14
Grawng Yum Yohan
(Mak 6:14-29; Luk 9:7-9)
1 Yam an, simiang Herut mhong pa krai pui ka grawng Yesux.
2 Mai ah nin ka kawncau nawh khankix, “In mawh Yohan cao cubcom. Nawh hoik deeh kaoh im khaing krax yum, mawh kheu nan, sibrawm khankix tom yuh kaing ka daux nawh heue.”
3 Grawh grawng nawh, Herut hoik giex Yohan mai phyawk nawh mai sau nawh ka daux thawng, kheu Herodi moeng pux nawh Philipux heue.
4 Kheu Yohan, hoik ah nin ka nawh, “Pa teei maix bun in, ang khaw ka been heue.”
5 Viang nawh simie ti pah Yohan yum kawx, nawh lhat ka pui hun, kheu hoik een kix nawh mawh cao jhai heue.
6 Viang mawh nan, yam hoek singaix keh Herut, kawn bun Herodi yuh graoh sinax kix mai jiet khaw ka rhawm Herut heue.
7 Mawh kheu nan, nawh tiextu ah nin ka bun an, maix rawg mhaing ka ceu patix ang ah aux tak sang tawx heue.
8 Bun an hawt yuh awm pa nhie miex nawh ah nin, “Tawx kaing Yohan cao cubcom ka aux tin daux tawg heue.”
9 Simiang Herut khi rhawm kah, viang mawh nan kheu lox pa hoik tiextu nawh sivoe pui pa ngawm sawm tau mai nawh khankix, nawh tom tawx lox kieh tawx heue.
10 Nawh tom kieh kid kaing Yohan ka daux thawng heue.
11 Kix viex kaing Yohan daux tawg mai tawx ka bunkrih an mai nawh viex ti tawx ka miex tix heue.
12 Kawncau Yohan khankix hoek ti teei tokaux yum Yohan mai sipaung nawh mai kix hu krai nawh ka Yesux heue.
Tawx Pui Phuan Rheng Ih
(Mak 6:30-44; Luk 9:10-17; Yo 6:1-14)
13 Yam mhong Yesux ka grawng an, Nawh Cao lih khaing tan, laig ka daux reu mai hu daux tiag dee ang pui ot, yam mhong pui hun khankix ka grawng in, kix lih khaing daux veng khankix mai hawt khaix Nawh Cao ka caong tix heue.
14 Yam lih hu Nawh Cao, Nawh yaox cub pui hun mai Nawh Cao caux rhawm ka kix mai cox pui saux khankix moi heue.
15 Yam hoek ponbo kawncau Nawh khankix hoek ka Nawh Cao ah nin, “Ka dee in mawh daux tiag mai bawg yam kawx hoik luan heue. Ploi pui hun khankix hu, sonsang hu laig ka daux yaong khankix mai liag ceu pa ih son tokaux tix heue.”
16 Viang mawh nan Yesux ah nin ka kix, “Kix ang lo ti lih hu, pex tawx kix sawm heue.”
17 Kix baox ah nin ka Nawh Cao, “Ex koe blah phwan lon mai kax iak ra mu ngie.”
18 Nawh Cao baox ah nin, “Viex khankix hoek ka Aux heue.”
19 Nawh Cao nhie pui hun khankix ngawm piang rib. Nawh Cao teei blah phwan lon mai kax ra mu an mai maong ka raoma mai Nawh Cao nawb bwan mai sivit blah tawx ka kawncau Nawh khankix mai kawncau Nawh tawx pui hun khankix ih heue.
20 Khaix hoik sak ih pui khawmuik, kix deeh khrawm ti teei pa lheu pa max pa phawng mai naog kao ra phliex heue.
21 Pui pa ih khankix, simex giex, dex koe phwan rheng kaux, ang simin ka bun mai kawn nyawm khankix heue.
Hu Piang Rawm
(Mak 6:45-52; Yo 6:15-21)
22 Dom mawx dom an, Nawh Cao nhie kawncau Nawh khankix laig daux reu mai hu sivoe Nawh plak toi rawm, yam ploi Nawh Cao cub pui hun khankix hu heue.
23 Khaix hoik ploi Nawh Cao cub pui hun khankix hu, Nawh haok ka gawng dee ang pui ot, sonsang rawg tix bwan. Yam hoek ponsawm Nawh Cao ot tan nong nong heue.
24 Yam an reu an ot sigreung rawm nhawng mai kha rhawm kheu pukpak rawm, kheu ang caw plak bhaung heue.
25 Yam hoek bawg yam pa tah pon taix, yam ponsawm, Nawh Cao hoek ka kix, ka caong tix piang rawm nhawng heue.
26 Yam yaox kawncau Nawh khankix ka pa hu Nawh Cao ka caong tix piang rawm nhawng, kix sidaing lhat ah nin, “Mawh miang heue.” Kheu lhat kix kah, kix riag yo heue.
27 Viang mawh nan dom mawx dom an, Yesux sikah mai kix, ah nin, “Gaux rhawm heue, mawh Aux, paw lhat kah”
28 Petrux pawk lox Nawh Cao ah nin, “Simiang eue, phan mawh Maix, nhie aux hoek ka Maix piang rawm liak”
29 Nawh Cao ah nin, “Hoek heue.” Petrux lih khaing daux reu mai hu piang rawm ka caong tix, ka Yesux.
30 Viang mawh nan, yam yaox nawh bhaung ting, nawh kied lhat mai jah ti laig ka daux rawm mai nawh kok yo ah nin, “Simiang eue, taoh aux liak.”
31 Dom mawx dom an, Yesux nyeu taix tix giex nawh mai ah nin ka nawh, “Maix pa iak krax yum rhawm eue, maix chix ang yum rhawm yuh ka mawx lie?”
32 Yam hoik laig kiex ka daux reu, bhaung yiien hu heue.
33 Kix pa ot ka daux reu, krub ka Nawh Cao ah nin, “Maix rug mawh Kawn Siyiex tete heue.”
Pui Pa Teeh Yesux Pon Ti Moi
(Mak 6:53-56)
34 Yam hoik tiang kix toi rawm plak an, kix hoek ka haktiex Giennesarit heue.
35 Yam hoik tawng pui pa ot tan grawng mawh Nawh Cao, kix ploi pui hu kudah dee sivie siveng tan mai kix viex pui saux hoek ka Nawh Cao khawmuik.
36 Kix khyox khaw ka Nawh Cao, sonsang pon kix ti teeh toh caong sibex Nawh mai pa teeh khankix ku kaux pon ti moi heue.