5
Grawng Hoik Moi Saux Sipawg Ne Man
1 Yam in Ne man pa mawh cao kaing naing ting cub kru naing simiang meung Surix, mawh pa kied ting lhaong mai mawh pui pa koe min ka plak sivoe ngai simiang nawh, mawh kheu Siyiex tawx krax pa pex nawh ka son meung Surix, nawh baox mawh pui pa ting riang rao mai pa koe rhawm kwa rhawm vao tix kaux, viang mawh nan, nawh mawh pui pa koe jhawm saux sipawg tix kaux heue.
2 Cub pui Surix khankix lih hu puing naing mai giex ti viex bun pa awn ju tix kaux khaing daux meung Isarelax, nawh mawh kawncau moeng Ne man tan heue.
3 Kawn bun an ah nin ka miex cao nyiex tix, “Phan cao simiang aux pon ti ot tau mai cub cao jhai pa ot ka daux veng Samarix! mawh kheu cao jhai an, tak pon pai nawh moi khaing jhawm saux sipawg in heue.”
4 Ne man laig ka dee ot simiang cao tix mai krai nawh mhong ah nin, “Bun Isarelax an hoik ah awm Grawng pa yuh nin, ”
5 Mawh kheu nan, simiang meung Surix ah nin, “Hu yam in heue, aux sang tiiem ti tawx lai tix pheen ka simiang pui Isarelax, ” Mawh kheu nan, Ne man lih hu khaing tan mai viex mau kao talantan, khri liah rheng shekhe mai kraung ceep kao jung tau mai tix heue.
6 Nawh viex lai an hu ka simiang pui Isarelax pa hoik tiiem ah nin, “Yam in koe krax keud krax sawn yam bleeh lai in ti hoek ka maix, Grawng ploi aux kawncau tix Ne man hoek ka maix, sonsang pon pai maix nawh khaing jhawm saux sipawg nawh heue.”
7 Yam phat simiang pui Isarelax ka lai an, nawh riah kraung ceep tix ah nin, “Mawh aux Siyiex pa chix kieh pui yum mai pa deeh kieh pui im ju, kheu pui in hoik ploi pui hoek ka aux, sonsang pai nawh moi khaing jhawm saux sipawg nawh lie? Mawh kheu nan, yuh bwanson keud ti yaox mai nawh sawg krax simah simiang ka aux heue.”
8 Ceu ankix hoik lih ti mawh yam mhong Elishie ka riah simiang pui Isarelax kraung ceep tix nawh ploi pui hu ah nin ka simiang, “Maix hoik riah ti tik kraung ceep tix kheu jao patix lie? Yuh bwanson kieh pui an hoek ka aux mai nawh tak sang tawng ka koe cao jhai tix kaux ka daux meung Isarelax heue.”
9 Khaix an, Ne man lih hu tau mai brung nawh khankix mai khawm ling lawx naing brung cie nawh khankix mai nawh cung diang siviex nyiex Elishie heue.
10 Elishie ploi cao cau nawh tix kaux hoek ka nawh ah nin, “Hu mai heem maix ka daux rawm klawng Yawdan aliah bawg mai nex nham maix tak deeh mawh pa mhawm ka son maix mai tokaux maix tak deeh mawh pa singax heue.”
11 Viang mawh nan, Ne man kied koe krax pa song rhawm nawh deeh veeh ti hu ka plak dee singai ah nin, “Aux keud ah nin ka daux rhawm tix tete, nawh tak mawh pa caw ti lih hoek ka aux, cung mai kok ka ceu kaux Siyiex nawh mai vuh vied taix tix ka piang dee saux an mai pai ka jhawm saux sipawg aux heue.
12 Ang awm klawng Abana mai rawm klawng Phapa khankix, pa koe ka daux haktiex Damase, mawh pa nie lheu mhawm khaing can rawm klawng pa koe ka daux Isarelax lie? Mawh ang aux pon khoek tix daux rawm klawng ankix mai deeh pon tix singax lie? Mawh kheu nan, nawh deeh veeh ti ing khawm song rhawm tix heue.”
13 Kawncau nawh khankix greed tix hoek dex mai ah nin ka nawh, “Keeing aux eue, phan cao jhai hoik krai sonsang yuh ceu pa ting lhaong ti ceuceu, mawh ang maix yuh ceu ankix lie? Khaix an, mawh ang maix caw ti yuh ceu pa nie lheu khaing an yam ah nawh lie? Heem mai deeh mawh pa singax heue.”
14 Mawh kheu nan, Ne man lih hu mai com cao tix ka daux rawm klawng Yawdan aliah bawg, awm gumlox pa ah pui Siyiex; mai nex nham nawh hoik deeh mhawm awm nex nham kawn nyawm iak tix kaux; mai nawh hoik singax heue.Ref 5:1-14 Luk 4:27.
15 Khaix an nawh deeh ing ka pui Siyiex mai cao pa teem pa coi ka nawh khankix mai kix deeh hoek mai cung ka plak sivoe nawh ah nin, “Yam in aux tawng ka ang siyiex tang kaux lai koe ka piang haktiex in, lheu khaing daux haktiex Isarelax tete; mawh kheu nan, yuh bwanson rieb ti teei totaix in tix ceu khaing kawncau maix liak!”
16 Elishie an nin, “Awm pa im ju Siyiex ka kaw pa cung aux ti ot sivoe Nawh, aux tak ang lai pon ti priex tix ceu kawx, ” Mai Ne man baox khin nawh teei kraung ankix, viang mawh nan, nawh thiang ka heue.
17 Ne man deeh ah nin, “Phan ang mawh nan, yuh bwanson kieh aux kawncau maix deeh tang ti viex tiex baoh tin ing ra mu law liak; mawh kheu aux kawncau maix tak ang lai tawx krax tan pa gleeing ang ah mai krax tan pa appong tix khankix ang ah, ka siyiex tang kaux khankix, lheu khaing Siyiex heue.
18 Ka daux ceu inkix, kieh Siyiex pluat phimap kawncau maix, yam hu laig Cao simiang aux ka daux nyiex bwan Rimmon, sonsang krub tan mai nawh neung tix ka piang khawn taix aux mai phan aux yaox ti krub ka daux nyiex bwan Rimmon mai yam krub aux ka daux nyiex bwan Rimmon, yam an kieh bwanson Siyiex pluat phimap kawncau maix ka daux ceu inkix heue.”
19 Nawh deeh ah nin ka nawh, “Hu ka daux pa nhim heue.” Mawh kheu nan, nawh lih hu khaing nawh mai hoek ka daux pa ang singai tix dah heue.
Pa Kied Ghoing Rhawm Gehazix
20 Gehazix kawncau Elishie pa mawh pui Siyiex ah nin, “Jhak heue, Cao simiang aux deeh ploi Ne man, pa mawh pui Surix in mai ang lai cu ti rieb pa viex nawh khankix, khaing daux taix nawh; aux tak to ti hawt khaix nawh, mai teei ti cie tix ceuceu khaing nawh heue.”
21 Mawh kheu nan, Gehazix hawt khaix Ne man, yam yaox Ne man to nawh ti hawt khaix tix, nawh lih khaing ling lawx naing brung tix, rieb ka nawh ah nin, “Mawh mhawm khawmuik lie?”
22 Gehazix deeh ah nin, “Mhawm khawmuik, cao simiang aux deeh ploi aux deeh hoek ka maix mai nhie aux ah nin, pui awn ju ra kaux pa mawh kawn simex cub cao jhai khankix taug khraox hoek ka aux ka piang gawng Epharem yam in, yuh bwanson tawx mau pa viex maix khankix tix talantan mai kraung ceep pa sang loh kix ra jung liak!”
23 Ne man deeh ah nin, “Yuh bwanson teei maix viex mau ra talantan, ” Mai nawh khyox khaw ka nawh mai puak ti sau mau ankix dau bau mau tau mai kraug ceep pa loh kix ra jung mai nawh tawx ka kawncau nawh ra kaux; mai kiex klawm ankix hu ka plak sivoe nawh heue.
24 Yam hoek kix hawt guh veng, teei ankix mai hu deuh ka daux nyiex, khaix an, nawh deeh kieh kix hu mai kix lih hu heue.
25 Gehazix laig ka daux nyiex mai cung ka plak sivoe simiang tix mai Elishie ah nin ka nawh, “Gehazix eue, mawh hu maix dee mawh lie?” Nawh ah nin, “Kawncau maix ang tie hu dee mawx tix heue.”
26 Khaix baox deeh ah nin ka nawh, “Mawh ang rhawm aux hu tau mai yam deeh veeh pui an ti lih khaing ling lawx naing brung nawh, sonsang rieb nawh ti yaox maix lie? Khex mawh bawg yam sonsang rieb tix mau mai rieb tix kraung ceep mai rieb tix sipeem khaox sanlon khankix mai khawm sipeem plix siiet, yung mai mawie khankix mai khawm siliex simex bun khankix lie?”
27 Mawh kheu nan, jhawm saux sipawg Ne man tak deeh haok ka piang maix mai ka piang doeh ru maix khankix leeing ju mai Gehazix lih hu khaing ka plak sivoe ngai nawh mai hoik pon ti jhawm saux sipawg pa hoik paing awm rawm rha heue.