8
Haktiex Cie Bun Veng Shunam
1 Khaix an Elishie sikah ka bun pa hoik deeh kieh nawh kawn simex nawh deeh imRef 8:1 2Sim 4:8-37. ah nin, “Maix kaoh hu mai khrawm pui daux nyiex ma maix khankix, hu peung ka dee sang pon peung maix ti ot tix dahdah, mawh kheu Siyiex hoik tawm pa sang koe krax sibhawm praix, lheu khaing an krax sibhawm praix tak lih ti koe ka piang haktiex in aliah num heue.”
2 Mawh kheu nan, bun an yaog ti kaoh mai yuh ceu ankix awm pa hoik ah pui Siyiex mai nawh lih hu tau mai pui daux nyiex ma tix khankix mai hu peung ka daux haktiex pui Philitix khankix aliah num heue.
3 Khaix hoik sidah aliah num, bun an deeh ing khaing haktiex pui Philitix mai nawh hu khyox khaw mhaing nyiex nawh mai haktiex nawh ka simiang heue.
4 Yam an simiang krai lox tau mai Gehazix kawncau pui siyiex ah nin, “Yuh bwanson krai aux mhong ceu pa kied ting kied lhaong pa hoik yuh Elishie liak!”
5 Nawh krai grawng hoik deeh kieh pui yum deeh im ka simiang mai grawng hoek bun pa hoik kieh kawn simex kiex deeh im, sang khyox khaw ka simiang, son grawng nyiex ma kiex mai haktiex kiex mai Gehazix deeh ah nin, “Cao simiang mai simiang aux eue, in mawh bun an mai kawn simex kiex pa hoik deeh kieh Elishie nawh deeh im heue.”
6 Yam chawk simiang ka bun an, kiex deeh krai simiang mhong grawng ankix khawmuik, mawh kheu nan, simiang yaog ti deuh cao kaing son kiex ah nin, “Deeh tawx can ceu pa mawh cie kiex khawmuik mai deeh sawn tix tawx can ceu pa lih khaing tong kaung kiex khankix, jah khaing daux singaix hoik lih hu kiex khaing daux haktiex in tom hoek yam in heue.”
Hazalax Mawh Simiang Surix
7 Khaix an, Elishie hu ka veng Damase mai Benhadat simiang haktiex Surix saux mai kix krai gawng hoek pui Siyiex ka nawh ah nin, “Pui siyiex hoik hoek tin heue.”
8 Simiang ah nin ka Hazalax, “Teei ti viex totaix ka daux taix maix mai hu pub ka pui Siyiex mai kiex chawk ti yaox ka Siyiex ah nin, mawh sang deeh pon moi aux khaing jhawm saux in lie?”
9 Mawh kheu nan, Hazalax lih hu sonsang pub tix ka nawh mai nawh teei ti viex totaix ceu pa mhawm khankix kuceu hu tau mai tix khaing daux veng Damase mai tang ka piang kala uk tixpon mu mai nawh hoek mai cung sivoe nawh ah nin, “Kawn simex maix Benhadat simiang haktiex Surix ploi aux hoek ka maix ah nin, mawh sang deeh pon moi aux khaing jhawm saux in lie?”
10 Elishie deeh ah nin ka nawh, “Hu krai ka nawh maix tak deeh pon moi tete, ” Viang mawh nan, Siyiex hoik jhi aux yaox ka tak sang yum nawh tete heue.
11 Nawh jeung ngai tix jhak ka nawh, tom hoik kaig nawh mai pui Siyiex yiiem heue.
12 Hazalax ah nin, “Simiang aux yiiem kheu jao patix lie?” Nawh deeh pawk ah nin, “Mawh kheu aux tawng ka pa caox caig pa tak sang yuh maix ka kawn praix pui Isarelax khankix maix tak gleeing ka dee kaux cong kix ka ngu mai maix tak pah ka pui awn ju kix yum ka vaig mai maix tak siblat kawn nyawm ka piang tiex mai maix tak pih vaig bun pa koe kaux khankix heue.”
13 Mawh kheu nan, Hazalax deeh ah nin, “Khex sang pon yuh grawng see pa ting yuh nin lie?” Elishie deeh pawk lox ah nin, “Siyiex hoik jhi aux yaox, ka tak sang pon maix ti mawh simiang piang haktiex Surix heue.”
14 Khaix an, Hazalax lih hu khaing Elishie mai deeh ing hoek ka simiang nawh mai simiang nawh chawk ah nin, “Hoik ah Elishie ceu patix ka maix lie?” Nawh deeh pawk ah nin, “Nawh hoik krai aux mhong ka tak sang moi maix tete heue.”
15 Ka daux singaix khaix, nawh teei man pu tix pheen cub ka rawm mai kheem ka piang ngai simiang, khaix an, simiang yum mai Hazalax plud ti kwang haktiex ka dah dee ot nawh heue.
Krax Kwang Yehoram Ka Yudax
(2Been 21:1-20)
16 Ka daux num hoik kwang Yoram kawn simex Ahap simiang pui Isarelax khankix daux phwan num, Yehoshaphat mawh simiang ka daux haktiex meung Yudax, khaix an Yoram kawn simex Yehoshaphat jah ti yuh simiang ka daux haktiex meung Yudax heue.
17 Nawh koe ju tixngoe ra num, yam yaog nawh tix mawh simiang, nawh kwang ka daux veng Yerusaliem daix num heue.
18 Nawh hu ka daux krax pa hoik yuh cub simiang pui Isarelax khankix, awm krax pa yuh daux nyiex ma Ahap, mawh kheu nawh teei ti moeng kawn bun Ahap mai nawh yuh ceu pa caox caig ka daux ngai Siyiex heue.
19 Siyiex tak ang lai yuh meung Yudax laux leeing, kheu jao min ceu kaux kawncau nawh simiang Davit, awm hoik tawx Nawh Cao sijax mukheu ka nawh sonsang ang kawk ngu pa riang Nawh Cao lai jud ka daux kawn simex nawh khankix leeing ju heue.Ref 8:19 1Sim 11:36.
20 Glang bawg yam singaix kwang nawh, meung Edom yaog tix tieh feen ka simiang YudaxRef 8:20 Jah 27:40. mai kix tang deeh yaog simiang tix kaux ka piang cao kix heue.
21 Yoram lih hu ka veng Zairax, tau mai ling lawx naing brung nawh khankix mai nawh yaog ti kaoh ponsawm mai puing ka pui Edom khankix, pa lai lawm ka nawh, mai cub cao kaing naing ling lawx naing brung khankix, viang mawh nan, pui Edom khankix hoik tang to ka plak nyiex gox ot tix heue.
22 Pui Edom hoik tieh feen ka meung Yudax tom hoek daux in singaix mai meung Libana deeh yaog ti tieh feen ka kix ka daux bawg yam an heue.
23 Grawng kaing pa deuk simiang Yoram mai can ceu pa yuh nawh khankix, ang mawh pa tiiem tix ka daux phuk lai been simiang meung Yudax lie?
24 Yoram laux lee tix tau mai keeing nawh mai sipaung tau mai keeing nawh ka daux veng Davit, khaix an, kawn simex nawh Ahaziyax hoik deeh plud ti kwang khaix dee ot nawh heue.
Krax Kwang Ahaziyax Ka Yudax
(2Been 22:1-6)
25 Ka daux num yam kwang Yoram kawn simex Ahap; simiang meung Isarelax kao ra num, Ahaziyax kawn simex Yehoram simiang meung Yudax hoik jah ti kwang ka haktiex heue.
26 Ahaziyax koe ju tixnga ra num, yam mawh nawh simiang, nawh kwang ka daux veng Yerusaliem tix num, ceu kaux miex nawh mawh Athaliyax kawn saux bun Onerix, simiang meung Isarelax heue.
27 Nawh hu ka daux krax pa hoik yuh Ahap mai hoik yuh ceu pa caox caig ka daux ngai Siyiex, awm pa hoik yuh paox nyiex ma Ahap khankix kheu jao mawh nawh kheue Ahap heue.
28 Nawh hu tau mai Yoram kawn simex Ahap sonsang yuh naing ka Hazalax, simiang meung Surix, ka daux veng Ramot haktiex Gilat mai pui Surix hoik kieh Yoram mat heue.
29 Khaix an, simiang Yoram deeh ing ka veng Yezerelax, sonsang pai dee mat tix khaing cub pui Surix, hawt veng Ramax, yam hu puing nawh ka Hazalax simiang haktiex Surix mai Ahaziyax kawn simex Yehoram simiang meung Yudax, lih hu jhak Yoram, kawn simex Ahap ka daux Yezerelax, mawh kheu saux nawh heue.