1 “Pex tak ang pon ti yuh riang grangRef 26:1 Krub 19:4. son tokaux tix, riang grang pa saik ang ah, Ref 26:1 Lih 20:4; Pi 5:8; 16:21-22; 27:15. rong khaox pa mhawm ang ah, ka daux haktiex pex tak ang pon ti jung simaox pa hoik saik ka taix ti, sonsang krub tix ka, mawh kheu Aux mawh Simiang Siyiex pa mawh Siyiex pex. 2 Pex tak priex ti hawt ngaix twah Aux mai yungyi ka dee pa singax singeh Aux, Aux mawh Simiang Siyiex. 3 Phan pex hawt grawng lawng khaix beenli Aux mai priex ti hawt gumlox pingnyap Aux khankix mai hawt ti yuh, 4 Aux tak tawx rawm lhiex ka pex, bawg yam mawx bawg yam an, haktiex tak sang tawx plix tix mai khaox pa koe daux kaung khankix tak lih tix koe plix. 5 Kaing pah pex nghox tak sang sidah tom hoek bawg yam pieh plix siiet mai kaing pieh pex plix siiet tak sidah tom hoek bawg yam ruat simie, pex tak yaox ti ih tom sakRef 26:3-5 Pi 11:13-15. mai luad luan khaing pa lhat graung daux haktiex tix. 6 Aux tak tawx pa nhim koe daux haktiex mai ang koe pui pa ghlat pex lhat graung mai pex tak yaox ti it mhawm mhawm, Aux tak grheu totiag pa vao khankix mai pui caox pui caig khaing haktiex pex mai lawm vaig lawm pliah tak ang lai kieh koe ka daux haktiex pex. 7 Pex tak pheet pui koeng mai kix tak goh ka lawm vaig lawm pliah sivoe ngai pex. 8 Pex phwan kaux tak pon pheet ka pui tix yieh kaux, pex tix yieh kaux tak pon pheet ka pui tix mheen kaux, pui koeng pex khankix tak yum ka lawm vaig lawm pliah sivoe ngai pex. 9 Mawh kheu Aux tak kia ngiien ka pex mai kieh pex haoh hun mai kieh gumlox sijax mukheu Aux, kaux cong tau mai pex. 10 Pex tak ih nghox prim mai kieh thawk pa prim lih kheu jao hoik hoek nghox khraox pa hoik pon pex. 11 Aux tak sum nyiex gox bwan tix daux sinax pex mai Aux tak ang lai seeing ka pex. 12 Aux tak lailing daux sinax pex mai mawh Siyiex pex mai pex tak mawh ceu pui Aux.Ref 26:12 2Kaw 6:16. 13 Aux mawh Simiang Siyiex pa mawh Siyiex pex, pa hoik viex pex lih khaing daux meung Ejiptux, son ang pex lai mawh siliex kix, Aux hoik raig khaox glawm pex khankix mai hoik kieh pex jung see see. 14 Phan pex ang cu nghiet ka gumlox Aux mai ang hawt yuh awm lox tawm pingnyap Aux khankix, 15 Phan pex seeing ka lox tawm jhawm krai Aux khankix mai phan pex nunai ka beenli Aux khankix, son ang pex pon hawt ti yuh ka gumlox pingnyap Aux mai yieh laux ka sijax mukheu Aux, 16 Aux tak deeh yuh in khankix ka pex, Aux tak kieh krax lhat graung koe piang pex mai kieh jhawm saux, jhawm saux krawx, jhawm saux pa laux ngai mai kieh rhawm pex hoek ka daux pa laux rhawm pex tak yaox ti ruat simie ka daux pa giex going, mawh kheu pui koeng pex khankix tak ih an, 17 Aux veeh pakngai tix khaing pex mai pex tak som ka plak sivoe ngai pui koeng pex mai pui koeng ka pex tak kwang piang pex mai pex tak to khawm ang pui tie pheet ka pex. 18 Pex hoik yaox ti kham geu ding dod kawx, phan pex ang cu nghiet ka lox Aux, Aux tak tawx krax ciyang pa nie lheu kheu jao phimap pex aliah son. 19 Aux tak raig ti tik siawp sibrawm pa ting rawm pex, Aux tak kieh raoma awm rhiem mai haktiex awm tawng lheung. 20 Pex tak uik riang rao giex going, haktiex pex tak ang chix tawx plix mai khaox pa koe piang haktiex tak ang chix plix, plix. 21 Phan pex ang nghiet lox Aux, Aux tak viex krax kham geu hoek piang pex aliah son, kheu jao phimap pex. 22 Aux tak ploi totiag pa vao khankix, laig daux sinax pex mai kieh yuh laux ka kawn praix pex mai tobrie pex mai kieh ceu pui pex nie iak hu si pie mai krax lawng pex tak yiien. 23 Viang hoik yaox ti kham geu yuh nin kawx, ang cox rhawm tix mai ca kawn tieh feen ka Aux, 24 Aux kawx tak tieh feen ka pex mai Aux tak tawx krax pa ciyang ka pex aliah son kheu jao phimap pex. 25 Aux tak kieh vaig lawm pa ot plak sijax mukheu Aux hoek ka pex mai prawng ca ka pex, yam khrawm pex paox ti tau ka daux veng, Aux tak ploi jhawm saux preng hoek sinax pex mai pex tak laux leeing daux tawm taix pui pa koeng. 26 Yam hoik tat Aux krax teem pa ih ka pex, bun kao kaux tak yuh blah sin ka daux glah ngu tix mu mai kix tak deeh ciang ti tawx blah son pex, pex tak ih mai ang sak. 27 Viang pex hoik kham geu yuh nin kawx, pex ang nghiet lox Aux mai ca kawn tieh feen ka Aux, 28 Aux tak tieh feen ka pex ka daux pa kied song rhawm tix, Aux tak deeh tawx krax ciyang ka pex aliah son kheu jao phimap pex. 29 Pex tak ih nex kawn simex kawn bun tix khankix, 30 Aux tak yuh dee lhaong dee krub pex laux leeing mai raig khu dee tan pa tok pex nyawng bhawng khankix mai taing ti tik tokaux yum pex piang riang grang yum pa krub pex, Aux tak seeing ka pex. 31 Aux tak yuh veng pex laux mai yieh dee singax singeh pex khankix laux leeing mai Aux tak ang lai ngheet ka taox nyawng bhawng pex. 32 Aux tak kieh haktiex pex laux leeing mai pui koeng pa ot ka daux haktiex pex, tak koe krax daox deng ka an. 33 Aux tak kieh pex prung prang ka daux sinax ceu pui tang ceu, lawm vaig hawt pheet khaix pex, haktiex pex tak mawh pa yi mai veng pex tak hoek krax laux leeing. 34 Yam hoik yiien pui ka daux haktiex pex, haktiex pex tak gaux rhawm daux ngaix twah Nawh mai pex tak ot ka daux haktiex pui koeng pex khankix, yam an haktiex tak yiien mai laux lee ti gaux rhawm daux ngaix twah Nawh. 35 Glang bawg yam kawn yiien pui, an tak mawh pa laux lee tix, mawh kheu ang koe bawg yam yiien yawg daux ngaix twah yam kawn ot pex ka daux veng an. 36 Kix pa kawn deuk ka daux pex khankix Aux tak sau krax yaoh yeu ka daux rhawm kix daux haktiex pui koeng kix, lox luah lhax khaox kawx tak pheet kix to mai kix tak to awm to kix khaing lawm vaig mai kix tak goh khawm ang pui hawt khaix kix tix kaux kawx. 37 Kix tak sideeing mai goh piang paox ti, tix kaux lai tix kaux, awm to tix ka lawm vaig, khawm ang pui pheet kix tix kaux kawx, mai pex tak ang lai koe siawp sibrawm tix cung sivoe ngai pui koeng tix. 38 Pex tak laux leeing sinax pui kuceu mai haktiex pui pa koeng pex tak bleet ka pex. 39 Can pex pa kawn deuk an khankix, tak khrup ka daux haktiex pui pa koeng pex kheu phimap pa yuh keeing kix. Kix tak khrup ka daux krax an awm keeing kix. 40 Phan kix khyox khaw pluat ploi phimap tix mai phimap yuh keeing kix, kheu pa tieh feen tix ka Aux mai pa tieh feen tix ang hu daux krax Aux, 41 Mawh kheu nan, Aux kawx tak tieh feen ka kix mai hu tawx kix ka haktiex pui koeng kix, phan rhawm pa ang pat hak tix yeen tix tiem mai rieb ka phimap pa yuh tix, 42 Aux tak doh keud ka sijax mukheu pa yuh tix mai Yakop, Ref 26:42 Jah 28:13-14. sijax mukheu pa yuh tix mai IcakRef 26:42 Jah 26:3-4. mai sijax mukheu pa yuh tix mai Abraham, Ref 26:42 Jah 17:7-8. Aux tak doh keud ka haktiex. 43 Kix tak prah haktiex tix mai haktiex an tak koe krax gaux rhawm ka daux ngaix twah, yam hoik yi pui khaing dee an, kix tak yaox ti rieb ka phimap pa yuh tix, kheu hoik nunai kix ka lox lai beenli Aux mai rhawm kix seeing ka lox tat jhawm prawng Aux. 44 Viang yuh nan kawx, yam ot kix daux haktiex pui koeng tix, Aux ang tik vud ka kix mai ang seeing ka kix, awm pa sang khaw kix tix laux leeing mai Aux ang yieh ka sijax mukheu pa hoik yuh Aux tau mai kix, mawh kheu Aux mawh Simiang Siyiex kix. 45 Aux tak doh keud ka sijax mukheu pa hoik yuh Aux tau mai doeh ru kix, pa hoik viex Aux lih khaing meung Ejiptux, plak sivoe ngai pui kuceu sonsang mawh Aux Siyiex kix, Aux mawh Simiang Siyiex.” 46 In khankix mawh gumlox pingnyap mai lox tat jhawm prawng mai gumlox beenli khankix, pa hoik yuh Simiang Siyiex sinax pui Isarelax piang gawng Sina khaing daux taix Mose heue.