20
Krax Pa Lud Mose Baoh Kadeshax
1 Cub pui hun Isarelax khankix, hoek ka daux tiag Zin khix tix mai pui khankix ot baoh Kadeshax, Meriam yum tan mai kix sipaung nawh tan heue.
2 Mawh kheu rawm nyaux son pui hun khankix ang koe, mai kix khrawm paox tix, tieh feen ka Mose mai Arun.
3 Pui khankix deuh phimap ka Mose ah nin, “Yix Khaw ti hoik yum, yam yum pux aik yix khankix ka plak sivoe Simiang Siyiex!
4 Maix lai viex cub pui hun Simiang Siyiex hoek ka daux tiag tin, sonsang yum yix tau mai to brie tix tin yuh ka mawx?
5 hoik kieh yix lih khaing meung Ejiptux, sonsang viex yix hoek ka dee pa caox caig in yuh ka mawx? Ka dee in mawh dee ang pon sum simie khaox plix ruh, nhu plix siiet mai plix kla jiang khankix, mai rawm nyaux kawx ang koe.”
6 Mose mai Arun lih khaing dee ot pui hun mai hu ka diang siviex nyiex gox bwan man bang kum mai kiex gup pakngai tix tan. Min plakngai Simiang Siyiex lih bleeh ka kiex heue.
7 Simiang Siyiex ah nin ka Mose,
8 “Teei khaox grix, kok puxke maix Arun mai khrawm pui hun, tawx lox ka rang plak sivoe ngai kix, kieh nawh tawx rawm, awm an maix tak kieh rawm lih son kix khaing daux rang, mai tawx rawm nyaux ka cub pui hun mai to brie kix.”
9 Mose teei khaox grix khaing plak sivoe Simiang Siyiex, awm pa hoik tawm Nawh Cao.
10 Mose mai Arun khrawm pui hun tau ka plak sivoe rang ah nin ka kix, “Pex pa tieh feen nghiet yam in, mawh sang kieh ex rawm lih son pex khaing daux rang in lie?”
11 Mose yaog taix tix mai lah rang ka khaox grix tix ra bawg, khaix an rawm lih tom nie, cub pui hun mai to brie cie kix yaox ti nyaux ka.
12 Simiang Siyiex ah nin ka Mose mai Arun, “Mawh kheu ang pax yum rhawm ka Aux mai ang yungyi ka Aux, ka plak sivoe ngai pui Isarelax, pax tak ang pon viex pui hun inkix laig ka daux haktiex pa hoik tawx Aux ka kix.”
13 In mawh rawm Meribax, grawh grawng nawh, viang pui Isarelax yuh simah simiang mai Simiang Siyiex kawx, Nawh kawn jhi pa singax tix daux sinax kix heue.Ref 20:2-13 Lih 17:1-7.
Thiang Pui Edom Ka Pui Isarelax
14 Yam in Mose ploi pui cau tix khaing Kadeshax mai hu ka simiang Edom, pux maix Isarelax ah nin, “Maix tawng ka krax kha rhawm pa hoek ka piang yix khawmuik, ”
15 keeing yix khankix hoik hu ka Ejiptux, yix ot daux meung Ejiptux, tom rheung, mai pui Ejiptux khankix, hoik tuktiak ka yix mai ka keeing yix khankix,
16 yam riag yo yix ka Simiang Siyiex, Nawh Cao hoik mhong lox yix mai Nawh ploi kawncau Siyiex mai viex yix lih khaing haktiex Ejiptux, yix ot tin ka daux Kadeshax, pa mawh veng pa koe ka sinax mee haktiex maix.
17 “Yuh bwan son kieh yix tiang ka daux haktiex maix. Yix tak ang tiang ka daux kaung daux sipeem plix siiet mai yix tak ang nyaux rawm khaing rawm daux pex, yix tak sang lawng hu krax ting cie simiang, yix tak ang veh plak dawm, plak gwiex, tom sidah tiang yix ka daux haktiex pa kwang maix.”
18 Khaix an simiang Edom ah nin ka nawh, “Pex tak ang pon tiang haktiex aux, phan pex yuh nan, aux tak lih tiebtie pex ka vaig.”
19 Pui Isarelax ah nin ka nawh, “Yix tak hoek krax ting, phan yix mai to brie yix nyaux ka rawm pex, yix tak tawx ngawh son an, kieh ngie yix tiang ti hu ka caong tix nong nong, yix tak ang yuh tidtix ka tang ceu.”
20 Nawh ah nin, “Pex tak ang pon ti tiang.” Pui Edom hoek ti puing kix tom nie tau mai riang rao kru naing pa ting.
21 Pui Edom thiang pui Isarelax ka mee haktiex tix, mawh kheu nan pui Isarelax veeh ti hu singai khaing nawh heue.
Grawng Yum Arun
22 Cub pui hun Isarelax khawmuik, lih hu khaing Kadeshax mai hoek ka gawng Hawrax.
23 Simiang Siyiex krai ah nin ka Mose mai Arun ka piang gawng Hawrax hawt mee haktiex Edom.
24 “Arun tak hu ka dee khrawm pui ceu nawh khankix paox ti, mawh kheu nawh tak ang pon ti laig ka daux haktiex pa tawx Aux ka pui Isarelax, kheu hoik tieh feen kiex ka gumlox Aux hawt rawm Meribax.
25 Kok Arun mai kawn simex nawh Eliza, viex kiex haok ka piang gawng Hawrax,
26 mai peeik kraung ceep Arun mai ceep an ka piang kawn simex nawh Eliza, Arun yum mai hu ka dee khrawm paox ru nawh khankix heue.”
27 Mose yuh ceu an awm lox pa tawm Simiang Siyiex, mai kix haok ka piang gawng Hawrax, ka plak sivoe ngai cub pui hun.
28 Mose peeik kraung ceep Arun mai ceep ka piang kawn simex nawh Eliza, Arun yum ka piang choek gawngRef 20:28 Si 33:38; Pi 10:6. tan Khaix an Mose mai Eliza deeh lih khaing piang gawng.
29 Yam yaox pui hun khankix hoik yum Arun, nyiex ma ceu pui Isarelax khawmuik, yiem doe son Arun tixngoe ngaix heue.