13
Lox Tiag Pa Rhuat Simie
(Mak 4:1-9 Luk 8:4-8)
1 Daux singaix an, Yesux lih hu khaing daux nyiex mai hu ngawm dex praok rawm nhawng heue.
2 Cub pui hun khrawm ti hoek ka Nawh Cao, kheu nan, Nawh laig ngawm daux reu tan,Ref 13:2 Mak 4:1-9; Luk 8:4-8; 5:1-3 mai pui hun khankix khawmuik cung ka praok rawm heue.
3 Nawh Cao sidiex gau ka kix tom nie ceu, ka daux lox tiag ah nin, “Pui rhuat simie hu ti rhuat simie heue.
4 Yam rhuat nawh simie, simie tix blah cod piang krax mai sim khankix hoek sut ti ih simie an khankix heue.
5 Simie tix blah cod piang tiag simaox, dee ang tiex koe tom nie, mai simie khankix kuah dom mawx dom an, mawh kheu ang tiex raux tan heue.
6 Yam hoik lih singaix, kied hax koek mai kheu ang kix koe riah, kix kroh hu heue.
7 Simie tix blah cod ka daux pang kat mai pang kat an, ting tom kheem mai gut kix heue.
8 Simie tix blah cod ka dee mhawm tiex mai plix plix, tix blah tix yieh son, tixgliah son mai tixngoe son heue.
9 Kaw pa koe yhaok ti mhong, kieh nawh mhong heue.”
Teei Lox Tiag
(Mak 4:10-12, Luk 8:9-10)
10 Kawncau khankix chawk ah nin ka Nawh Cao, “Kheu patix Maix teei lox tiag khankix sidiex ka kix?”
11 Nawh Cao pawk ah nin, “Hoik kieh pex tawng grawng pa raux mox pa dex dawd mai meung raoma, viang mawh nan, ang nyang tawx kix tawng heue.
12 Grawh grawng nawh, pui mawx pa hoik koe ang ah, tak sang baox tawx ka nawh mai nawh tak sang koe tom nie heue. Ka pui pa ang koe tidtix, pa hoik koe ka nawh kawx, tak sang teei khaing nawh heue.
13 Grawng sidiex gau Aux mai lox tiag khankix ka kix, mawh kheu, kix yaox kawx, ang tie mawh pa yaox, mai kix mhong kawx, ang tie mawh pa mhong, kix tawng kawx ang tie mawh pa tawng heue.
14 Gumlox pa hoik grux krai cao jhai Isayax grawng kix, pa ah nin hoik naog heue.Ref 13:14-15 Isa 6:9-10; Mak 8:18; Yo 12:39-41; Cau 28:26-27
Pex mhong kawx, mhong mai ang tie tawng ceeix kawx,
pex yaox kawx, yaox mai ang tie yaox ceeix kawx.
15 Kheu rhawm pui ceu in hoik mumi,
mai yhaok kix hoik du,
mai ngai kix, hoik tawb tix,
yuh ka mawx son ang kix sang yaox.
Kheu son ang yhaok kix chix mhong,
mai rhawm kix chix tawng
mai deeh tieh hoek plak Aux, ti cox kix moi heue.
16 Viang mawh nan, ngai pex koe bwanson kheu chix yaox, mai yhaok pex kawx koe bwanson kheu chix mhong heue.
17 Aux krai lox tete ka pex, koe cao jhai khankix mai pui rahsee khankix, pa simie ti yaox ka ceu pa yaox pex, viang mawh nan ang pon ti yaox mai pa simie ti mhong ka ceu pa mhong pex, viang mawh nan ang pon ti mhong heue.”
18 “Mawh kheu in pex nghiet grawng lox tiag pui pa rhuat simie.
19 Yam mhong pui tix kaux kaux ka lox bwan pa dex dawd mai meung Siyiex mai ang chix tawng dee bleeh, mawh kaw pa caox pa hoek rud ti teei simie pa hoik rhuat ka daux rhawm nawh heue. In mawh simie pa hoik rhuat piang krax heue.
20 Simie pa hoik rhuat piang tiag simaox, mawh pui pa mhong ka lox bwan mai gaux rhawm mai rieb ti teei dom mawx dom an.
21 Viang mawh nan, ang nawh koe riah ka daux tokaux tix, nawh kaux cong tivud khaing mai yam yaox nawh krax tuktiak kheu lox bwan nawh laux rhawm dom mawx dom an heue.
22 Simie pa rhuat ka daux sinax pang kat, mawh pui pa mhong ka lox bwan mai priex rhawm pa dex dawd mai haktiex mai pa chix pie lhen sinngao haktiex, kheem gut ka lox bwan mai nawh ang chix plix, plix heue.
23 Simie pa rhuat dee mhawm tiex, mawh pui pa mhong lox bwan mai chix tawng chix nghiet mai chix plix plix, tix blah plix tix yieh son, tixgliah son, mai tix blah tixngoe son heue.”
Lox Tiag Nghox Ca Mai Vang
24 Nawh Cao baox plih kix yaox lox tiag tang ceu pa ah nin, “Meung Raoma tak awm pui pa rhuad simie pa mhawm ka daux ma tix heue.
25 Viang mawh nan, yam hoik laig it pui, pui koeng ka nawh hoek ti rhuat simie vang ka daux sinax nghox ca an mai lih hu heue.
26 Yam kuah gawng mai lhax mai sigleem plix, vhang kawx lih hoek heue.
27 Siliex khankix hu ka cao nyiex ah nin, Simiang eue, maix rhuat simie pa mhawm daux ma tix ang mawh lie? Kheu vang lai lih koe lie?
28 Nawh pawk ah nin ka kix, Ceu in mawh pa hoik yuh pui koeng heue. Siliex khankix baox ah nin ka nawh, Maix simie kieh ex hu khrawm vang khankix lie?
29 Viang mawh nan, nawh pawk lox ah nin, Ang, phan pex hu khrawm vang khankix, ha pex kawx loe reeig nghox ca glaoh tau mai kix.
30 Kieh ting tau khawm ra ceu tom hoek bawg yam vawg, mai hoek bawg yam vawg sax, aux tak krai ka pui vawg khankix, sonsang khrawm vang khankix phao ka, vien vien mai gleeing kix ka ngu heue. Viang mawh nan, khrawm nghox ca mai sau daux krao aux heue.”
Grawng Simie Taux Klaox
(Mak 4:30-32; Luk 13:18-19)
31 Nawh Cao baox plak kix yaox lox tiag tang ceu pa ah nin, “Meung Raoma tak awm simie taux klaox tix mu, pa rhuat pui tix kaux ka daux ma tix heue.
32 Viang mawh simie pa iak khaing simie tang ceu kawx, khaix hoik ting, nawh lheu ting khaing num rib riem mai lih mawh gawng, tom sim raoma khankix hoek yuh mheem mai hoek laux piang kak nawh heue.”
Susaix mai Phawng Gaox
(Luk 13:20-21)
33 Nawh Cao baox krai kix mhong lox tiag tang ceu pa ah nin, “Meung Raoma awm susaix, pa teei bun tix kaux klu klao ka daux phawng gaox loe diag, tom hoik laig susaix an ka daux khawmuik mai kieh ploh heue.”
Yesux Shiao Lox Tiag
(Mak 4:33-34)
34 Grawng ceu in khawmuik Yesux teei lox tiag krai ka cub pui hun khankix heue. Phan ang mawh lox tiag Nawh Cao ang sidiex ang krai lox ka kix heue.
35 Kheu sonsang naog lox pa hoik grux krai cao jhai pa ah nin,
“Aux tak ang jheeh tix ka daux lox tiag.
Aux tak krai grawng ceu pa hoik mox tom yam jah haktiex heue.”
Dee Bleeh Lox Tiag
36 Khaix hoik ploi Nawh Cao cub pui hun khankix, Nawh laig ka daux nyiex mai kawncau Nawh khankix hoek dex Nawh Cao ah nin, “Krai ex mhong dee bleeh lox tiag grawng vang pa koe ka daux ma liak.”
37 Nawh Cao pawk lox ah nin, “Pui pa rhuat simie pa mhawm mawh Kawn kawn pui heue.
38 Ma mawh haktiex, simie pa mhawm mawh kawn praix Meung an khankix mai vang mawh kawn praix kaw pa caox khankix heue.
39 Pui koeng pa rhuat simie vang mawh phicaox, bawg yam vawg mawh yam sidah haktiex in, mai pui pa vawg mawh kawncau Siyiex khankix heue.
40 Awm khrawm ka vang khankix mai gleeing ka ngu, yam sidah haktiex in tak awm an heue.
41 Kawn kawn pui tak ploi kawncau raoma Nawh hoek khrawm ti teei ceu pa kieh mawh phimap mai pui pa yuh pa caox khankix lih khaing Meung Nawh heue.
42 Tak taing kix sau daux glah ngu, dee tak yiiem riag mai dee greeik rhang heue.
43 Yam an pui rahsee khankix tak jhan riang awm singaix ka daux Meung Keeing kix heue. Pui pa koe yhaok ti mhong, kieh nawh mhong liak.”
Lox Tiag Kraung Pa Hoik Mox
44 “Meung Raoma awm sinngao pa ngawh pa hoik mox ka daux ma mai pui tix kaux yaox sinngao an mai baox mox, khaix an ka daux pa gaux rhawm nawh hu coh pa koe tix khawmuik mai liag ma an heue.”
Lox Tiag Siang Pa Ngawh
45 “Meung Raoma baox awm pui yuh lai tix kaux pa sawg siang ceu pa koe daux jawx pa mhawm khankix.
46 Khaix hoik yaox nawh siang pa koe daux jawx pa kied ngawh, nawh hu mai coh pa koe tix khawmuik mai liag siang an heue.”
Lox Tiag Rub Kax
47 “Meung Raoma baox awm rub pa ploi daux rawm sigrit sigrah mai khrawm kax kuceu heue.
48 Yam hoik naog rub an, kix bluh hu ka praok rawm, kix ngawm mai laug pa mhawm khankix sau daux aw daux klong, viang mawh nan, pa ang mhawm khankix kix tik heue.
49 In tak mawh yam sidah haktiex heue. Kawncau raoma khankix tak hoek mai gwieh pa caox khaing sinax pa rahsee.
50 Tak taing kix sau daux glah ngu, dee tak yiiem riag mai dee greeik rhang heue.”
Pa Khraox Mai Pa Prim
51 Yesux baoh ah nin ka kix, “Hoik tawng pex ka grawh grawng khankix khawmuik lie?” kix pawk ah nin ka Nawh Cao, “Tawng heue, Simiang.”
52 Nawh Cao baox ah nin ka kix, “Mawh kheu in, pui tiiem lai ku kaux pa hoik gau grawh grawng Meung Raoma hoik awm cao nyiex tix kaux, hoe ceu pa khraox mai pa prim lih khaing kraung nawh heue.”
Ang Rieb Ka Yesux
(Mak 6:1-6; Luk 4:16-30)
53 Khaix hoik sidiex Yesux lox tiag,
ceu in khankix, Nawh Cao lih hu khaing tan heue.
Thiang ka Yesux
54 Nawh Cao hoek ka daux meung ot tix, mai Nawh gau kix ka daux nyiex sidiex, kix tom kied daox deng ah nin, “Pui in pon pingnya cuyi mai siawp sibrawm khankix khaing dee mawx lie?
55 In mawh kawn pa yuh kaing kraung taix ang mawh lie? Miex Nawh mawh Marix ang mawh lie? Pux Nawh khankix mawh Yakop, Yosiep Simon mai Yudax ang mawh lie?
56 Nan Nawh khankix ot tau mai ex khawmuik ang mawh lie? Phan mawh nan, kaw in, pon ceu in khankix khawmuik khaing dee mawx lie?”
57 Kix laux rhawm ka daux Nawh Cao. Viang mawh nan Yesux ah nin ka kix, lheu khaing daux meung ot tix mai ka daux nyiex ot tix “Cao jhai mawh pa koe min plakngai tang dah heue.”
58 Nawh Cao ang yuh kaing siawp sibrawm tom nie tan, kheu ang kix yum rhawm heue.