1 Simiang Siyiex krai ah nin ka Mose, 2 “Krai ka pui Isarelax khankix, phan pui tix kaux kaux yuh sijax tix sang tan ka Simiang Siyiex, awm pa tat maix jum nawh tak mawh cie Simiang Siyiex. 3 Phan mawh jum pa caw maix ti tat son simex tix kaux pa koe ju tixnga num tom hoek tixgliah num, jum nawh tak mawh tixphwan plah Shekhe ka mau dee pa singax singeh. 4 Phan mawh bun, jum nawh tak mawh tixngoe plah shekhe. 5 Phan nawh mawh pa koe ju phwan num tom hoek tixnga num maix tat jum simex mawh tixnga plah shekhe mai jum bun mawh kao plah shekhe, 6 Phan ju nawh koe tix khix, tom hoek phwan num maix tat jum simex mawh phwan plah mau shekhe mai jum bun loe plah mau shekhe, 7 phan ju nawh koe tixgliah num haok plak piang maix tat jum simex mawh kao phwan plah mau shekhe mai jum bun kao plah shekhe. 8 Phan nawh mawh pa kied hot sonsang plud tix ka ngawh jum pa hoik tat maix, tak viex nawh hoek plak sivoe cao giex kaing li, cao giex kaing li tak tat jum nawh, awm sijax pa hoik yuh nawh, cao giex kaing li tak tat jum. 9 Phan pui viex ti tan totiag ka Simiang Siyiex, ceu pa tan an ka Simiang Siyiex tak mawh pa singax singeh. 10 Pa mhawm ang ah, pa caox ang ah, ang pon ti loh ka tang mu mai phan nawh sang loh an khawm ra tak mawh pa singax singeh. 11 Phan mawh totiag pa ang singax mai pa ang khaw ti tan ka Simiang Siyiex, nawh tak jhi totiag an ka cao giex kaing li, 12 cao giex kaing li tat jum an mhawm ang ah, ang mhawm ang ah maix caw ti hawt awm jum pa tat cao giex kaing li. 13 Phan nawh simie ti deeh taoh ka an, nawh tak deeh naok ti tawx phwan son tix son piang jum an. 14 Phan pui tix kaux sang ap nyiex ti sonsang mawh pa singax singeh son Simiang Siyiex, cao giex kaing li tak tat jum son nawh, mhawm ang ah, ang mhawm ang ah maix caw ti hawt awm jum pa tat cao giex kaing li. 15 Phan kaw pa ap nyiex ti singax simie ti deeh taoh ka nyiex ti, nawh tak baox naok mau phwan son tix son piang jum an mai tak deeh teei nyiex an. 16 Phan pui sang ap kaung cie tix ti dahdah mawh pa singax, son Simiang Siyiex maix tak tat awm jum simie nghox koi pa van nawh, phan van simie tix Awmie jum tak mawh tixphwan plah mau shekhe. 17 Phan nawh jah ti ap kaung cie tix singax, ka daux pawie naog num jubili, nawh tak yaox ti tawx ngawh awm pa tat maix. 18 Phan nawh ap kaung tix singax, khaix hoik luan bawg yam pawie naog num jubili, cao giex kaing li tak simin num glang sinax pa kawn deuk, tom hoek daux bawg yam pawie naog num jubili mai gheuh jum pa tat maix ka nawh. 19 Phan nawh simin ti deeh taoh ka kaung pa hoik ap tix singax an, nawh tak deeh naok mau, phwan son tix son piang jum an mai an tak deeh mawh kaung cie nawh. 20 Phan nawh ang lai simie ti taoh ka kaung an mai hoik coh kaung an ka pui tang kaux, nawh ang lai pon ti deeh taoh ka, 21 yam hoik luan kaung an, daux pawie naog num Jubili, tak mawh pa singax singeh, ka son Simiang Siyiex, awm kaung pa hoik tiextu, mai an tak mawh cie cao giex kaing li. 22 Phan pui tix kaux ap kaung pa hoik liag nawh mai pa ang mawh cie nawh, sonsang singax ka Simiang Siyiex, 23 cao giex kaing li tak simin num sinax pa kawn deuk tom hoek bawg yam pawie naog num Jubili, nawh tak tawx ngawh jum awm pa hoik tat maix ka daux ngaix an, awm krax tan pa singax singeh ka son Simiang Siyiex. 24 Yam hoek daux pawie naog num jubili, nawh tak deeh tawx kaung an ka kaw pa hoik liag pa mawh cao haktiex, sonsang deeh mawh cie nawh. 25 Maix tak tat jum khawmuik hawt awm jum mau plah shekhe dee pa singax tixnga Gerax mawh tix shekhe. 26 “Tobrie pa liang ti keh khankix, mawie ang ah yung ang ah, hoik mawh cie Simiang Siyiex, pui tix kaux kawx tak ang pon ti baox deeh tang gwieh mawh pa singax, mawh kheu an mawh cie Simiang Siyiex. 27 Phan an mawh tobrie pa ang singax, tak pon ti deeh taoh awm jum pa hoik tat maix mai deeh naok mau phwan son tix son piang an, phan an ang lai deeh taoh, tak coh awm jum pa hoik tat maix. 28 Viang yuh ka mawx kawx, krax tan pa hoik tiextu nawh ti tawx ka Simiang Siyiex, ka daux pa koe tix khankix, pui khawm tobrie mai kaung cie nawh khankix, tak ang pon ti coh mai ang pon ti deeh taoh, Ref 27:28 Si 18:14. can ceu krax tan pa hoik tiextu nawh kuceu mawh pa kied singax singeh son Simiang Siyiex. 29 Pui pa hoik tiextu appong tan tokaux tix, pa sang hoek krax laux leeing mai krax yum ka daux sinax pui khankix tix kaux kaux, tak ang lai pon ti deeh taoh ka, tak yaox ti pah yum tete. 30 Ceu pa lih khaing daux tiex, kao son tix son, pa mawh plix nghox koi ang ah, plix khaox plix ox ang ah, mawh cie Simiang Siyiex, an mawh pa singax singeh son Simiang Siyiex. 31 Phan pui tix kaux simie ti deeh taoh pa mawh kao son tix son an, nawh tak deeh naok phwan son tix son piang an. 32 Mawie ang ah, pex ang ah, yung ang ah, can pa tiang ti hu greem khaox gix pex khankix kao son tix son, tak mawh pa singax singeh son Simiang Siyiex. 33 Nawh tak ang pon ti chawk cheng, sonsang tawng grawng an khankix, mawh pa mhawm ang ah, pa caox ang ah, nawh tak ang pon ti loh ceu an khankix, phan nawh sang deeh lo an khankix pa deeh loh son an khawm ra tak mawh pa singax singeh, an tak mawh pa ang lai pon ti deeh taoh.”Ref 27:30-33 Si 18:21; Pi 14:22-29. 34 Inkix mawh gumlox tawm pingnyap pa hoik deuh Simiang Siyiex ka Mose, son ceu pui Isarelax khankix piang gawng Sina heue.