18
Pui Mawx Pa Ting
(Mak 9:33-37; Luk 9:46-48)
1 Daux bawg yam nari an kawncau khankix hoek ka Yesux, chawk ah nin, “Pui mawx pa nie ting khaing paox tix daux meung raoma?”
2 Nawh Cao kok kawn nyawm iak tix kaux deuh sinax kix,
3 ah nin, “Aux krai lox tete ka pex, tom ang pex deeh tieh loh ti mawh awm kawn nyawm iak khankix, pex ang tau ti pon laig ka dau meung raoma heue.
4 Pui mawx ang ah, pa kieh rhawm tix awn awm kawn nyawm iak in, mawh pa nie lheu ting khaing paox tix ka daux meung raoma heue.
5 Pui mawx ang ah, pa rieb ti teei kawn nyawm iak pa awm in ka daux ceu kaux Aux, rieb ti teei Aux heue.”
Pui Yuh Pa Sideeing
(Mak 9:42-48; Luk 17:1-2)
6 Viang mawh nan pui mawx ang ah, pa kieh kawn nyawm iak khankix pa yum rhawm ka Aux tix kaux kaux sideeing caong tix, ka kaw an, phan preue simaox mhaw pa ting ka ngawg nawh mai teei nawh cub daux rawm sigrit sigra dee raux, mawh pa nie mhawm heue.
7 “Haktiex in tak kha rhawm heue, kheu koe dee sideeing caong khankix. Dee sideeing caong khankix tak sang hoek, viang mawh nan, pui pa yuh dee sideeing caong tak kha rhawm heue.
8 Phan taix maix, caong maix, kieh maix sideeing, kid ti tik khaing maix heue. Laux taix caong maix mai laig ka daux pa im ju mhawm khaing koe taix caong maix ra khawn mai laig ka daux ngu leeing ju heue.
9 Phan ngai maix kieh maix sideeing tix, koh ti tik khaing maix. Koe ngai maix tix khawn mai laig ka daux pa im ju, mhawm khaing koe ngai maix ra khawn taing ti sau daux ngu mawnarhok heue.”
Yung Pa Grai
(Luk 15:3-7)
10 “Rien rhawm tix paw nieb pon yuh ka kawn nyawm iak khankix tix kaux kawx, grawh grawng nawh, Aux krai ka pex, daux raoma kawncau Siyiex cie kix tak yaox pakngai pak baoh Keeing Aux pa ot ka daux meung raoma jheung jheung heue.
11 Mawh kheu Kawn kawn pui hoek ti taoh ka pui pa grai khankix heue.
12 Pex keud yuh ka mawx? Phan pui tix kaux kaux koe yung tix yieh mai yung tix mu hoik lud krax mai grai, nawh prah pa kawn koe tixdim dim mu piang gawng mai hu sawg yung pa hoik lud krax pa grai an ang mawh lie?
13 Aux krai lox tete ka pex, phan nawh hoik yaox, nawh nie lheu gaux rhawm ka grawng yung an, khaing yung pa ang grai tixdim dim mu heue.
14 Awm an Keeing pex pa ot ka daux meung raoma, ang koe alo ti kieh kawn nyawm iak an khankix laux leeing tix kaux kawx heue.”
Pux Aik Yuh Phimap
15 “Phan puxaik maix lut ka maix, hu jhi nawh yaox dee lut yam ot pax nong nong ngie, phan nawh nghiet ka lox maix, maix hoik pon puxaik maix heue.
16 Viang mawh nan, phan nawh ang nghiet ka lox maix, baox viex pui tix kaux ra kaux hu mai maix, yuh ka mawx sonsang mawh mhai rug pa kaux cong ra kaux phan ang mawh nan, loe kaux ka lox pa krai ku gum heue.
17 Phan nawh thiang mai ang cu ti nghiet lox kix, krai ceu cao mhong, phan nawh ca thiang mai ang cu ti nghiet lox ceu cao, kieh nawh mawh ka maix awm pui tang ceu mai pui koh mau heue.
18 Aux krai lox tete ka pex, ceu pa tiebtie pex patix ang ah piang haktiex in, tak sang tiebtie ka daux meung raoma mai ceu pa kah pex patix ang ah piang haktiex in, tak sang kah daux meung raoma heue.
19 Aux deeh krai ka pex, phan kiex ra kaux ih rhawm paox tix piang haktiex in, ka grawng pa rawg kiex tix ceu ceu, Keeing Aux pa ot daux meung raoma tak yuh son kiex heue.
20 Mawh kheu ka dee khrawm pui ra loe kaux, ka daux ceu kaux Aux, Aux tak ot sinax kix heue.”
Pluat Map Atixgliah Aliah Bawg
21 Yam an Petrux hoek mai ah nin ka Nawh Cao, “Simiang eue, sang caw aux ti pluat ka phimap pa lud puxaik aux miex bawg lie? Tom sidah aliah bawg lie?”
22 Yesux ah nin ka nawh, “Aux ang krai ka maix tom sidah aliah bawg, Aux krai tom sidah hoek atixgliah aliah bawg heue.
23 Mawh kheu nan meung raoma awm simiang ting tix kaux, pa sang sawn carang mau mai siliex nawh khankix heue.
24 Yam jah nawh ti sawn carang, kaw pa ceuk talantan tix mheen hoek ka nawh heue.
25 Viang mawh nan kheu kaw an ang pon tawx ceuk, simiang nawh nhie kix coh nawh mai moeng nawh mai kawn nawh khankix mai can pa koe nawh khawmuik, sonsang tawx ceuk ka nawh heue.
26 Mawh kheu nan siliex an grux ti krub nawh ah nin, “Simiang eue, Gun yeung piang aux liak mai aux tak sang deeh tawx ka maix khawmuik.”
27 Simiang siliex an caux rhawm ka kaw an mai ploi nawh mai pluat ceuk nawh khawmuik heue.
28 Viang mawh nan siliex an lih hu mai yaox paox siliex tix, tix kaux pa koe ceuk ka nawh denari tix yieh mai nawh giex nyhup ti kloeg ghok nawh ah nin, “Tawx pa ceuk maix ka aux.”
29 Mawh kheu nan paox siliex nawh grux ti krub ka nawh mai khyox khaw ah nin, “Gun yeung ka aux liak, aux tak sang deeh tawx ka maix heue.”
30 Viang mawh nan nawh ang nghiet, teei nawh sau daux thawng tom sidah hoik tawx nawh ceuk tix khawmuik heue.
31 Mawh kheu nan yam yaox paox siliex tang kaux khankix ka grawng pa yuh nawh, kix kied caux rhawm ka mai kix hoek ti krai simiang kix mhong grawng pa yuh kaw an khawmuik heue.
32 Yam an Simiang kok nawh hoek ka tix ah nin, Siliex pa caox eue, aux hoik pluat ceuk maix khawmuik, mawh kheu khyox khaw maix ka aux heue.
33 Maix khaw ti caux rhawm ka paox siliex tix, awm hoik caux rhawm aux ka maix lie?
34 Simiang nawh song rhawm mai tawx nawh ka tawm taix pui pa kieh kham geu, tom sidah hoik tawx nawh ceuk tix khawmuik heue.
35 Phan pex ku kaux ang pluat phimap puxaik tix, khaing daux rhawm pex awm an Keeing Aux piang raoma kawx tak sang yuh nan ka pex heue.”