15
Been Prim Mai Pingnyap
(Mak 7:1-13)
1 Yam an Pharishie mai pui tiiem lai khankix kaoh khaing veng Yerusaliem mai hoek ka Yesux ah nin,
2 “Yuh patix kawn cau Maix yuh pa ang khaw mai been tax yiex miex keeing? Kix ang khoek taix tix, yam ih priex heue.”
3 Nawh Cao pawk lox ah nin ka kix, “Yuh patix pex chix lheu lox tawm jhawm krai Siyiex, kheu lox been prim pex lie?”
4 Kheu hoik ah Siyiex, “Yungyi ka miex keeing maix heue. Mai Kaw pa map ka miex keeing tix, tak kieh nawh yum tete heue.” Ref 15:4 Lih 20:12, 21:17; Pi 5:16; Krub 20:9
5 Viang mawh nan pex ah nin, pui mawx krai ka miex keeing tix, ceu pa hoik pon maix khaing aux, tawx ka Siyiex.
6 Kaw an tak ang yungyi ka miex keeing tix. Mawh kheu nan, pex yuh gumlox Siyiex laux kheu been pex pa toe ti tawx tix ju hoik tix ju heue.
7 Pex pa mawh pui pie lhen khankix eue, Isayax hoik grux krai grawng pex mhawm mhawm, ah nin,
8 Pui ceu in, yungyi ka Aux ka siyieb
jheeh tix ngie, viang mawh nan,
rhawm kix singai khaing Aux heue.
9 Kix krub ka Aux giex going, kheu sidiex
gau kix been pa yuh kawn pui heue.”
Pa Kieh Kawn Pui Seeing Brai
(Mak 7:14-23)
10 Nawh Cao kok cub pui hun hoek ka tix mai ah nin ka kix, “Nghiiet mai tawng heue.
11 Ang hoik mawh ceu pa laig ka daux jheeh pui kieh pui seeing brai, viang mawh nan, mawh ceu pa lih khaing jheeh pui pa kieh pui seeing brai heue.”
12 Yam an kawncau Nawh khankix hoek mai ah nin ka Nawh Cao, “Tawng Maix grawng pa thiang Pharishie khankix yam mhong kix ka lox pa ah nin lie?”
13 Nawh Cao pawk lox ah nin, “Khaox ku khaox, pa ang Keeing Aux sum piang Raoma, tak sang laoh ti tik heue.
14 Via kix heue, kix mawh pui dug ngai pa thong ka pui dug ngai heue. Phan pui dug ngai thong pui dug ngai, khawm ra kiex tak rau daux o heue.”
15 Petrux pawk lox ah nin ka Nawh Cao, “Krai ex mhong lox tiag in liak.”
16 Nawh Cao baox ah nin “Pex kawx ang nyang tawng tom yam in lie?
17 Ang pex tawng grawng ceu pa laig ka daux jheeh, laig ka daux vaig mai, deeh lih tik ka daux iang lie?
18 Ceu pa lih hoek khaing daux jheeh, mawh pa lih khaing daux rhawm mai chix kieh pui seeing brai heue.
19 Kheu ceu pa keud pa ang mhawm khankix, pa mawh ceu pa pah pui yum, ceu pa lud mai moeng pui, ceu pa lud mai bun, ceu pa briex, ceu pa kham mhai rug pa ang mawh meh mai ceu pa salao, lih khaing daux rhawm heue.
20 Mawh ceu in khankix pa chix kieh pui seeing brai, viang mawh nan, pa ang khoek taix mai ih ceu pa ih, ang kieh pui mawh pa seeing brai.”
Krax Yum Rhawm Bun Khanan
(Mak 7:24-30)
21 Yesux lih hu khaing tan mai hu ka veng Turux mai veng Sidom heue.
22 Bun Khanan tix kaux lih hoek khaing haktiex an mai kok yo ah nin, “Simiang Kawn Davit eue, caux rhawm ka aux liak. Laig phicaox daux kawn bun aux kied sigrien sigre heue.”
23 Nawh Cao ang pawk lox ka nawh tix gum kawx. Kawncau Nawh khankix hoek khyox khaw ka Nawh Cao ah nin, “Kieh bun an hu liak, kheu nawh kok yo khaix ex heue.”
24 Nawh Cao pawk lox ah nin, “Ploi Aux hoek son yung pa hoik grai pa dex mai geh nyiex Isarelax ngie heue.”
25 Bun an hoek mai krub Nawh Cao mai khyox khaw ah nin, “Simiang eue, teem aux liak.”
26 Nawh Cao pawk lox ah nin, “Ang khaw ti teei blah cie kawn praix khankix, taing tawx ka sox khankix”
27 Bun an deeh ah nin, “Mawh heue, Simiang eue, pie sox khankix kawx, ih pa cod pa roik greem pheen cao tix heue.”
28 Yam an Yesux baox pawk lox ah nin ka nawh, “Bun eue, krax yum rhawm maix kied ting heue, kieh mawh awm pa koe rhawm maix,” daux bawg yam nari an, kawn bun nawh moi heue.
Yesux Pai Pui Hun Moi
29 Yesux lih khaing tan mai tiang ka rawm nhawng Galilie mai Nawh Cao haok piang gawng mai ngawm tan heue.
30 Cub pui hun khankix hoek ka Nawh Cao, viex pui laux caong, pui dug ngai, pui aw, pui laux maung mai pui tang kaux tom nie mai kix heue. Kix deuh khankix ka dex caong Nawh Cao mai Nawh Cao pai kix moi heue.
31 Pui haoh hun khankix daox deng kah, yam yaox kix pui aw deeh chix sikah, pui laux maung deeh mhawm, pui laux caong deeh chix hu, pui dug ngai deeh chix yaox mai kix yaog yaw ka Siyiex Isarelax heue.
Tawx Pui Pon Rheng Ih Priex
(Mak 8:1-10)
32 Khaix an Yesux kok kawncau Nawh khankix hoek ka tix ah nin, “Aux caux rhawm ka pui hun khankix, kheu hoik ot kix mai Aux loe ngaix mai ang koe pa ih tidtix mai ang Aux rhawm ploi kix hu yam kawn cai rhawm kix. Phan yuh nan ha kix kox khrup hawt krax heue.”
33 Kawncau Nawh khankix ah nin ka Nawh Cao, “Ex sang pon blah dee mawx ka daux tiag in, sonsang tawx pui hun ding dawd ih tom sak lie?”
34 Yesux baox chawk kix ah nin “Pex koe blah miex lon?” kix ah nin, “Koe aliah lon mai kax iak ceeix ngie heue.”
35 Nawh Cao nhie cub pui hun khankix ngawm piang tiex.
36 Nawh Cao teei blah aliah lon an mai kax mai Nawh Cao yaogyaw bwanson mai sivit mai tawx ka kawncau khankix mai kawncau khankix tawx ka cub pui hun khankix heue.
37 Khaix hoik ih tom sak khawmuik, kix khrawm pa max, pa phawng, pa lheu, naog aliah phliex heue.
38 Kix pa ih, simex giex, koe pon rheng kaux, ang krai bun mai kawn nyawm khankix heue.
39 Nawh Cao ploi cub pui hun khankix hu mai laig ka daux reu hu ka haktiex Magadalax.