiang Siyiex nin ka Mose, “Khrawm pui khankix tau mai Aux tak tawx rawm ka kix.”
17 Pui Isarelax khankix ah lai rhax, “Rawm daux eue, kieh rawm maix lih liak! mai rhax lai sonsang lih rawm.
18 “Rawm daux pa kaong cao kaing cao kap mai pa kaong cao thong cao bung khankix mai pa hoik kaong cao prawng see, ka khaox grix tix.” Kix lih khaing daux tiag mai hu ka plak Matanax,
19 lih khaing Matanax hu ka plak Nahalelax mai lih khaing Nahalelax hu ka Bamot,
20 lih khaing Bamot hu ka ngawd mee haktiex Mawbax mai haok ka choek gawng Pisaga, simi ti jhak haktiex Yeshimon heue.
Grawng Som Simiang Sihon
(Pi 2:26-37)
21 Pui Isarelax ploi kawncau tix khankix hu ka Sihon simiang Amawrix ah nin,
22 “Kieh yix tiang ka haktiex cie maix, yix tak ang laig ka daux kaung, daux sipeem plix siiet pex, yix tak ang nyaux rawm daux pa koe haktiex pex, yix tak lawng hu ka daux krax ting cie simiang tom sidah tiang yix ka daux haktiex pa kwang maix.”
23 Simiang Sihon ang tawx akhwang tiang pui Isarelax ka mee haktiex tix, nawh khrawm pui tix tau khawmuik mai lih sonsang puing ka pui Isarelax ka daux tiag mai hoek ka veng Zahat mai puing ka pui Isarelax.
24 Pui Isarelax pah simiang yum ka lawm vaig mai rhim ti teei haktiex cie nawh, jah khaing rawm klawng Anon tom hoek ka rawm klawng Yabok tom singai khaing ceu pui Amon, mawh kheu mee haktiex ceu pui Amon, hoik mawh pa kaux pa cong.
25 Pui Isarelax khankix rhim ka veng in khawmuik mai pui Isarelax khankix laig ot ka daux veng pui Amawrix khankix mai ka daux veng Heshabon mai ka daux yaong kix khawmuik.
26 Mawh kheu veng Heshabon, mawh veng ting simiang Sihon ceu pui Amawrix, mawh pui pa puing ka simiang haktiex Mawbax mai rhim haktiex khaing daux taix nawh, tom singai hoek ka rawm klawng Anon.
27 Mawh kheu nan can pui pa ah lox leng khankix ah nin, “Hoek ka veng Heshabon, kieh deeh sum ka an, deeh pang ka veng simiang Sihon.
28 “Ngu lih khaing veng Heshabon, rao ngu khaing veng Sihon gleeing veng Arax mai pa koe daux haktiex Mawbax mai simiang pa kwang dee lhaong hawt rawm klawng Anon.
29 Haktiex Mawbax eue, pex tak kha rhawm! ceu pui Khemoshax khankix eue, pex tak laux leeing! siyiex pex hoik kieh kawn simex pex to tua mai kawn bun pex khankix mawh pa giex laung ka simiang Sihon meung Amawrix.
30 Baox deeh yuh doeh ru kix laux, jah ka veng Heshabon tom hoek ka veng Dibun, khaix an baox deeh yuh kix laux jah ka veng Nawpha tom hoek ka veng Medabax.”
31 Mawh kheu nan ceu pui Isarelax khankix yaox ti ot ka daux haktiex ceu pui Amawrix khankix.
32 Mose ploi cao jiang hu ka veng Yaza, mai kix rhim nyiex yaong khankix mai grheu ceu pui Amawrix pa ot tan to heue.
Grawng Som Simiang Awgax
(Pi 3:1-11)
33 Kix deeh veeh ti hu krax haktiex Bashan, mai Awgax simiang meung Bashan hoek ti puing ka kix, nawh mai pui nawh khankix yuh naing ka haktiex Edarix.
34 Simiang Siyiex ah nin ka Mose, “Paw lhat ka nawh, mawh kheu Aux hoik ap nawh mai pui nawh mai haktiex nawh ka daux taix maix, maix tak yuh ka nawh awm hoik yuh maix ka Sihon simiang ceu pui Amawrix pa ot haktiex Heshabon.
35 Kix pah nawh khawm kawn simex nawh, tau mai pui nawh khawmuik, tom ang lai deuk tix kaux kawx mai kix rhim sinngao haktiex nawh khankix heue.