25
Grawng Ngaix Twah Aliah Num Tix Num
1 Simiang Siyiex krai ah nin ka Mose piang gawng Sina,
2 “Krai ah nin ka pui Isarelax mai yam hoek pex ka haktiex pa tawx Aux ka pex, kieh haktiex an priex rien ngaix twah son Simiang Siyiex.
3 Pex tak sum simie nghox koi ka daux kaung been liah num mai pex tak cox pawt nhu plix siiet daux sipeem tix daux liah num mai khrawm plix khankix.
4 Ka daux num aliah an, tak mawh num pa twah mai kieh haktiex laux lee ti mai mawh ngaix twah son Simiang Siyiex maix ang pon sum simie nghox koi daux kaung tix mai ang pon pawt ka nhu plix siiet ka daux sipeem tix.
5 Nghox koi pa tu khaing daux kaung pex kawx, ang pon ti vawg, pex tak ang pon pieh pon khrawm ka plix siiet, pa ang pex cox pawt khaing daux sipeem plix siiet tix, mawh kheu mawh num laux lee son haktiex.
6 Ceu pa lih khaing num pa twah haktiex an, tak mawh pa ih son maix, son siliex simex, siliex bun son pui cang mai son nyo sinie pex,
7 can ceu pa lih ti koe khawmuik, tak mawh pa ih, son tobrie pa eei pex mai son totiag pa koe daux haktiex pex heue.Ref 25:1-7 Lih 23:10-11.
Grawng Pawie Naog Num Jubili
8 “Maix tak simin num ngaix twah aliah num aliah bawg, bawg yam num twah aliah num, tak mawh tixpon dim num ka maix.
9 Ka daux khix aliah kao ngaix phlu teettawng pawie naog num Jubili lih, ka daux ngaix pa khyox khaw pa pluat ploi pex phimap tix mai pex tak phlu teettawng luah daux haktiex tix khawmuik.
10 Maix tak appong num naog tixphwan num an mawh num pa singax singeh mai krai pao krax luad luan son pui pa ot daux haktiex an khawmuik, an tak mawh pawie naog num jubili son pex mai pui ku kaux tak deeh ing ka dee koe sinngao cie tix mai ka dee ot pao nyiex tix.
11 Num naog tixphwan num an, tak mawh pawie naog num jubili son pex, ka daux num an pex tak ang pon ti ruat simie, ang pon ti vawg ka nghox tu mai ang pon ti khrawm plix siiet pa ang pex nyang cox pawt khankix.
12 Mawh kheu pawie naog num jubili mawh num pa singax singeh ka pex mai pex tak ih ceu pa lih khaing daux kaung daux ma.
13 Ka daux pawie naog num jubili in, pex tak deeh ing ka dee koe sinngao cie cao tix ku kaux.
14 Phan pex coh tix ceuceu ka paox plawg tix ang ah, liag tix ceuceu khaing paox plawg tix ang ah, pex ang pon ti yeen ka paox tix, tix kaux lai tix kaux.
15 Pex simin tix yaox khaix pawie naog num jubili pex tak liag khaing paox plawg tix, awm num pa simin pex ti yaox ka krax lih plix nghox koi khankix, nawh tak coh ti tawx an ka pex.
16 Num nie pon pex plix tom nie, pex tak yaog ngawh jum nawh haok mai num iak lih plix pex tak ngreuh jum, mawh kheu hoik coh nawh plix an ka maix, awm num pa hoik pon ti plix.
17 Pex tak ang pon kheem pon yeen ka paox tix, tix kaux lai tix kaux, viang mawh nan, lhat graung ka Siyiex pex, mawh kheu Aux mawh Simiang Siyiex pex heue.
Grawng Pa Khre Son Num Aliah
18 “Pex hawt yuh awm been pa deuh Aux khankix mai priex ti hawt awm lox lai beenli Aux khankix mai pex tak yaox ti ot yiien yawg ka daux haktiex an.
19 Haktiex tak tawx plix tix mai pex tak yaox ti ih tom sak mai yaox ti tan ka daux krax pa yiien yawg.
20 Phan pex ah nin, kheu ang yix yaox ti ruat simie mai khrawm ka plix nghox koi tix, ka daux num aliah yix sang ih patix?
21 Ka daux liah num Aux tak tawx lox nawb bwanson piang pex mai tak kieh plix nghox koi kub son pex loe num.
22 Pex tak yaox ti ruat simie ka daux num daix mai ih ka plix nghox koi pa prim tom hoek ka daux num dim, tom yam hoek bawg yam khrawm pex plix nghox koi pa khraox ka daux num dim, pex tak yaox ti ih plix nghox koi pa prim heue.
Grawng Deeh Taoh Ka Sinngao
23 Ang pon ti coh haktiex ka pui leeing ju, mawh kheu haktiex mawh cie Aux kheu mawh pex nyo sinie mai pui hoek paung mai Aux.
24 Ka daux haktiex pa mawh sinngao cie pex, pex tak pon akhwang ti deeh taoh ka haktiex an.
25 Phan puxaik maix lih ti mawh pui pa hot shia mai hoik coh haktiex cie tix, tix dahdah, phan doeh pao nyiex nawh deeh hoek ti taoh ka an, nawh tak deeh pon ti taoh ka ceu pa hoik coh puxaik nawh.
26 Phan pui pa sang taoh ka an ang koe tix kaux kawx mai phan tokaux cao nawh deeh pon taoh ka an,
27 kieh nawh simin ti yaox ka num pa hoik coh nawh an, kieh nawh dee plud ngawh haktiex ka pui pa hoik coh nawh ka, sonsang deeh mawh haktiex an cie nawh.
28 Phan nawh ang nyang pon plud ngawh an, nawh tak deeh haktiex ka daux taix kaw pa liag tom hoek pawie naog num jubili, yam hoek pawie naog num Jubili an tak bheeik khaing nawh mai tak deeh hoek ka cao pa prim.
29 Phan pui tix kaux coh nyiex ti daux veng pa koe plak daux guh veng, khaix hoik coh nawh nyiex an, ka daux tix num nawh tak pon ti deeh taoh ka.
30 Phan nawh ang lai pon taoh ka daux tix num, khaix an nyiex daux veng pa koe plak daux guh veng tak mawh cie pui pa hoik liag leeing ju, tom hoek baux ju doeh ru nawh, an tak ang lai bheeik khaing nawh tom hoek pawie naog num jubili.
31 Phan mawh nyiex pa koe daux yaong pa ang koe guh veng hawt vung viang tak sawn nawh awm ma kaung, kix tak deeh pon ti taoh an mai kix tak yaox ti kieh bheeik ka daux pawie naog num jubili.
32 Kheu kawx, veng ceu pui Lewix mai nyiex pa koe daux veng pa mawh cie kix khankix, yam mawx ang ah, pui Lewix tak yaox ti deeh taoh ka.
33 Phan pui tix kaux liag nyiex khaing ceu pui Lewix khaing veng cie kix tak yaox ti bheeik khaing daux taix nawh yam hoek daux pawie naog num jubili, mawh kheu nyiex ceu pui Lewix pa koe ka daux veng khankix tak mawh sinngao cie kix daux sinax ceu pui Isarelax khankix.
34 Viang mawh nan, haktiex ma kaung cie pui hun pa koe daux veng kix, tak mawh pa ang pon ti coh, mawh kheu an mawh sinngao cie kix leeing ju.
Ceuk Rom Pui Hot Pui Shia
35 “Phan puxaik pex tix kaux kaux, mawh pui hot shia mai ang lai pon eei tokaux ti sinax pex, pex tak teem eei nawh, awm nyo sinie tix kaux ka daux sinax pex, sonsang pon ot nawh mai pex.Ref 25:35 Pi 15:7-8.
36 Paw lai teei rao khaing nawh mai paw lai baox gawp rao ka nawh, viang mawh nan, lhat graung ka Siyiex pex, sonsang pon ot puxaik maix tau mai maix.
37 Maix tak ang pon ti tawx nawh ceuk mau tix, Ref 25:37 Lih 22:25; Pi 23:19-20. sonsang pon rao mai ang pon ti tawx nawh yaog ceu pa ih sonsang pon lih rao.
38 Aux mawh Simiang Siyiex pex pa hoik viex pex lih khaing meung Ejiptux sonsang tawx meung Khanan ka pex mai sonsang mawh Aux Siyiex pex heue.
Been Dex Dawd Mai Siliex
39 “Phan puxaik pex tix kaux kaux, hot shia sinax pex mai coh tokaux ti ka pex maix tak ang pon ti khin nawh yuh kaing awm siliex,
40 nawh tak ot tau mai maix awm pui cang, awm kawncau mai awm nyo sinie, nawh tak yaox ti yuh kaing jhaw maix tom hoek bawg yam pawie naog num jubili,
41 nawh tak lih hu khaing maix, tau mai kawn praix tix khankix mai kix tak deeh ing ka nyiex ma tix mai deeh hoek ka haktiex keeing tix.
42 Kheu mawh kix kawncau Aux pa hoik viex Aux lih khaing meung Ejiptux, tak ang pon ti coh kix awm siliex.
43 Maix tak ang pon ti kwang mai ang pon yuh pa khin ka nawh maix tak lhat ka Simiang Siyiex tix.
44 Phan mawh siliex simex, siliex bun maix an, maix tak liag kawncau pui pa ot hawt vung viang maix.
45 Lheu khaing an maix tak pon ti liag ka nyo sinieh khankix, pa ot sinax maix khawm kawn nyiex ma nawh, pa keh ka daux haktiex maix mai kix tak mawh cie maix.
46 Maix tak pon ti kieh kix mawh sinngao pa pluat kawn praix maix khankix khaix maix, sonsang mawh sinngao ka kix leeing ju, maix tak pon cau kix awm siliex, viang mawh nan, phan mawh son puxaik maix, pui Isarelax maix tak ang pon ti kwang piang kix tix kaux lai tix kaux, ka daux krax pa khin.Ref 25:39-46 Lih 21:2-6; Pi 15:12-18.
47 Phan pui tang ceu ang ah, nyo sinie pa ot dex maix ang ah, pon ti magmi mai phan puxaik maix pa ot hawt nawh tix kaux kaux, lih ti hot shia mai coh tokaux tix ka nyo sinie an ang ah, ka pui pa hoek ti ot tivud ticu, pa deeh hawt maix ang ah mai ka pui tix kaux kaux pa mawh kawn nyiex ma nyo sinie khankix,
48 khaix hoik coh nawh tokaux tix, nawh tak deeh pon ti deeh taoh ka tix mai puxaik nawh khankix tix kaux kawx tak deeh pon taoh ka nawh,
49 paox nawh ang ah, kawn pux kawn aik nawh ang ah, tak pon ti deeh taoh ka nawh, phan ang mawh nan, paox nyiex pa dex mai ru nawh, tak pon ti deeh taoh ka nawh, phan nawh deeh koe mau, nawh tak deeh taoh ka tokaux ti.
50 Nawh tak jah tix simin ka num jah ti coh tokaux tix tom hoek ka pawie naog num jubili, tau mai cao pa liag, tak sawn ngawh riang yam mawh nawh pui cang hawt num iak num nie.
51 Phan num kawn deuk tom nie, nawh tak yaox ti deeh tawx ngawh pa deeh taoh kix nawh khaing mau ngawh pa hoik liag kix ka nawh.
52 Phan num khankix kawn deuk ngie ceeix khaing, tom hoek bawg yam pawie naog num jubili, khaix an nawh tak simin num an khankix tau mai nawh, hawt awm num an khankix nawh tak deeh tawx ngawh pa deeh taoh kix ka nawh.
53 Nawh tak yaox ti ot tix num hoik tix num awm pui cang, ang yaox ti kwang piang nawh daux pa khin.
54 Phan nawh ang nyang pon deeh taoh ka daux num in, yam hoek pawie naog num Jubili, khaix an nawh tak pon ti luad luan khawm kawn praix nawh khankix tau.
55 Mawh kheu pui Isarelax khankix mawh kawncau Aux, kix mawh kawncau Aux khankix, pa hoik viex Aux lih khaing meung Ejiptux, Aux mawh Simiang Siyiex pa mawh Siyiex pex heue.