18
Beeh Glawm Lewix
1 Simiang Siyiex ah nin ka Arun, “Maix mai kawn simex maix khawm nyiex ma keeing maix pa ot tau mai maix, tak yaox ti klawm phimap pa dex dee pa singax singeh, maix mai kawn simex pa ot tau mai maix khankix, tak yaox ti klawm phimap grawng pa yuh cao giex kaing li.
2 Viex puxaik maix khanix, pa mawh doeh ru pui Lewix mai doeh ru keeing maix hoek ka maix, sonsang kleuk kix tix tau mai maix mai yuh kaing jhaw tau mai maix, yam ot maix mai kawn simex maix khankix sivoe nyiex gox bwan man teug sijax mukheu.
3 Kix tak yuh can ceu pa lo maix mai can ceu pa lo son nyiex gox bwan man khankix. Kix tak ang pon ti hoek dex kraung khrai dee singax singeh ka khu dee tan, phan ang mawh nan kix mai maix tak yum.
4 Kix tak kleuk tix tau mai maix mai yuh kaing jhaw nyiex gox bwan man bang kum, son kaing jhaw nyiex gox bwan man khawmuik mai pui tang kaux tak ang pon ti hoek dex pex.
5 Maix tak yaox ti teei beeh glawm priex dee pa singax mai beeh glawm khu dee tan, son ang pa song rhawm lai sang baox lih ka piang pui Isarelax.
6 Jhak heue, tokaux cao Aux hoik teei puxaik maix khankix, ceu pui Lewix khaing daux sinax pui Isarelax, kix mawh totaix pa hoik tawx Simiang Siyiex ka maix, sonsang yuh kix kaing jhaw nyiex gox bwan man bang kum.
7 Maix mai kawn simex maix khankix, tak yuh kaing jhaw beeh glawm cao giex kaing li pa dex mai khu dee tan khawmuik mai pa koe plak daux man tie, maix tak yuh kaing jhaw an. Aux tawx totaix ara cao giex kaing li ka maix mai pui tang kaux pa hoek dex tak pah yum heue.
8 Siyiex ah nin ka Arun, “Jhak heue, khaing daux can pa hoik tan pui Isarelax ka aux pa hoik kieh singax khawmuik aux tak ap ka daux taix maix son sang mawh son maix mai kawn simex maix Aux tom tawx ka lox pinyap leeing ju heue.
Krax Tan Son Cao Giex Kaing Li
9 In tak mawh cie maix ka daux pa kied singax singeh khaing pa ang nyang gleeing ka ngu, krax tan kix kuceu pa mawh krax tan phawng nghox ca im mai krax tan pa pluat ploi phimap, krax tan pa lud ka Siyiex, pa mawh krax tan kix ka Aux, tak mawh pa kied singax son maix mai ka kawn simex maix khankix.
10 Maix tak ih an khankix ka dee pa kied singax singeh, simex ku kaux tak ih ka an, an tak mawh pa singax ka son pex.
11 In baox mawh cie maix. Krax tan pa yaog khaing daux totaix kix, tau mai krax tan pa yang yeuh cie kawn praix Isarelax khankix, Aux tak tawx an khankix, son maix khawm son kawn simex kawn bun maix, pa koe tau mai maix, awm beenli pingnyap leeing ju, pui pa singax singeh ku kaux khaing daux nyiex ma maix, tak pon ti ih.
12 Khaing daux bee pa mhawm khawmuik mai khaing daux rawm plix siiet pa mhawm khawmuik mai khaing nghox ca khankix mai plix khaox pa liang ti pon pa tawx kix ka Simiang Siyiex, Aux hoik tawx ka maix.
13 Plix khaox pa liang ti teem khaing daux haktiex kix khawmuik, pa viex kix hoek ka Simiang Siyiex, tak mawh cie maix, pui pa singax singeh khaing daux nyiex ma maix ku kaux, tak pon ti ih.
14 Can ceu pa hoik tiextu kix tix tan, Ref 18:14 Krub 27:28. ka daux ceu pui Isarelax khankix, tak mawh cie maix.
15 Can ceu pa liang ti keh khaing daux khawmuik pui ang ah, to brie ang ah, pa tan kix ka Simiang Siyiex, tak mawh cie maix, viang mawh nan, kawn Ai plix num pa keh khaing pui maix tak deeh taoh ka mai to brie pa liang ti keh pa ang singax khankix kawx maix tak deeh taoh ka.
16 Yam hoik naog ju kix tix khix maix caw ti deeh taoh ka kix, awm pa hoik tat maix jum ka mau shekhe phwan plah, pa koe dee pa singax, pa sidu ngai jiang ka mau tix shekhe mawh tixnga Kerax.
17 Viang mawh nan kawn mawie pa liang ti keh ang ah, yung pa liang tix keh ang ah, kawn pex pa liang ti keh ang ah maix tak ang pon ti deeh taoh, an khankix mawh pa singax. Maix tak phruah nham kix ka piang khu dee tan mai gleeing khlawp bee khankix son krax tan pa gleeing ka ngu pa sioe bhawng pa khaw rhawm Simiang Siyiex,
18 nex nawh khankix tak mawh cie maix, nex eek pa yang yeuh mai ba dawm tak mawh cie maix.
19 Krax tan pa singax singeh pa viex pui Isarelax ka Simiang Siyiex khawmuik, Aux hoik tawx ka maix, ka kawn simex, kawn bun pa ot tau mai maix, awm beenli pingnyap leeing ju. An mawh sijax mukheu pa hoik tiag ti awm kih, ka plak sivoe Simiang Siyiex mai ka son maix mai son doeh ru maix leeing ju.
20 Simiang Siyiex ah nin ka Arun, “Maix tak ang pon ti koe sinngao ka daux haktiex kix maix tak ang pon ti koe nyum khaing sinax kix. Aux mawh son plak cie maix mai sinngao cie maix khaing sinax pui Isarelax heue.
Kao Son tix Son Ka Lewix
21 “Aux hoik tawx sinngao cie pui Isarelax kao son tix sonRef 18:21 Krub 27:30-33; Pi 14:22-29. ka ceu pui Lewix, sonsang pon yuh kix kaing jhaw, ka daux nyiex gox bwan man bang kum.
22 Jah yam in pui Isarelax khankix, tak ang pon ti hoek dex nyiex gox bwan man bang kum, phan ang mawh nan tak yaox ti kham ka phimap tix mai yum ka heue.
23 Viang mawh nan ceu pui Lewix khankix, tak yuh kaing jhaw nyiex gox bwan man bang kum mai kix tak yaox ti kham ka phimap cao tix. An tak mawh lox pingnyap leeing ju, tom sidah hoek doeh ru pex, kix tak ang yaox ti pon sinngao ka daux sinax pui Isarelax.
24 Mawh kheu krax tan pui Isarelax kao son tix son, pa viex kix ti tan ka Simiang Siyiex, Aux hoik tawx ka ceu pui Lewix son sang mawh sinngao kix, kix tak ang pon ti koe sinngao ka sinax pui Isarelax heue.
Kao Son tix Son Cie Pui Lewix
25 Simiang Siyiex krai ah nin ka Mose,
26 “Krai ah nin ka ceu pui Lewix, yam teei maix krax tan kao son tix son khaing pui Isarelax mai pa hoik tawx Aux mawh sinngao pa sang pon maix khaix kix, khaing ka daux an kao son tix son maix tak tan ka Simiang Siyiex.
27 Krax tan pa tan maix, maix tak caw ti deuh mawh awm krax tan simie nghox ca pa kaoh khaing daux glah mai rawm plix siiet pa hoik pon ti khaing dee biiet rawm plix siiet.
28 Awm an maix tak tan kao son tix son khaing daux pa koe tix ka Siyiex, khaing kao son pa pon maix ka pui Isarelax, khaing daux an maix tak tan ka Simiang Siyiex ka Arun cao giex kaing li.
29 Khaing daux krax tan pa pon pex khankix, laug nyum pa nie mhawm mai pa singax khaing ka daux kuceu mai tan ka Simiang Siyiex.
30 Mawh kheu nan maix ah nin ka pui Lewix, yam laug pex tix tan pa kied mhawm khaing daux an, pa kawn deuk khankix tak simin tix tawx ka ceu pui Lewix, awm pa pon ti khaing glah nghox mai awm rawm plix siiet pa pon ti khaing dee biiet rawm plix siiet,
31 Maix mai kawn nyiex ma maix khawmuik tak pon ti ih an, kudah, mawh kheu an mawh totaix pa tawx Aux son kaing jhaw pa yuh maix daux nyiex gox bwan man bang kum.
32 Khaix hoik tan maix ceu pa kied mhawm khaing daux an maix tak ang yaox ti kham geu phimap mai maix tak ang pon ti kieh krax tan pa singax singeh khaing pui Isarelax seeing brai, phan ang mawh nan maix tak yum heue.”