19
Pa Tik Mex Moeng
(Mak 10:1-12)
1 Khaix hoik sidiex Yesux lox ceu an khankix, Nawh Cao lih hu khaing meung Galilie mai hoek ka daux haktiex Yudax plak toi rawm Yawdan heue.
2 Cub pui hun khankix hawt Nawh Cao mai Nawh cox jhawm saux kix moi tan heue.
3 Pharishie khankix hoek ka Nawh Cao sonsang cheuk ti yaox rhawm Nawh mai chawk ah nin, “Phan pui tix kaux tik moeng tix kheu grawng tix ceu ceu, khaw ka been lie?”
4 Nawh Cao pawk lox ah nin, “Ang pex sax phat grawng Kaw pa yuh kix yam jah, yuh kix mawh simex mai sibun,
5 “Mawh kheu in simex tak prah miex keeing tix mai ot tau mai moeng tix mai kiex ra kaux tak mawh nex nham tix mu khaing,
6 Mawh kheu in, kiex ang lai mawh ra kaux, viang mawh nan mawh nex nham tix kaux khaing heue. Mawh kheu in, pa hoik kleuk Siyiex tau, paw kieh pui tix kaux kawx yieh laux heue.”
7 Kix ah nin ka Nawh Cao, “Phan mawh nan Mose chix tawx lox kieh tawx lai grawng pa hoik hoik lox mai tik ka bun?”Ref 19:9 Sidex 24:1-4; Mat 5:31
8 Nawh Cao baox ah nin ka kix, “Mawh kheu kiien rhawm pex Mose tom kieh pex tik moeng tix heue, viang mawh nan yam jah ang mawh nan.
9 Aux krai ka pex, pui mawx ang ah phan nawh tik moeng tix lheu khaing grawng pa lut pa vao nawh mai teei ti moeng tang kaux, nawh hoik lut vao heue. Kaw pa teei ti moeng bun pa hoik tik an, nawh hoik lut vao heue.”
10 Kawncau khankix ah nin ka Nawh Cao, “Phan grawng ceu in lih mawh ka simex mai moeng, ang khaw teei ti moeng heue.”
11 Nawh Cao ah nin ka kix, “Pui khawmuik ang pon rieb ti teei ka lox in, viang mawh nan mawh pui pa hoik pon akhwang khaing pa pon rieb ti teei heue.
12 Kheu koe pa mawh pui sieh tom yam keh khaing daux vaig miex tix mai koe pui sieh pa hoik yuh kieh mawh pui sieh mai koe pui sieh pa hoik yuh tokaux tix mawh pui sieh son meung raoma heue. Kaw pa chix rieb ti teei kieh nawh rieb ti teei heue.”
Nawb Bwan Ka Kawn Iak
(Mak 10:13-16; Luk 18:15-17)
13 Yam an kix viex kawn nyawm iak khankix hoek ka Nawh Cao, sonsang deuh Nawh taix tix piang kix mai rawg bwan heue. Viang mawh nan, kawncau khankix ah ka pui khankix heue.
14 Yesux ah nin, “Kieh kawn nyawm iak khankix hoek ka Aux, paw sidien kix, kheu meung raoma mawh cie pa awm kix heue.”
15 Nawh Cao deuh taix tix piang kix mai lih hu khaing tan heue.
Caomi Awn Ju
(Mak 10:17-31; Luk 18:18-30)
16 Khaix an, pui tix kaux hoek ka Nawh Cao ah nin, “Sara cao gau eue, sonsang pon aux ju leeing ju, aux tak yuh pa mhawm, ceu pa yuh ka mawx lie?”
17 Nawh Cao ah nin ka nawh, “Yuh ka mawh maix lai chawk aux ka grawng ceu pa mhawm lie? Pa mhawm koe tix kaux khaing, viang mawh nan, phan maix simie ti laig ka daux pa im ju, priex ti hawt gumlox pingnyap khankix heue.”
18 Kaw an baox ah nin ka Nawh Cao, “Pingnyap pa yuh ka mawx?” Yesux ah nin, “Paw pah pui yum,Ref 19:18 Lih 20:13; Pi 5:17. paw lut vao,Ref 19:18 Lih 20:14; Pi 5:18. paw briexRef 19:18 Lih 20:15; Pi 5.19. mai paw kham mhai rug pa ang mawh ang meh,Ref 19:18 Lih 20:16; Pi 5:20.
19 yungyi ka miex keeing tix, moh paox plawg paox nyhawm tix awm moh maix ka tokaux tix heue.”
20 Pui awn ju an baox ah nin ka Nawh Cao, “Aux hoik hawt yuh ceu in khankix khawmuik heue. Aux kawn cha ceu patix?”
21 Yesux baoh ah nin ka nawh, “Phan maix simie ti grum naog, hu coh ceu pa koe maix, tawx ka pui hot sibhawm khankix mai maix tak koe sin ngao ka daux meung raoma. Hoek heue, hawt khaix Aux heue.”
22 Viang mawh nan yam mhong pui awn ju an lox an, nawh khi rhawm mai lih hu heue. Kheu mawh nawh pui pa koe kraung khrai tom nie heue.
23 Yesux ah nin ka kawncau Nawh khankix, “Aux krai lox tete ka pex, pui pa mawh cao mi, nu ti laig ka daux meung raoma heue.
24 Aux baox krai ka pex, laig kala-uk daux kre nyex nie lheu yie khaing laig cao mi ka daux meung Siyiex heue.”
25 Yam mhong kawncau Nawh khankix ka lox an, kix kied daox deng kah ah nin, “Phan mawh nan, pui mawx tak sang pon hoek krax taoh?”
26 Yesux jhak kix ah nin, “Grawng in kawn pui ang chix yuh, viang mawh nan Siyiex chix yuh kuceu khawmuik heue.”
Totaix Pa Sang Pon Kawncau
27 Yam an Petrux pawk lox mai ah nin ka Nawh Cao, “Ex hoik prah pa koe tix khawmuik mai hawt khaix Maix. Mawh kheu nan ex tak pon ceu patix?”
28 Yesux baoh ah nin ka kix, “Aux krai lox tete ka pex, pex pa hoik hawt khaix Aux khankix, ka daux haktiex pa khraox, yam tak ngawm Kawn kawn pui piang dang ngeung min plakngai Nawh, pex kawx, tak sang ngawm piang dang ngeung kao ra mu mai prawng ka pui Isarelax kao ra ceu heue.
29 Pui mawx ang ah pa hoik prah grham nyiex nawh, puxaik nawh, nan nawh, keeing nawh, miex nawh, kawn praix nawh, ma kaung nawh khankix, kheu ceu kaux Aux, tak sang pon bwanson tix yieh son mai sinngao ju leeing ju heue.
30 Pui pa dha khaix tom nie tak ot ka mai pui pa ot ka tom nie tak dha khaix heue.”Ref 19:30 Mat 20:16, Luk 13:30