19
Been Pa Dex Dawd Pa Singax
1 Simiang Siyiex ah nin ka Mose mai Arun,
2 “In mawh been lox jhawm prawng pa tawm Simiang Siyiex mai krai ka pui Isarelax khankix, sonsang viex kix kawn mawie shiang raoh pa loig tix mu, pa ang preeh mai pa ang sax sau iak ka piang.
3 Maix tak tawx an ka Eliza cao giex kaing li, sonsang teei an lih ka plak praix nyiex gox bang mai pah mawie an sivoe nawh,
4 Eliza cao giex kaing li, tak teei nham tiblah ka gien taix ti mai phruah nham an aliah bawg sivoe nyiex gox bwan man bang kum.
5 Tak gleeing kawn mawie shiang an ka plak sivoe ngai cao giex kaing li mai gleeing hak, nex, nham tau mai roing khawmuik.
6 Cao giex kaing li teei khaox Akashax mai rao imkrim, man raoh rawt mai taing an khankix ka daux sigreung ngu pa gleeing ka mawie shiang an.
7 Khaix an cao giex kaing li tak sidaux kraung mai heem tokaux ti ka daux rawm, khaix an nawh tak laig ka daux nyiex gox bang mai cao giex kaing li tak mawh pa ang singax tom hoek plakbo.
8 Kaw pa gleeing ka an, tak sidaux kraung mai heem tokaux tix, ka daux rawm mai nawh tak mawh pa ang singax tom hoek plakbo.
9 Kieh pui pa singax kaux khrawm ka nyaox kawn mawie shiang an khankix mai priex an ka plak praix nyiex bang ka dee pa singax, mai kix tak priex an son pui hun Isarelax, sonsang shiao rawm an kieh kix singax khaing phimap.Ref 19:9 He 9:13.
10 Pui pa khrawm nyaox kawn mawie shiang an, tak sidaux kraung tix mai nawh tak mawh pa ang singax tom hoek plakbo, an tak mawh gumlox beenli leeing ju son pui Isarelax mai son nyo sinie pa hoek peung ka daux sinax kix.
11 Kaw pa hu teeh ka tokaux pui yum tix kaux kaux, tak mawh pa ang singax aliah singaix,
12 Yam hoek daux loe ngaix tix ngaix mai daux aliah ngaix tix ngaix nawh tak kieh tokaux tix singax ka rawm an, phan nawh ang kieh tokaux tix singax yam hoek daux loe singaix mai daux aliah singaix tix ngaix nawh tak mawh pa ang singax.
13 Pui hu teeh ka tokaux pui yum tix kaux kaux mai ang kieh tokaux ti singax, nawh mawh pa kieh nyiex gox bwan man Simiang Siyiex seeing brai mai tak teei ti tik kaw an khaing pui Isarelax, mawh kheu ang phruah rawm pa kieh singax ka tokaux tix, pa ang singax kawn koe ka piang nawh.
14 “In mawh been lox tat jhawm prawng yam yum pui ka daux nyiex bang. Can pui pa laig ka daux nyiex bang ku kaux mai can pui pa ot ka daux nyiex bang ku kaux tak mawh pa ang singax ka daux aliah singaix,
15 mai aw pa ang tawb ti deuh ku mu, tak mawh pa ang singax.
16 Can pui pa ot plak praix daux kaung khankix, pa hu teeh ka pui pa yum ka vaig ang ah, yum ka jhawm saux ang ah, si-ang pui yum ang ah, simeeig ang ah, tak ang singax aliah singaix.
17 Son kaw pa ang singax an, kix tak teei nyaox kawn mawie shiang pa hoik gleeing tiblah sonsang kieh phimap kix singax, sau tau mai rawm klawng pa lih hu ka piang an ka daux aw,
18 Pui pa singax tak teei rao imkrim mai cub ka daux rawm, phruah nawh ka piang nyiex gox bang mai ka piang kraung khrai mai ka piang pui pa ot baoh tan mai ka piang pui pa hu teeh ka si-ang pui yum mai pa yum ka pah pui mai pa yum ka jhawm saux mai ka piang pui pa teeh ka simeeig,
19 Pui pa singax tak phruah ka piang pui pa ang singax daux loe singaix mai daux aliah singaix, yam hoek daux singaix aliah, nawh yuh tokaux tix singax, tak sidaux kraung tix mai heem tix ka rawm, yam hoek plakbo, nawh tak mawh pa singax.
20 “Pui pa ang singax phan ang nyang yuh tokaux tix singax, tak teei ti tik kaw an khaing sinax pui hun, mawh kheu hoik yuh nawh dee pa singax Simiang Siyiex seeing brai, jao ang nawh phruah rawm pa kieh singax ka piang tokaux tix, nawh ang singax.
21 An tak mawh pingnyap son kix leeing ju. Pui pa phruah rawm singax kawx, tak yaox ti sidaux kraung tix, mai pui pa hu teeh ka rawm singax an, tak mawh pa ang singax tom hoek plakbo.
22 Can ceu pa hu teeh pui pa ang singax an tak mawh pa ang singax, mai pui pa hu teeh ka ceu an, tak mawh pa ang singax tom hoek plakbo heue.”