22
1 Simiang Siyiex ah nin ka Mose,
2 Krai ka Arun mai kawn simex nawh khankix, sonsang chix tang gwieh kix tokaux ti khaing ceu pa singax singeh ceu pui Isarelax khankix mai son ang kix pon nunai ka min ceu kaux Aux, ka daux ceu an kix, son pa yuh kix mawh pa singax singeh son Aux, Aux mawh Simiang Siyiex.
3 Krai ka kix ah nin, ka daux doeh ru pex khankix ku ju, can pui pa hu dex ceu pa hoik gwieh ceu pui Isarelax mawh pa singax singeh son Simiang Siyiex mai yam koe pa ang singax piang nawh, tak teei ti tik pui an khaing sivoe ngai Aux, Aux mawh Simiang Siyiex.
4 Pui pa koe jhawm saux sipawg ang ah, jhawm saux lih rawm seeing ang ah, doeh ru Arun, tak ang pon ti ih krax tan pa singax singeh, tom ang nawh nyang pon ti singax mai can pui pa hu krox hu teeh ka tokaux yum pa ang singax ang ah mai pui pa hoik lih rawm ngang ang ah,
5 pa hu krox hu teeh ka totiag pa chix mu chix hu pa sang kieh nawh mawh pa ang singax ang ah mai hu krox teeh pui pa sang kieh nawh ang singax ang ah, ceu pa ang nawh singax koe yuh ka mawx kawx,
6 Pui pa hu krox hu teeh ka ceu ankix, tak mawh pa ang singax tom hoek plakbo, nawh tak ang pon ti ih krax tan pa singax singeh khankix, tom ang nawh nyang bax heem tix ka rawm.
7 Nawh tak mawh pa singax yam hoik klip singaix, khaix an nawh tak pon ti ih krax tan pa singax singeh, grawh grawng nawh an mawh pa ih nawh.
8 Nawh tak ang pon ti ih nex pa tang yum, nex pa hoik kiied totiag khankix, sonsang kieh nawh tokaux ti seeing brai ka an khankix, Aux mawh Simiang Siyiex.
9 Mawh kheu nan kix tak priex ti hawt gumlox beenli Aux, phan ang mawh nan, kix tak yaox ti kham geu phimap tix mai yum, Aux mawh Simiang Siyiex pa kieh pex singax singeh.
10 Pui tang ceu tang cat tak ang pon ti ih krax tan pa singax singeh, pui pa hoek ti peung tivud ticu tau mai cao giex kaing li ang ah, siliex pa cang ang ah, tak ang pon ti ih ceu pa singax singeh.
11 Viang mawh nan, phan cao giex kaing li liag pui ka mau, nawh tak pon ti ih an mai pui pa keh ka daux nyiex ma nawh, tak pon ti ih pa ih nawh.
12 Phan kawn bun cao giex kaing li mex ka pui tang ceu, kawn bun an tak ang pon ti ih ka krax tan pa singax singeh.
13 Viang mawh nan, phan kawn bun cao giex kaing li an mawh miexmai ang ah, bun pa hoik tik mex ang ah mai phan nawh ang nyang koe kawn mai phan nawh deeh ing ka nyiex keeing tix, awm yam mawh nawh kawn nyawm, bun an tak pon ti ih pa ih keeing nawh, viang mawh nan, pui tang ceu tak ang pon ti ih.
14 Phan pui kox ih krax tan pa singax singeh mai ang tix tawng, khaix an nawh tak deeh plud tix tan krax tan pa singax singeh ka cao giex kaing li phwan son tix son piang an.
15 Cao giex kaing li tak ang pon ti nunai, ka krax tan pa singax singeh ceu pui Isarelax khankix, pa tan kix ti tawx ka Simiang Siyiex,
16 mai tak ang kieh kix kham geu ka phimap pa hoik lud kix, kheu hoik pon kix ti ih ka krax tan pa singax singeh khankix, grawh grawng nawh Aux mawh Simiang Siyiex pa kieh kix singax singeh heue.”
Krax Tan Pa Rieb Mai Pa Ang Rieb
17 Simiang Siyiex ah nin ka Mose,
18 “Krai ka Arun mai kawn simex nawh khankix mai ka ceu pui Isarelax khawmuik ah nin, can pui pa kaoh khaing daux nyiex ma ceu pui Isarelax khankix ang ah, nyo sinie pa ot tau mai kix ang ah, pa tan krax pa appong son pa tiextu ang ah, son pa tan nawh khawm rhawm tix mai pa tan kix ka Simiang Siyiex pa mawh krax tan pa gleeing.
19 Nawh tak tan ti tawx pa mawh mawie mhaing, yung mhaing ang ah, pex mhaing ang ah pa ang koe dee mat dee ne, tak mawh pa pon ti rieb.
20 Viang mawh nan, can pa hoik koe dee mat dee ne maix tak ang pon ti tan, grawh grawng nawh tak ang pon ti rieb tang maix.Ref 22:20 Pi 17:1.
21 Can pui pa tan krax pa appong son krax tan pa nhim ka Simiang Siyiex, sonsang grum naog lox pa tiextu nawh, krax tan pa koe rhawm nawh khaing tobrie pa eei nawh, mawie ang ah, yung ang ah, an tak mawh pa grum naog, sonsang mawh pa pon ti rieb, an khankix tak kieh nawh mawh pa ang koe dee mat dee ne.
22 Pa dug ngai ang ah, pa pot si-ang ang ah, pa laux maung ang ah, pa uah ang ah, pa ngoi mai pa dao ang ah, tak ang pon ti tan ka Simiang Siyiex, tak ang pon ti yuh krax tan pa gleeing piang khu krub dee tan, son Simiang Siyiex.
23 Maix tak pon ti tan mawie mhaing ang ah, kawn yung iak ang ah, pa hoik nie lheu pakpeung tokaux mai pa cud cha pakpeung tokaux khankix, son krax tan pa koe rhawm tix, viang mawh nan phan an mawh son krax pa tiextu, an tak mawh pa ang pon ti rieb.
24 Maix tak ang pon ti tan pa hoik laux kla, pa hoik phawng, pa hoik pliag mai pa hoik sieh tix khankix ka Simiang Siyiex. Maix tak ang pon ti yuh krax tan ceu an khankix ka daux haktiex pex.
25 Maix tak ang pon rieb ti tan ceu in khankix tix ceu kawx, khaing daux tawm taix pui tang ceu, awm pa mawh blah pa khan maix son Siyiex tix, mawh kheu koe krax pa laux leeing mai koe dee mat dee ne, an khankix tak mawh pa ang pon ti rieb son maix.”
26 Simiang Siyiex ah nin ka Mose,
27 “Yam keh kawn mawie tix mu ang ah, kawn yung tix mu ang ah mai kawn pex tix mu ang ah, tak yaox ti ot tau mai miex tix aliah ngaix, jah khaix daix singaix hu sivoe ngai, an tak rieb ti teei son krax tan pa gleeing, son Simiang Siyiex.
28 Viang mawh mawie shiang ang ah, kawn yung shiang ang ah, paw doh pah an khawm ra mai kawn nawh ka daux tix singaix ngie.
29 Yam tan maix pa appong tix, son krax pa yaogyaw bwanson ka Simiang Siyiex maix tak tan mawh pa pon rieb tix.
30 An tak mawh pa ih ka daux singaix an maix tak ang pon ti deuh an khankix tom hoek plak ponngawb, Aux mawh Simiang Siyiex.
31 Pex tak priex ti hawt gumlox pingnyap Aux khankix mai hawt ti yuh awm an khankix, Aux mawh Simiang Siyiex.
32 Pex tak ang pon ti nunai ka ceu kaux pa singax singeh Aux, viang mawh nan, Aux tak mawh pa singax singeh ka daux sinax ceu pui ceu pui Isarelax khankix, Aux mawh Simiang Siyiex pa kieh pex singax singeh,
33 Aux mawh pa hoik viex pex lih khaing daux meung Ejiptux, sonsang mawh Aux Siyiex pex, Aux mawh Simiang Siyiex heue.”