20
Pui Yuh Sipeem Plix Siiet
1 Meung raoma awm cao sipeem tix kaux, pa lih hu ponngawb caocao, sonsang sawg pui cang pui yuh kaing ka daux sipeem plix siiet tix heue.
2 Khaix hoik khaw rhawm ka mau ngawh riang son tix ngaix tix plah denari, nawh ploi kix hu ka sipeem plix siiet tix heue.
3 Nawh baox lih hu bawg loe taix mai nawh yaox pui tang kaux khankix pa ang yuh tid tix cung ka daux lah heue.
4 Nawh ah nin ka kix, “Pex kawx hu ka daux sipeem plix siiet mai khaw tix tawx miex ding aux tak tawx ka pex” Kix kawx hu heue.
5 Yam hoek koe been 6 taix mai dim taix nawh deeh baox lih hu mai yuh awm phao ka heue.
6 Yam koe kao tix taix nawh baox lih hu mai yaox pui tang kaux khankix cung, nawh baox ah nin ka kix, “Kheu pa tix pex lai cung, ang pex yuh tid tix leeing lang singaix lie?”
7 Kix deeh ah nin ka nawh, Mawh kheu pui tix kaux kawx ang cang yix. Nawh ah nin ka kix, Pex kawx hu ka daux sipeem plix siiet heue.
8 Yam hoek ponbo, cao sipeem plix siiet ah nin ka kaw pa jhak ka kaing nawh, Kok pui pa yuh kaing khankix mai tawx riang kix, jah ka pui pa hoek ti yuh dha khaix, tom hoek ka pui pa yuh phao ka heue.
9 Yam hoek pui pa cang bawg yam kao tix taix, kix ku kaux pon denari tix kaux tix plah heue.
10 Yam hoek pui pa yuh phao ka paox tix, kix ce ti sang nie lheu pon nie khaing paox tix, viang mawh nan, kix ku kaux kawx pon denari tix kaux tix plah heue.
11 Yam hoik pon kix yuh nan, kix sibriem ka cao sipeem,
12 Ah nin, Pa hoek yuh khaix khankix tak yuh tix taix ngie khaing maix hoik tawx ka kix situ awm yix pa hoik yuh kaing leeing lang singaix mai kham geu pa kied hax koek.
13 Viang mawh nan, nawh baox pawk lox ah nin ka kix tix kaux, Paox grawm eue, aux ang yuh pa ang khaw ka maix tix ceu kawx maix hoik khaw rhawm ka ngawh riang pa tat son denari tix plah ang mawh lie?
14 Teei pa khaw maix ti pon mai hu heue. Mawh Aux pa koe rhawm ti tawx ka pui pa dha khaix awm pa hoik tawx aux ka maix.
15 Aux ang koe akhwang ti laug yuh ka ceu pa shiang ka aux lie? Phan ang mawh nan boh rhawm maix kheu mhawm rhawm aux lie?
16 Kheu nan pa dha khaix tak ot ka mai pa ot ka, tak dha khaix heue. Viang pa kok koe tom nie kawx, pa laug ti teei kied tux heue.”
Krax Kham Geu Mai Pa Deeh Kaoh Im
(Mak 10:32-34; Luk 18:31-34)
17 Yam haok hu Yesux ka veng Yerusaliem, Nawh Cao teei kawncau tix kao ra kaux, hu dee ang pui ot mai yam hu kix krax Nawh ah nin ka kix,
18 “Ex tak sang haok hu ka veng Yerusaliem mai tak sang teei ti tawx Kawn kawn pui ka cao giex kaing li pa ting khankix mai pui pa tiiem lai khankix mai kix tak sang prawng ca kieh Nawh yum heue.
19 Tawx Nawh ka pui tang ceu khankix, sonsang yuh kix pa ang cee mai sivied Nawh mai tawk Nawh yum piang khaox lhak mai daux loe ngaix tix ngaix Nawh tak sang deeh kaoh im heue.”
Pa Rawg Miex Son Kawn
(Mak 10:35-45)
20 Yam an miex kawn Zebedie hoek tau mai kawn kiex khankix ka Nawh Cao, grux ngawng sivoe Nawh mai rawg tix ceu ka Nawh Cao heue.
21 Nawh Cao ah nin ka kiex, “Lo maix ceu pa tix?” Kiex deeh ah nin ka Nawh Cao, “Tawx lox kieh kawn aux ra kaux in ngawm plak taix khawn dawm Maix tix kaux mai plak taix khawn gwiex maix tix kaux daux meung Maix liak.”
22 Viang mawh nan Yesux pawk lox ah nin “Pex ang tawng ka ceu pa rawg pex. Pex chix nyaux ka kawk pa nyaux Aux lie?” Kix baox ah nin ka Nawh Cao, “Chix tix heue.”
23 Nawh Cao baox ah nin ka kix, “Kawk pa nyaux Aux, pex tak sang nyaux tete, viang mawh nan pa ngawm plak taix khawn dawm Aux mai plak taix khawn gwiex Aux, ang mawh cie pa chix Aux ti tawx, viang mawh nan mawh pa hoik cox khre Keeing Aux son pui khankix heue.”
24 Yam mhong kawncau Nawh kao kaux ka grawng ceu an, kix song rhawm ka puxaik an ra kaux heue.
25 Viang mawh nan Yesux kok kix hoek ka tix ah nin, Pex tawng grawng pa ot simiang cao kwang pa mawh pui tang ceu khankix piang kix mai pui pa ting khankix, koe sibrawm piang kix heue.
26 Ka daux pex tak ang mawh nan, pui mawx mie ti mawh pa ting, caw ti mawh kawncau pex heue.
27 Ka daux pex, pui mawx pa simie ti mawh pa ting, caw ti mawh siliex pex heue.
28 Awm Kawn kawn pui hoek sonsang kieh pui yuh son tix ang mawh, hoek sonsang yuh son pui mai tawx ju tix, kieh mawh ngawh riang pa taoh son pui khankix heue.”
Pai Pui Dug Moi Ra Kaux
(Mak 10:46-52; Luk 18:35-43)
29 Yam lih hu kix khaing veng Yerikho cub pui hun hawt khaix Nawh Cao heue.
30 Jhak heue, pui dug ngai ra kaux ngawm dex krax mai yam mhong kiex grawng hu Yesux praok kiex, kiex kok yo ah nin, “Simiang kawn Davit eue, caux rhawm ka yiex liak.”
31 Cub pui hun ah ka kiex, nhie kiex yawg tix, viang mawh nan kiex nie kok yo ah nin, “Simiang kawn Davit eue, caux rhawm ka yiex liak.”
32 Yesux cung kaog mai kok kiex ah nin, “Pax sang kieh Aux yuh ceu patix ka pax?”
33 Kiex ah nin ka Nawh Cao, “Simiang eue, yuh ngai yiex kieh blah liak.”
34 Yesux caux rhawm, teeh ngai kiex, dom mawx dom an kiex deeh chix yaox mai hawt khaix Nawh Cao heue.