17
Tokaux Yesux Loh Tix
(Mak 9:2-13; Luk 9:28-36)
1 Khaix an liah ngaix, Yesux kok Petrux, Yakop mai Yohan pa mawh pux Yakop mai thong kix haok piang gawng lhaong dee ang pui ot, dee yien yawg,
2 tokaux Nawh Cao loh tix sivoe kix tan mai pakngai Nawh jhan riang awm singaix mai kraung ceep Nawh lih paing awm pa riang heue.
3 Khaix an, kix yaox Eliyax hoek tau mai Mose kiex sikah mai Nawh Cao heue.
4 Petrux ah nin ka Yesux, “Simiang eue, phan ex ot tin mhawm son ex heue. Phan Maix koe rhawm, aux tak yuh nyiex bang tin loe lhang. Son Maix tix lhang, son Mose tix lhang mai son Eliyax tix lhang heue.”
5 Yam kawn sikah nawh, dom mawx dom an paiawm pa riang hoek ti kheem veei piang kix mai jhak heue, lox lih khaing daux paiawm an ah nin, “In mawh Kawn pa moh Aux, pa khaw caw rhawm Aux heue, nghiet ka Nawh heue.”
6 Yam mhong kawncau khankix ka lox an, kix kied lhat mai goh gup piang tiex heue.
7 Yesux hoek ti teeh ka kix ah nin, “Kaoh heue, paw lhat kah.”
8 Yam maong kix ti jhak, kix ang yaox tix kaux kawx lheu khaing Yesux nong nong heue.
9 Yam lih hoek kix khaing gawng, Yesux tawm lox ka kix ah nin “Paw krai grawng riang susai pa hoik yaox pex ka pui tix kaux kawx, ka ang Kawn kawn pui nyang bax kaoh khaing yum.”
10 Kawncau Nawh khankix chawk Nawh Cao ah nin, “Kheu pui tiiem lai khankix ah Eliyax tak sang hoek sivoe?”
11 Nawh Cao deeh pawk lox ah nin, “Eliyax sang hoek tete mai deeh cox mhawm khawmuik heue.
12 Viang mawh nan, Aux krai ka pex, Eliyax hoik hoek mai pui ang tawng ka nawh, viang mawh nan kix hoik yuh ka nawh awm pa simie kix ti yuh heue. Awm an Kawn kawn pui tak kham geu ka daux tawm taix kix heue.”
13 Yam an kawncau khankix tawng Nawh Cao krai ka kix grawng Yohan cao cubcom heue.
Pai Pui Saux Laung Moi
(Mak 9:14-29; Luk 9:37-43)
14 Yam hoek kix dee ot cub pui hun, pui tix kaux hoek grux ngawng mai ah nin ka Nawh Cao,
15 “Simiang eue, caux rhawm ka kawn simex aux liak, kheu mawh nawh pui saux laung mai kied kham geu mai nawh goh daux ngu, daux rawm law lawx heue.
16 Aux hoik viex nawh hoek ka kawncau Maix khankix, viang mawh nan kix ang chix cox nawh moi heue.”
17 Yesux pawk lox ah nin, “Baux ju pa ang koe krax yum rhawm mai pa tieh feen eue, Aux tak kawn sang ot mai pex miex grheung lie? Aux tak kawn sang gun yeung ka pex miex grheung lie? Viex nawh hoek ka Aux,”
18 Yesux ah ka phicaox an mai phicaox an lih hu khaing nawh mai kawn simex an, moi bawg yam an tix taix nieh heue.
19 Yam an kawncau khankix hoek ka Yesux dee ang pui ot mai chawk ah nin, “Kheu ex ang pon tix grheu phicaox an lih?”
20 Nawh Cao deeh pawk lox ah nin ka kix, “Mawh kheu iak krax yum rhawm pex heue. Aux krai lox tete ka pex, phan pex koe krax yum rhawm pon mu simie sok taux klaox tix mu, pex tak ah ka gawng in, gah maix hu khaing tin ka dee an mai nawh tak gah tix heue. Pa ang pex chix yuh tak ang koe tix ceu kawx heue.
21 Viang mawh nan phicaox ceu in phan ang mawh kheu rawg bwan mai twah pa ih, ang chix ti lih heue.”
Baox Krai Sang Kham Krax Yum
(Mak 9:30-32; Luk 9:43-45)
22 Yam ot kix tau daux meung Galilie Yesux ah nin ka kix, “Bawg yam tawx Kawn kawn pui ka daux tawm taix kawn pui khankix dex sang hoek heue,
23 mai kix tak pah Nawh yum, daux loe ngaix tix ngaix, Nawh tak sang deeh kaoh im heue.” Kix kied khi rhawm ka heue.
Tawx Mau Son Nyiex Bwan
24 Yam hoek kix ka daux veng Kapeniom, pui pa koh keun nyiex bwan hoek ka Petrux ah nin, “Sara cao gau maix ang tawx mau keun nyiex bwan lie?”Ref 17:24 Lih 30:13, 38:26
25 Nawh ah nin, “Tawx heue.” Yam laig nawh daux nyiex, Yesux sikah ka nawh ah nin, “Simon eue, maix ce yuh ka mawx? Simiang haktiex khankix koh mau gha khaing pui mawx? Pon khaing kawn praix tix lie? Phan ang mawh nan pon khaing pui tang lie?”
26 Yam nawh deeh pawk lox ah nin, “Pon khaing pui tang heue.” Yesux ah nin ka nawh, “Phan mawh nan kawn praix kix pon pa luad luan heue.
27 Viang mawh nan, son ang kix lud keud ka ex. Maix hu ka rawm nhawng mai ploi myiet tix mu mai teei kax pa liang ti pon mai yam hoik vih maix jheeh nawh maix tak yaox mau tix piak3 17:27 Plak Grig mawh stater heue. heue. Teei an tawx ka kix son Aux mai son maix heue.”