24
Jawk Ngu Khri Nyiex Gox Bwan Man
(Lih 27:20-21)
1 Simiang Siyiex krai ah nin ka Mose,
2 “Tawm lox ka pui Isarelax khankix, sonsang viex kix bee singax singeh pa hoik tauh tix khaing plix Sanlun son kawk ngu hoek ka maix sonsang tok maix kawk ngu riang ang jud ang jai.
3 Ka plak praix man tie, dee koe teug bwan sijax mukheu, ka daux nyiex gox bwan man bang kum, Arun tak mawh cao pa bung kaing an, jah ka plakbo, tom hoek ka plak ponngawb, sivoe Simiang Siyiex ang jud ang jai, an tak mawh been leeing ju ka daux doeh ru pex.
4 Nawh tak mawh pa khrex rien ka kawk ngu pa koe piang jawk ten khri ceu pa singax singeh, sivoe Simiang Siyiex ang jud ang jai heue.
Blah Khan Daux Nyiex Gox Bwan Man
5 “Maix tak teei phawng gaox nghox ca im ceu pa mhawm mai yuh blah kao ra lon, Blah ku lon, tak mawh pa koe phawng nghox ca kao son ra son khaing tix epha ra Awmie.
6 Maix tak deuh blah an piang pheen khri pa singax singeh ra pum, tix pum liah lon sivoe Simiang Siyiex.Ref 24:5-6 Lih 25:30.
7 Maix tak sau lawpan pa singax singeh piang pum blah an khawm ra pum, sonsang mawh an nyum krax tan pa doh keud son krax tan pa gleeing ka ngu son Simiang Siyiex.
8 Daux ngaix twah ku twah, Arun tak deuh pan blah an sivoe Simiang Siyiex ang jud ang jai tang kawn praix Isarelax khankix, awm gumlox sijax mukheu leeing ju.
9 An tak mawh son Arun mai kawn simex nawhRef 24:9 Mat 12:4; Mak 2:26; Luk 6:4. khankix, kix tak ih an dee pa singax singeh, mawh kheu mawh an krax tan pa kied singax singeh pa gleeing ka ngu ka Simiang Siyiex, pa mawh been leeing ju.
Pa Pon Krax Ciyang Kheu Nunai Ka Siyiex
10 Kawn simex khaing bun ceu pui Isarelax, keeing nawh pa mawh pui Ejiptux, lih hu sinax pui Isarelax, yam an kawn simex bun ceu pui Isarelax an mai pui Isarelax tix kaux simah ka paox tix daux nyiex bang.
11 Mawh kheu kawn simex pa keh khaing bun ceu pui Isarelax an, hoik nunai ceu kaux Simiang Siyiex mai hoik jhax lawg kah, tom viex nawh hoek ka Mose. Ceu kaux miex nawh mawh Shelawmix kawn bun Dibarix ceu pui Dan.
12 Kix gang ti deuh nawh tom sidah ang kix nyang tawng ka alo Simiang Siyiex mawh pa yuh ka mawx ka kaw an.”
13 Khaix an Simiang Siyiex krai ah nin ka Mose,
14 “Teei ka kaw pa jhax lawg an lih ka plak praix nyiex bang, khaix an kieh pui pa hoik mhong lox pa jhax lawg nawh khawmuik, deuh taix ti piang kaing nawh mai kieh cub pui hun dheem nawh ka simaox.
15 Krai ah nin ka pui Isarelax khankix, can pui pa jhax lawg ka Siyiex tix, tak yaox ti kham geu phimap tix.
16 Can pui pa lud mai nunai ceu kaux Simiang Siyiex tak yaox ti yum tete, cub pui hun tak dheem nawh ka simaox, daux pui ceu pex ang ah, daux pui tang ceu ang ah, phan lud mai nunai ceu kaux Simiang Siyiex, tak yaox ti yum tete.
17 Can pui pa pah ka pui tix kaux kaux tak yaox ti yum tete.Ref 24:17 Lih 21:12.
18 Can pui pa pah ka tobrie tak yaox ti deeh plud tobrie son tobrie mai plud ju son ju.
19 Phan pui tix kaux yuh krax saux mat ka paox plawg ti, tak deeh yuh awm an ka nawh,
20 pot si-ang son pot si-ang, ngai son ngai, rhang son rhang, Ref 24:20 Lih 21:23-25; Pi 19:21; Mat 5:38. awm hoik yuh nawh krax saux mat ka pui tix kaux, tak deeh yuh awm an ka nawh.
21 Pui pa pah tobrie nawh tak deeh yaox ti plud tobrie, pui pa pah ka pui tak yaox ti yum tete.
22 Pex tak yaox ti koe been lox tat jhawm prawng tix ceu khaing son daux pui ceu pexRef 24:22 Si 15:16. ang ah, pui tang ceu ang ah, mawh kheu Aux mawh Simiang Siyiex pex.”
23 Khaix hoik krai Mose ceu an ka pui Isarelax khankix mai kix viex kaw pa hoik jhax lawg an lih ka plak praix nyiex bang mai dheem nawh yum ka simaox. Mawh kheu nan, pui Isarelax khankix yuh awm gumlox pa hoik tawm Simiang Siyiex ka Mose heue.