12
Singaix Twah
(Mak 2:23-28; Luk 6:1-5)
1 Daux bawg yam an, Yesux hu preeng ka daux ma nghox ca ka daux singaix twah mai kawncau Nawh khankix cai rhawm, kheu nan kix tom caik ti ih sigleem nghox ca heue.
2 Yam yaox Pharishie khankix ka an, kix ah nin ka Nawh Cao, jhak heue, “Kawncau Maix lai yuh pa ang khaw mai beenli singaix twah.”
3 Nawh Cao pawk lox ah nin ka kix, “Ang pex sax phat grawng pa yuh Davit nawh mai pui pa ot tau mai nawh khankix yam kied cai rhawm lie?
4 Yam laig nawh ka daux nyiex Siyiex mai ih ka blah, pa ang khaw nawh mai pui pa ot tau mai nawh khankix ti ih, viang mawh nan, mawh cao giex kaing li khankix khaing pa khaw ti ih heue.
5 Pex ang sax phat daux lai beenli, grawng yuh cao giex kaing li pa ot daux nyiex bwan khankix, yuh pa ang khaw daux ngaix twah mai ang koe phimap lie?
6 Viang mawh nan, Aux krai ka pex, pa lheu ting khaing nyiex bwan koe tin tix kaux heue.
7 Phan pex hoik tawng dee bleeh lox in, Aux moh krax caux rhawm mai ang moh krax tan, Ref 12:7 Ho 6:6 pex ang khaw ti tang phimap ka pui pa ang koe dee lud.
8 Grawh grawng nawh, Kawn kawn pui mawh Simiang singaix twah heue.”
Pai Pui Pa Yum Taix Moi
(Mak 31-6; Luk 66-11)
9 Nawh Cao lih hu khaing tan mai laig ka daux nyiex sidiex kix heue.
10 Jhak heue, koe pui pa yum taix kroh taix tix khawn tix kaux, sonsang pon ti deuh phimap ka Nawh Cao, kix chawk Nawh ah nin, “Cox jhawm saux moi daux singaix twah, khaw ka been lie?”
11 Nawh Cao ah nin ka kix, “Ka daux pex pui pa koe yung tix mu phan yung an rau daux o singaix twah pa ang teei yung an lih, koe lie?
12 Pui lheu ngawh khaing yung miex ding, mawh kheu nan pa yuh ceu pa mhawm singaix twah khaw daux been heue.”
13 Khaix an Nawh Cao ah nin ka pui an, “Nyeu taix maix heue,” kaw an nyeu taix tix mai deeh mhawm awm tang khawn heue.
14 Pharishie khankix lih hu mai kum kawng grawh grawng sang pon kix ti yuh Nawh Cao laux yuh ka mawx heue.
Laug Ka Siliex
15 Kheu hoik tawng Yesux ka grawng ceu an, Nawh lih hu khaing tan mai pui hawt khaix Nawh Cao tom nie mai Nawh cox jhawm saux kix moi khawmuik heue.
16 Nawh Cao tawm lox ka kix son ang kix sang kieh pui tawng ka Nawh heue.
17 Sonsang naog gumlox pa hoik krai cao jhai Isayax pa ah nin,
18 “Jhak heue, Siliex Aux pa hoik laug Aux,
pa moh Aux, pa khaw rhawm Aux,
Aux tak deuh Khuan Aux piang Nawh,
mai Nawh tak krai grawng bawg yam
prawng ciyang ka pui tang ceu khankix heue.
19 Nawh tak ang thiang, ang kok yo,
mai pui tak ang mhong lox Nawh daux krax tix kaux kawx heue.
20 Priem pa hoik geh, Nawh ang raig pot,
maox kawk ngu pa lih taox ngu, Nawh ang preet,
tom hoik ploi pa prawng ciyang Nawh mai pex heue.
21 Daux ceu kaux Nawh, kawn pui tang ceu khankix tak keud pot jun pot een rhawm kah heue.”Ref 12:21 Isa 42:1-4
(Mak 3:20-30; Luk 11:14-23)
22 Yam an kix viex pui pa laig phicaox, pa dug ngai, pa aw tix kaux hoek ka Nawh Cao mai Nawh Cao cox nawh moi mai pui aw an chix sikah mai chix yaox heue.
23 Cub pui hun khankix khawmuik daox deng ah nin, “Kaw in ang mawh kawn Davit lie?”
24 Yam mhong Pharishie khankix ka grawng ceu an, kix ah nin, “Pui in een rhawm ka Belazebulax, pa mawh simiang phicaox khankix mai kaw in grheu phicaox khankix lih heue.”
25 Kheu tawng Nawh Cao ka grawh grawng pa keud kix daux rhawm kix, Nawh ah nin ka kix, “Meung ku meung pa ang khaw paox tix, pa gwieh paox tix, tak laux leeing heue. Veng ku veng, nyiex ku nyiex, pa ang khaw paox tix, pa gwieh paox tix, ang chix kaux cong.
26 Phan Satan grheu Satan lih, nawh mawh pa gwieh ka tokaux tix heue. Phan mawh nan, meung nawh chix kaux chix cong yuh ka mawx?
27 Phan Aux een rhawm ka Belazebulax ti sang grheu phicaox khankix lih, kawn praix pex sang een rhawm ka pui mawx ti sang grheu phicaox lih lie? Mawh kheu nan, kix tak mawh cao prawng ca pex heue.
28 Viang mawh nan, phan Aux grheu phicaox khankix lih ka daux Khuan Siyiex, Meung Siyiex hoik hoek piang pex tete heue.
29 Sang chix laig pui tix kaux ka daux nyiex pui pa ting riang mai khin ti teei kraung nawh, phan nawh ang phyawk ka pui pa ting riang an sivoe lie? Khaix an nawh tak chix yieh nyiex nawh laux heue.
30 Kaw pa ang ot plak Aux, mawh pui pa koeng ka Aux heue. Kaw pa ang khrawm tau mai Aux, mawh pa kieh prung prang heue.
31 Mawh kheu nan Aux krai ka pex, tak pluat phimap mai pa salao ku ceu ka kawn pui, viang mawh nan pui mawx pa salao ka Khuan Cao tak ang pon pa pluat heue.
32 Pui mawx ah lox pa ang khaw ang jiet ka Kawn kawn pui, tak sang pluat nawh heue. Viang mawh nan, pui mawx ah lox pa ang khaw ang jiet ka Khuan Singax Singeh, tak ang pluat nawh ju in mai ju khaix heue.”
Tawng Khaox Kheu Plix
(Luk 6:43-45)
33 Cox khaox kieh mhawm mai plix nawh tak mhawm heue, phan ang mawh nan, cox khaox kieh ang mhawm, plix nawh tak ang mhawm heue. Grawh grawng nawh pon ti tawng khaox kheu plix nawh heue.
34 Ceu siuing pa cai eue, yam kawn mawh pex pa caox kawx, chix krai lox pa mhawm yuh ka mawx? Kheu jheeh krai ceu pa koe daux rhawm tom nie heue.
35 Pui pa mhawm viex ceu pa mhawm lih khaing kraung khrai pa mhawm pa deuh tix mai pui pa caox viex ceu pa caox lih khaing kraung khrai pa caox tix heue.
36 Aux krai ka pex, ka daux singaix prawng ciyang sax, pex tak sang yaox ti pawk ka gumlox pa nieb krai pex giex going heue.
37 Grawh grawng nawh mawh kheu gumlox pex, pex tak pon pa rahsee mai mawh kheu gumlox pex, pex tak pon pa prawng ciyang heue.”
Mhai Daox Deng
(Mak 8:11-12; Luk 11:29-32)
38 Yam an pui tiiem lai mai Pharishie tix blah ah nin ka Nawh Cao, “Sara Cao Gau eue, ex simie ti yaox mhai pa daox deng khaing Maix tix ceu heue.”
39 Nawh Cao pawk lox mai ah nin ka kix, “Baux ju pa caox mai pa lud vao, sawg ka mhai pa daox deng lie. Viang mawh nan, lheu khaing mhai pa daox deng cie cao jhai Yonax, mhai pa daox deng tix ceu kawx, ang tawx ka kix heue.
40 Mawh kheu awm hoik ot Yonax ka daux vaig kax ting loe singaix loe sawm, Kawn kawn pui kawx, tak ot ka daux tiex loe singaix loe sawm heue.
41 Pui veng Nineve tak kaoh cung tau mai pui baux ju in yam prawng ca mai tak tang phimap ka in, kheu hoik doh keud kix ka lox sidiex gau Yonax mai jhak heue, Kaw pa lheu ting khaing Yonax ot tin heue.
42 Yax simiang caong ma seh, tak kaoh tau mai pui baux ju in yam prawng ca mai tak tang phimap ka in, kheu hoik hoek nawh khaing dee sidah haktiex ti nghiet gumlox pingnya cuyi simiang Sawlamon heue. Jhak heue, Kaw pa lheu ting khaing simiang Sawlamon ot tin heue.”
Phi Pa Seeing
(Luk 11:24-26)
43 “Khaix hoik lih phi pa seeing brai khaing daux pui tix kaux, nawh hu preeng ka dee ang rawm koe sonsang sawg dee laux kawx, ang yaox.
44 Khaix an nawh ah nin, Aux sang deeh ing ka nyiex dee hoik kaoh aux. Yam hoik hoek nawh tan, nawh yaox nyiex yi, pa hoik pih mai pa hoik cox mhawm heue.
45 Khaix an, nawh hu mai viex phicaox aliah kaux pa lheu caox khaing tokaux tix mai laig ka daux an mai kix laig ot tan heue. Bawg yam pa ghoik cie pui an nie lheu caox khaing bawg liang heue. Awm an tak lih mawh ka baux ju pa caox in heue.”
Miex Yesux Mai Pux Nawh
(Mak 3:31-35; Luk 8:19-21)
46 Yam kawn sidiex gau Nawh Cao ka cub pui hun khankix, miex Nawh mai pux Nawh khankix cung plak praix mai mhaing ti sikah ka Nawh Cao heue.
47 Pui tix kaux ah nin ka Nawh Cao, “Miex Maix mai pux Maix khankix cung plak praix mai mhaing ti sikah ka Maix heue.”
48 Nawh pawk lox mai chawk ah nin ka kaw pa hoik krai ka Nawh, “Miex Aux mawh mawx? pux Aux khankix mawh mawx?”
49 Nawh Cao nyeu taix tix plak kawncau Nawh khankix ah nin, “Jhak heue, inkix mawh miex Aux mai pux Aux khankix heue.
50 Pui mawx ang ah, pa yuh alo pa khaw caw rhawm Keeing Aux pa ot ka daux meung raoma, mawh pux Aux mai nan Aux mai miex Aux heue.”