9
Groi Bee Piang Yehu
1 Cao jhai Elishie kok kawn simex cao jhai tix kaux mai ah nin ka nawh, “Nhawt nyoi maix, teei kawk bee in ka daux taix maix mai hu ka daux veng Ramot haktiex Gilat heue.”
2 Yam hoek maix ka dee an, sawg ti yaox Yehu, kawn simex Yehoshaphat; kawn simex Nimashi mai laig ka dee ot nawh mai kieh nawh yaog ti kaoh hu khaing paox grawm tix khankix mai viex nawh laig ka daux lawg plak daux awx.
3 Khaix an, teei kawk bee viex maix mai groi ka piang kaing nawh ah nin, Siyiex ah nin, “Aux hoik groi bee ka piang maix mai yaog maix mawh simiang ka piang pui Isarelax, ” Khaix an, paoh siviex mai to, paw lai nhim liak.
4 Mawh kheu nan, pui awn ju kawncau cao jhai lih hu ka veng Ramot haktiex Gilat heue.
5 Yam hoek nawh tan, cao kaing kru naing khankix ngawm ti kum tau mai nawh ah nin, “Cao kaing kru naing khankix eue, aux koe lox krai ka pex, ” Mai Yehu deeh ah nin, “Mawh pui mawx ka daux pui yix lie?” Nawh deeh ah nin, “Cao simiang kru naing ting eue, mawh maix heue.”
6 Khaix an, Yehu kaoh mai laig ka daux nyiex mai cao jhai groi bee ka piang kaing nawh mai ah nin ka nawh, “Aux hoik groi bee ka piang kaing maix mai yaog maix mawh simiang ka piang ceu pui Siyiex, pui IsarelaxRef 9:6 1Sim 19:16. khankix heue.
7 Maix tak pah doeh nyiex ma cao simiang maix Ahap, sonsang pon aux tix pawk bix tang nham kawncau cao jhai Aux khankix mai nham kawncau mau soi Siyiex khankix, ka daux Yezabelax heue.
8 Mawh kheu doeh nyiex ma Ahap khawmuik tak laux leeing. Aux tak teei ti tik simex ka daux pui Isarelax khankix mai khawm pa ot ka plak praix khaing Ahap heue.
9 Mawh kheu nan, Aux kieh doeh nyiex ma Ahap awm doeh nyiex ma Yerobom, kawn simex Nebat mai tak baox kieh awm doeh nyiex ma Basha, kawn simex Ahiyax heue.
10 Sox tak ih nex Yezabelax ka daux; gwang haktiex veng YezerelaxRef 9:10 1Sim 21:23. mai pui sipaung tokaux yum kiex ang koe mai nawh paoh siviex mai to heue.”
11 Yehu lih hoek ka kawncau cao simiang tix khankix mai an tix kaux ah nin ka nawh, “Mhawm khawmuik lie? Pui yhot in, hoek ka maix kheu jao grawng patix lie?” Yehu ah nin ka kix, “Pex tawng ka pui an mai tawng lox ceu pa sikah nawh heue.”
12 Kix ah nin, “An mawh lox pie lhen; maix krai ka yix tete, ” Nawh ah nin, “Nawh krai yuh nin ka aux, ka lox pa ah nin, Siyiex ah yuh nin, ” Aux hoik groi bee ka piang kaing maix mai yaog maix mawh simiang ka piang pui Isarelax heue.”
13 Pui ku kaux nied ti peeik kraung ceep tix mai tawm ka piang glawk bawng greem caong Yehu mai kix phlu teettawng ah nin, “Yehu mawh simiang heue.”
14 Mawh kheu nan, Yehu kawn simex Yehoshaphat kawn simex Nimashi tieh feen ka piang Yoram, mawh kheu jao Hazalax simiang haktiex Surix, Yoram mai pui Isarelax khawmuik hoik tiebtie ka veng Ramot haktiex Gilat heue.
15 Simiang Yoram deeh ing ka veng Yezerelax sonsang pai nawh mat tix, pa hoik mat nawh khaing pui Surix yam hu puing nawh ka Hazalax, simiang haktiex Surix heue. Yehu ah nin, “Phan pex khaw rhawm tete, paw kieh pui boek tix klawd tix kaux kawx khaing daux veng, sonsang hu krai nawh grawh grawng ankix ka veng Yezerelax heue.”
16 Yehu brug ling lawx naing brung mai hu ka veng Yezerelax, mawh kheu Yoram nyat tix tan mai Ahaziyax simiang meung Yudax hoek sonsang jhak tix ka Yoram heue.
17 Koe cao pau veng tix kaux cung ka piang nyiex pau ka daux veng Yezerelax mai nawh yaox cub pui Yehu khankix ah nin, “Aux yaox cub pui khankix tix cub heue.” Yoram deeh ah nin, “Kok ka pui naing brung tix kaux mai ploi nawh hu rieb ka kix mai kieh nawh ah nin, koe pa nhim lie?”
18 Mawh kheu nan, pui naing brung hu rieb ah nin, “Simiang ah yuh nin; koe pa nhim lie?” Yehu deeh ah nin, “Koe ang koe pa nhim mawh sang yuh maix tix ka lie? Veeh maix hawt khaix aux khaing heue.” Pui pa pau tix jhak deeh krai grawh grawng an ah nin, “Cao cau hoik hu ka kix tan, viang mawh nan, nawh ang nyang bax hoek heue.”
19 Simiang baox ploi pui naing brung ra kaux tix kaux hu mai hoek ka kix ah nin, “Simiang ah yuh nin Koe pa nhim lie?” Yehu pawk ah nin, “Koe ang koe pa nhim mawh sang yuh maix patix ka lie? Deeh veeh maix hawt khaix aux khaing heue.”
20 Pui pau krai grawng an ka simiang ah nin, “Nawh hoik haok ka kix mai ang nyang bax hoek khaing tan mai ling lawx naing brung phat nawh awm pa phat Yehu, kawn simex Nimashi mai nawh phat kied sidaing phai heue.”
21 Yoram ah nin, “Khre rien tix heue.” Mai kix khre rien ling lawx naing brung, khaix an, Yoram simiang pui Isarelax mai Ahaziyax simiang meung Yudax lih hu tau mai ling lawx naing brung cie kiex mai lih hu rieb ka Yehu mai kix pub nawh ka biang haktiex Nabok pui veng Yezerelax heue.
22 Khaix an, yam yaox Yoram ka Yehu ah nin, “Yehu eue, koe pa nhim lie?” Yehu deeh pawk ah nin, “Pa nhim lai koe yuh ka mawx? Miex maix hoik yuh pa lud vao mai kaing simeed nie ding nie dod heue.”
23 Yoram deeh veeh mai to tix ing mai ah nin ka Ahaziyax, “An mawh krax pa tieh feen heue.”
24 Yehu sau riang tix vaik ak mai puing ka Yoram krox ka plak khaix see sinax klip nawh mai goh ka daux ling lawx naing brung tix heue.
25 Yehu ah nin ka cao kaing naing tix Bidaka, “Sileed ti tik nawh ka daux biang haktiex Nabok, pui veng Yezerelax mai kieh maix doh keud kah, yam brug maix ling lawx brung tau mai aux ka plak khaix keeing nawh Ahap, Siyiex hoik ah ti deuh krax ciyang in ka piang nawh heue.”
26 Aux yaox nham Nabok mai nham kawn simex nawh kawx; Siyiex ah nin, “Aux tak pawk bix ka maix daux biang haktiex in, Ref 9:26 1Sim 21:19. in mawh pa hoik ah Siyiex heue. Mawh kheu nan, yam in teei nawh mai tik ka piang haktiex in, awm gumlox pa hoik ah Siyiex heue.”
Yehu Pah Ahaziyax Yum
(2Been 22:7-9)
27 Yam yaox Ahaziyax meung Yudax ceu in, nawh to hu ka krax Biet Hagan daux sipeem taux mawh kheu nan, Yehu hawt leue nawh ah nin, “Puing nawh ka daux ling lawx naing brung, ” Mai kix hawt puing nawh mat ka blaong veng Gurax, hawt veng Ibalam, khaix an, nawh to ka veng Megidaw mai yum tan heue.
28 Kawncau nawh khankix tang nawh daux ling lawx naing brung ing ka veng Yerusaliem mai sipaung nawh ka daux simeeig keeing nawh ka daux veng Davit heue.
29 Ka daux num yam kwang Yoram kawn simex Ahap ka haktiex kao tix num, Ahaziyax deeh yaog ti mawh simiang ka piang meung Yudax heue.
30 Yam hoek Yehu ka daux veng Yezerelax, Yezabelax mhong ka grawng ceu an mai Yezabelax kraix sidah bhawng mai sat hauk kaing tix mai kok jhak ka plak praix khaing daux siviex iak heue.
31 Yam laig Yehu daux diang siviex, Yezabelax ah nin, “Koe pa nhim ka Zimarix pa pah cao simiang tix lie?”
32 Yehu maong ti jhak ka daux diang siviex iak ah nin, “Mawh pui mawx pa ot plak aux lie? Mawh pui mawx lie?” Pui sieh ra loe kaux kok jhak nawh khaing daux siviex iak heue.
33 Yehu ah nin, “Cot kiex rau!” mawh kheu nan, kix cot kiex rau mai nham kiex hoik phrit ka guh veng mai ka piang brung, mai brung hoik dug dig kiex heue.
34 Yam laig nawh plak daux, nawh hoik ih nyaux, khaix an, nawh ah nin, “Hu yam in, jhak pex sipaung ka bun pa hoik pon pa jhax lawg in, mawh kheu mawh kiex kawn bun simiang ti kaux heue.”
35 Mawh kheu nan, kix hu sipaung ka kiex, viang mawh nan, kix ang yaox tokaux kiex, lheu khaing si-ang kaing mai caong mai taix kiex heue.
36 Kix deeh hoek krai ka nawh mai Yehu ah nin, “In mawh gumlox Siyiex, pa hoik krai Nawh Cao ka kawncau Nawh Eliyax pui veng Tishabix pa ah nin, sox khankix tak ih nex Yezabelax, ka biang haktiex Yezerelax heue.”Ref 9:36 1Sim 21:23.
37 Tokaux yum Yezabelax tak mawh pa awm aing ka daux tong kaung, biang haktiex Yezerelax tom ang kix lai pon tix ah nin, “In mawh Yezabelax heue.”