1 Ahap koe kawn simex atixgliah kaux daux veng Samarix, Yehu tiiem lai tawx hu ka veng Samarix mai ka cao kwang ka veng Yezerelax mai kuad riex ju khankix mai ka pui pa eei ka kawn simex Ahap khankix ah nin, 2 “Yam in awm hoik koe kawn simex cao simiang pex khankix tau mai pex mai pa koe ling lawx naing brung pex khankix mai brung pex khankix mai veng pa kaux cong mai pa koe kraung naing pex khankix, mawh kheu nan, yam hoek lai in ka pex. 3 Laug ti teei kawn simex pa kied mhawm pa kied khaw cao simiang pex mai kieh nawh ngawm ka piang dang ngeung keeing nawh mai puing naing son doeh nyiex ma cao simiang pex heue.” 4 Kix kied koe krax lhat graung ah nin, “Simiang ra kaux ang lai pon cung plak sivoe nawh mai ex sang pon cung yuh ka mawx lie?” 5 Pa mawh cao kaing ka daux nyiex ma mai pa mawh cao kaing ka daux veng mai kuad riex ju an khankix mai pui pa eei kawn simex nawh ploi pui hu ka Yehu ah nin, “Yix mawh siliex cawng maix, yix tak sang yuh can ceu pa krai maix ka yix khawmuik mai yix tak ang lai yaog pui tix kaux kawx mawh simiang, yuh can ceu pa khaw caw ka rhawm maix heue.” 6 Khaix an Yehu baox tiiem lai ka kix ra bawg tix bawg ah nin, “Phan pex mawh pui aux mai cu nghiet lox aux daux bawg yam in pasax, teei kaing pui ankix pa mawh kawn simex cao simiang pex mai hoek ka aux daux veng Yezerelax, ” Yam an kawn simiex simiang khankix atixgliah kaux koe tau mai pui ting daux veng khankix, pa hoik eei ka kix heue. 7 Yam hoek lai ka kix, kix teei kawn simex simiang khankix mai pah kix yum khawm atixgliah kaux mai sau kaing kix ka daux khrawng mai tawx hoek ka daux veng Yezerelax heue. 8 Khaix an, cao cau khankix hoek ka Yehu ah nin, “Kix hoik viex kaing kawn simex simiang khankix hoek heue.” Yehu ah nin, “Pum ti deuh ra pum hawt diang laig daux siviex veng tom hoek ponngawb heue.” 9 Ka daux ponngawb, Yehu lih hu ka plak praix mai cung ah nin ka pui khankix, “Pex mawh pa rahsee heue. Aux hoik tieh feen ka cao simiang tix mai hoik pah nawh yum, viang mawh nan, mawh pui mawx pa hoik pah ka pui inkix khawmuik lie?” 10 “Deuh pex tawng gumlox Siyiex pa hoik sikah Nawh Cao ka grawng pa dex dawd mai doeh nyiex ma Ahap khankix, tak ang mawh pa giex going tix gum kawx, mawh kheu Siyiex hoik yuh ceu an awm pa hoik krai Nawh cao ka kawncau tix Eliyax heue.” 11 Mawh kheu nan, Yehu hoik pah ti tik pui pa kawn deuk khaing doeh nyiex ma Ahap khawmuik ka daux veng YezerelaxRef 10:11 Ho 1:4. mai khawm pui ting lhaong nawh mai paox grawm paox gru pa kied dex mai nawh mai cao giex kaing li khankix, tom ang lai prah kix deuk tix kaux kawx heue.

12 Yehu yaog ti kaoh mai hu ka veng Samarix, daux krax yam hoek nawh ka veng Bietekedax, ka dee ot cub cao liang yung khankix, 13 Yehu sipub ka cub puxaik Ahaziyax, simiang meung Yudax mai chawk kix ah nin, “Mawh pex pui mawx lie?” Mai kix deeh pawk ah nin, “Yix mawh cub puxaik Ahaziyax, yix lih hoek ti yaox ka kawn simex simiang khankix mai ka kawn simex miex laux simiang khankix heue.” 14 Yehu ah nin, “Giex im kix heue.” Mawh kheu nan, kix tom giex im kix tixpon ra kaux mai pah kix yum hawt rawm daux veng Bietekedax mai nawh ang lai prah kix deuk tix kaux kawx heue.

15 Yam lih hu nawh khaing tan, nawh sipub ka Yehonadat kawn simex Rekhap, hoek tix rieb nawh; mawh koe rhawm rahsee maix ka aux awm koe pa rahsee aux ka piang maix lie? Yehonadat deeh pawk ah nin, “Mawh heue.” Yehu deeh ah nin, “Phan mawh nan, yaog taix maix ka aux mai Yehu tuk nawh haok mai tix daux ling lawx naing brung heue.” 16 Khaix an nawh ah nin, “Hu tau mai aux, jhak ti yaox krax pa kied koe rhawm aux ka son Siyiex, ” Mawh kheu nan, kix kieh nawh ngawm ling lawx naing brung tau mai nawh heue. 17 Yam hoek nawh ka veng Samarix, nawh pah can pui pa kawn deuk khaing daux doeh nyiex ma Ahap khawmuik, pa ot ka daux veng Samarix, tom hoik laux lak pak leeing kix awm gumlox Siyiex, pa hoik krai Nawh Cao ka Eliyax heue.

18 Khaix an, Yehu khrawm cub pui hun khawmuik mai ah nin ka kix heue. “Ahap yuh kaing jhaw Balax ceeix ngie khaing, viang mawh nan, Yehu tak sang yuh kaing jhaw nawh tom nie heue. 19 Yam in kok cub cao jhai Balax khawmuik mai kawncau nawh khawmuik mai cub cao giex kaing li nawh khawmuik, hoek ka aux, paw kieh deuk tix kaux kawx, mawh kheu aux koe krax tan appong pa ting ka Balax can pui pa ang hoek khankix tak ang lai deuh im, viang mawh nan, Yehu hoik yuh cuyi tau mai pa keud nawh tix sang pah pui pa krub Balax khankix laux leeing heue.” 20 Yehu ah nin, “Baox cox khre krax yuh pa krub ka son Balax, ” Mawh kheu nan, kix ao krai ka grawng an heue. 21 Khaix an Yehu ploi pui hu kudah kudee ka daux haktiex Isarelax mai pui pa krub ka Balax khankix hoek khawmuik, ang koe pui deuk pa ang hoek tix kaux kawx, mawh kheu nan, kix hoek ka daux nyiex bwan Balax mai pui hoik naog ka daux nyiex bwan Balax jah ka daux plak in tom hoek plak an heue. 22 Yehu ah nin ka cao kaing pa priex kraung ceep, viex kraung ceep ankix tawx ka son pui pa krub ka Balax khankix, mawh kheu nan, nawh viex kraung ceep an tawx son kix heue. 23 Khaix Yehu mai Yehonadat kawn simex Rekhap laig ka daux nyiex bwan Balax mai ah nin ka pui pa krub Balax khankix, “Sawg mai jhak paw lai kieh kawncau mau soi Siyiex koe tin tau mai pex mai kieh mawh ngie pui pa krub ka Balax pa koe tin nong nong heue.” 24 Kix laig ka daux, sonsang tan krax tan pa appong mai krax tan pa gleeing, Yehu hoik deuh pui tidaix kaux ka plak praix ah nin, “Phan pui ankix pa hoik ap aux ka daux tawm taix pex tix kaux kaux pon ti glawd mai pui pa kieh nawh glawd, tak deeh plud ju son ju pui an heue.” 25 Yam hoik tan nawh krax tan pa gleeing, khaix an, Yehu ah nin ka pui pa pau diang khankix heue. “Laig ka plak daux mai pah kix, paw kieh pui tix kaux kawx pon tix lih plak praix, ” Mai pah kix yum ka lawm vaig, khaix an cub cao pau diang mai cub cao kaing naing khankix teei ti tik kix lih mai laig tom ka daux lawg nyiex bwan Balax heue. 26 Kix viex riang grang ankix lih khaing nyiex bwan Balax mai gleeing heue. 27 Khaix an, kix raig riang grang mai yieh nyiex bwan Balax mai yuh dee an mawh dang aing tom hoek daux in singaix heue. 28 Awm an Yehu hoik yuh Balax laux leeing khaing daux haktiex Isarelax heue. 29 Viang mawh Yehu ang lai veeh tix singai khaing phimap phighram pa yuh Yerobom kawn simex Nebat mai pa hoik kieh pui Isarelax khankix lud ka riang kawn mawie khri, pa ot ka daux veng Betelax mai veng Dan heue.Ref 10:29 1Sim 12:28-30. 30 Siyiex ah nin ka Yehu, “Kheu jao yuh maix ceu pa mhawm mai ceu pa khaw caw ka daux ngai Aux mai maix hoik yuh ceu ankix ka doeh nyiex ma Ahap ka ceu pa khaw ka daux rhawm Aux khawmuik, kawn simex maix khankix tak yaox ti ngawm ka piang dang ngeung pui Isarelax tom hoek pon ju heue.” 31 Yehu ang lai cu ti hawt khaix gumlox tat jhawm Prawng Siyiex Isarelax tau mai khawm rhawm rhi tix khawmuik; mawh kheu ang nawh cu ti gah khaing phimap phighram pa hoik yuh Yerobom, pa hoik kieh pui Isarelax khankix lud heue.

32 Ka daux bawg yam singaix ankix, Siyiex hoik jah ti gwieh haktiex Isarelax mai Hazelax hoik pex ka dah dee pa hoik kwang pui Isarelax khawmuik, 33 Jah khaing plak lih singaix rawm klawng Yawdan mai haktiex Gilat khawmuik, dee ot pui Gilat, pui Rubin mai pui Manashe khankix, jah khaing veng Araw hawt rawm klawng Anon mai khawm haktiex Gilat haktiex Bashan khawmuik heue. 34 Yam in, grawng kaing pa kawn deuk Yehu mai can ceu pa yuh nawh khawmuik mai pa hoik koe riang rao nawh khawmuik, ang hoik mawh pa tiiem tix ka daux phuk lai been cub simiang pui Isarelax lie? 35 Mawh kheu nan, Yehu hoik laux lee tix tau mai keeing nawh khankix mai kix sipaung nawh ka daux veng Samarix, khaix an, kawn simex nawh Yehohaza deeh plud tix kwang ka dah dee ot nawh heue. 36 Baux yam kwang Yehu ka pui Isarelax daux veng Samarix koe tixnga daix num heue.