23
Grawng Pawie Simiang Siyiex
(Si 28:16; 29:40)
1 Simiang Siyiex krai ah nin ka Mose,
2 “Krai ka pui Isarelax khankix, pex tak krai pao pawie Simiang Siyiex, awm pa hoik tat bawg yam sonsang yuh pex pawie pa singax singeh in mawh pawie Aux.”
Grawng Singaix Twah
3 Pex tak yuh kaing ka daux liah singaix, viang mawh nan daux aliah singaix mawh singaix twah singaix laux lee pex tix mai singaix pawie pa singax singeh, pex tak ang pon ti yuh kaing tix ceu kawx, Ref 23:3 Lih 20:8-10; 23:12; 31:15; 34:21; 35:2; Pi 5:12-14. an mawh singaix twah Simiang Siyiex ka can dee ot pex kudah.”
Pawie Pasakha
4 “In khankix mawh pawie Simiang Siyiex, pawie pa yuh pex daux pa singax singeh mai pa sang krai pao pex ti yuh yam hoik hoek bawg yam.
5 Ka daux khix jah, kao pon ngaix plak ponbo, an mawh singaix pawie Pasakha Simiang Siyiex.Ref 23:5 Lih 12:1-13; Pi 16:1-2.
6 Ka daux khix an kao phwan ngaix mawh singaix pawie blah pa ang sau susaixRef 23:6-8 Lih 12:14-20; 23:15; 34:18; Pi 16:3-8. son Simiang Siyiex, pex tak ih blah pa ang sau susaix aliah singaix.
7 Ka daux singaix jah pex tak yuh pawie pa singax singeh tau, pex tak ang pon ti yuh kaing pa dex mai haktiex tix ceu kawx.
8 Pex tak tan krax tan pa gleeing son Simiang Siyiex glang daux aliah singaix an, singaix aliah tak mawh singaix pawie pa singax singeh, pex tak ang pon ti yuh kaing pa dex mai haktiex tix ceu kawx.”
Pawie Plix Khaox Pa Liang
9 Simiang Siyiex krai ah nin ka Mose,
10 “Krai ka pui Isarelax khankix, yam hoek pex ka daux haktiex pa tawx Aux ka pex, phan pex vawg ka nghox khankix, pex tak viex lhiem nghox pa liang pex tix vawg hoek ka cao giex kaing li,
11 sonsang mawh pa rieb ti teei son tang pex, khaix hoik luan khaing daux singaix twah, cao giex kaing li tak yang yeuh lhiem nghox an sivoe Simiang Siyiex.
12 Pex tak pon ti tawx kawn yung mhaing pa hoik naog num pa loig tix mu, son krax tan pa gleeing son Simiang Siyiex ka singaix an, yam yang yeuh nawh ka lhiem nghox.
13 Krax tan phawng nghox ca im pa dex dawd mai to tan an tak mawh phawng nghox ca im pa hoik klao ti tau mai bee kao son ra son khaing tix Epha pa mawh krax tan pa gleeing ka Simiang Siyiex, son pa sioe bhawng, krax tan pa nyaux tak mawh rawm plix siiet pon son tix son khaing tix hing loe awga.
14 Pex tak ang pon ti ih blah, pa yuh ka gaox diag mai plix nghox plix koi pa im khankix tom hoek ka daux singaix ang pex nyang viex ti tan sivoe Siyiex pex, an tak mawh been leeing ju daux doeh ru pex can dee ot pex kudah.”
Pawie Yuh Daux tix Vang Twah
15 “Khaix hoik luan singaix twah daux singaix pasax, khaix hoik viex pex lhiem nghox son krax tan pa yang yeuh, pex tak simin tom grum naog aliah vang twah,
16 khaix hoik luan ngaix twah jah pasax simin kieh naog tix phwan singaix, khaix an pex tak tan krax tan phawng nghox ca im ka Simiang Siyiex.
17 Pex tak viex blah pa yang yeuh ra lon khaing daux nyiex ma tix, kao son ra son khaing tix epha ra Awmie, ka phawng gaox nghox ca im pa hoik yuh sin tau mai susaix, pa mawh plix khaox plix ox pa liang tix plix khankix ka son Simiang Siyiex.
18 Pex tak tan kawn yung iak pa loig pa naog num aliah mu tau mai blah mai kawn mawie mhaing tix mu mai kawn yung ra mu, an tak mawh krax tan pa gleeing son Simiang Siyiex, tau mai krax tan phawng nghox ca im mai krax tan pa nyaux kix mai krax tan pa gleeing ka ngu pa sioe bhawng ka Simiang Siyiex.
19 Pex tak tan kawn pex mhaing tix mu son krax tan pa pluat ploi phimap mai kawn yung pa hoik naog num ra mu son pa sang yuh krax tan pa nhim.
20 Cao giex kaing li tak yang yeuh an tau mai blah, plix khaox plix ox pa liang tix pon son krax tan pa yang yeuh sivoe Simiang Siyiex, tau mai kawn yung iak an ra mu, an khankix tak mawh pa singax singeh son cao giex kaing li ka Simiang Siyiex.
21 Ka daux tix ngaix an pex tak krai pao mawh pawie pa singax singeh ka son pex, pex tak ang pon ti yuh kaing pa dex mai haktiex ti ceu kawx, an tak mawh been leeing ju ka can dee ot pex, daux doeh ru pex.Ref 23:15-21 Lih 23:16; 34:22; Pi 16:9-12.
22 Yam vawg pex nghox ka daux haktiex tix, pex tak ang pon ti vawg ka can pa koe ka daog kaung pex khawmuik, pex tak ang pon ti khrawm nghox pa cod pa roik pa kawn deuk khaix tix, pex tak prah an khankix son pui hot shia mai nyo sinie, Aux mawh Simiang Siyiex pa mawh Siyiex pex.” Ref 23:22 Krub 19:9-10; Pi 24:19-22.
Grawng Pawie Teettawng
23 Simiang Siyiex krai ah nin ka Mose,
24 “Krai ka pui Isarelax khankix ka daux khix aliah, haok khix tix ngaix, pex tak laux lee tix mai twah klaung, pex tak phlu teettawng sonsang doh keud ka mawh pawie pa singax singeh.
25 Pex tak ang pon ti yuh kaing pa dex mai haktiex, mai pex tak yuh krax tan pa gleeing ka ngu ka Simiang Siyiex.”
Singaix Son Pluat Ploi Phimap
26 Simiang Siyiex krai ah nin ka Mose,
27 “Ka daux khix aliah haok khix kao ngaix, mawh singaix yuh pa khyox khaw pa pluat ploi phimap, Ref 23:26-32 Krub 16:29-34. an tak mawh singaix pawie pa singax singeh son pex, pex tak khin ka tokaux tix mai yuh krax tan pa gleeing ka ngu ka Simiang Siyiex.
28 Daux singaix an pex tak ang pon ti yuh kaing ti ceu kawx, mawh kheu an mawh singaix yuh pex krax khyox khaw mai krax pa pluat ploi phimap son tix, sivoe Simiang Siyiex.
29 Mawh kheu pui mawx ang ah, pa ang pon khin tokaux tix singaix an, tak tat nawh khaing daux ceu pui nawh.
30 Pui mawx ang ah pa yuh kaing ti ceuceu ka daux singaix an, Aux tak yuh laux leeing, khaing daux sinax ceu pui nawh.
31 Pex tak ang pon ti yuh kaing ti ceu kawx, an tak mawh been leeing ju ti ju hoik ti ju, can dee ot pex daux doeh ru pex.
32 Singaix an tak mawh singaix twah ot yiien yawg tix mai pex tak khin tokaux ti jah plakbo singaix dim khix an, tom hoek plakbo pasax pex tak priex ti hawt mai twah mhawm mhawm.”
Grawng Pawie Nyiex Gox Bang
33 Simiang Siyiex krai ah nin ka Mose,
34 “Krai ka pui Isarelax khankix, ka daux khix aliah kao phwan ngaix, Ref 23:33-36 Pi 16:13-15. daux aliah singaix an tak mawh singaix pa yuh pex pawie nyiex gox bang son Simiang Siyiex.
35 Ka daux singaix jah an tak mawh singaix pawie pa singax singeh, pex tak ang pon ti yuh kaing pa dex mai haktiex.
36 Pex tak yuh krax tan pa gleeing ka ngu ka Simiang Siyiex aliah ngaix, ka daux singaix daix pex tak yuh pawie pa singax singeh mai pex tak yuh krax tan pa gleeing ka ngu ka Simiang Siyiex, an mawh pawie pa blon ting, pex tak ang pon ti yuh kaing pa dex mai haktiex.
37 In mawh pawie Simiang Siyiex pa hoik tat ti deuh, pawie pa singax singeh pa sang krai pao pex bawg yam sonsang yuh pex krax tan pa gleeing ka ngu ka Simiang Siyiex, pa mawh krax pa gleeing mai krax tan phawng nghox ca im mai krax tan pa nyaux kuceu, daux ngaix mawx ngaix an,
38 lheu khaing singaix twah Simiang Siyiex, pex tak yaox ti yuh krax tan pa appong, krax tan pa yuh sijax mukheu tix sang tan mai krax tan pa koe rhawm pex tix sang tan khawmuik, pex tak tan an khankix ka Simiang Siyiex.
39 Khaix hoik khrawm pex plix nghox plix koi khaing daux haktiex, jah ka daux khix aliah kao phwan ngaix, pex tak yuh pawie Simiang Siyiex aliah ngaix, Ref 23:39-43 Lih 23:16; 34:22. ngaix tix tak mawh ngaix twah sonsang laux lee pex tix mai ngaix daix kawx tak baox mawh ngaix twah sonsang laux lee pex tix.
40 Ka daux ngaix tix maix tak viex plix khaox plix ox pa mhawm, kak khaox jhie yaong, kak khaox pa mhawm lhax khankix mai lhax kak khaox siglai khankix, pex tak yuh krax gaux rhawm sivoe Simiang Siyiex pa mawh Siyiex pex aliah ngaix.
41 Pex tak yuh pawie an ku num son Simiang Siyiex aliah ngaix, an tak mawh been leeing ju ka daux doeh ru pex, pex tak yuh pawie an ka daux khix aliah.
42 Pex tak yaox ti ot ka daux nyiex gox lhax khaox aliah ngaix, can pui pa keh kung khaing ceu pui Isarelax khankix tak yaox ti ot ka daux nyiex gox lhax khaox,
43 sonsang tawng doeh ru pex mawh Aux pa kieh pui Isarelax khankix ot ka daux nyiex gox lhax khaox yam viex Aux kix lih khaing meung Ejiptux, Aux mawh Simiang Siyiex pa mawh Siyiex pex.”
44 Mawh kheu nan, Mose krai pao grawng pawie Simiang Siyiex ka ceu pui Isarelax khankix heue.