6
Sibloe Kaing Moe Daux Rawm heue.
1 Cub kawn simex cao jhai khankix ah nin ka Elishie, “Yam in jhak dee ot koe yix, hoik kied sikhawp ka son yix heue.”
2 Yuh bwanson kieh yix hu hawt rawm klawng Yawdan liak! Mai kieh pui ku kaux kid ti teei khaox khankix khaing tan mai kieh yix yuh dee tix dah sonsang mawh dee sang pon yix ti ot, mai nawh deeh pawk ah nin, “Hu heue.”
3 Pui tix kaux ah nin, “Yuh bwanson nyhap rhawm hu tau mai kawncau khankix liak!” Mai nawh deeh pawk, “Aux tak sang hu heue.”
4 Mawh kheu nan, nawh hu tau mai kix, yam hoek kix hawt rawm klawng Yawdan, kix gu pang khaox khankix goh heue.
5 Yam gu pui tix kaux ka pang khaox tix pang, kaing moe shiao nawh cod daux rawm mai nawh riag yo ah nin, “Amiex eue, simiang eue, moe an mawh kraung pa vai aux heue.”
6 Pui Siyiex deeh ah nin, “Mawh cod see dee mawx?” Nawh jhi Elishie yaox dee cod moe an, Elishie kid khaox tix gawng mai taing ka dee an mai kieh moe an sibloe ti lih ka piang rawm heue.
7 Nawh ah nin, “Sut ti teei an son cao maix, ” Nawh nyeu taix tix sut ti teei moe an heue.
Pui Isarelax Giex Pui Dug Ngai Surix
8 Yam in simiang meung Surix yuh naing ka meung Isarelax mai kum tau mai kawncau nawh khankix ah nin, “Dee peung pan tab aux khankix, tak mawh baoh tan tix dah heue.”
9 Pui Siyiex hoik ploi pui hu ka simiang pui Isarelax ah nin, “Yuh satix maix, son ang maix pon tiang ti hu see dee in, mawh kheu cub pui Surix khankix lih dung ti hoek tan heue.”
10 Simiang pui Isarelax deeh ploi pui tix kaux khaing daux kix, hu ka dee pa krai pui Siyiex an ka nawh, mawh kheu nan, nawh tawx satix ka nawh mai nawh pau ti jhak baoh tan, pa hoik tawx nawh satix khankix ang lai joeng mawh tix bawg ra bawg heue.
11 Mawh kheu nan, simiang Surix kied koe krax pa laux rhawm son grawng ceu inkix mai nawh kok ka kawncau tix khankix ah nin, “Mawh ang pex pon jhi aux yaox pui pa ot plak simiang pui Isarelax khankix khaing daux cub ex lie?”
12 Kawn nawh tix kaux ah nin, “Simiang eue, O! cao simiang aux eue, ang koe tix kaux kawx, viang mawh nan, cao jhai Elishie pa ot ka daux meung Isarelax, mawh cao pa krai gumlox pa hoik sikah maix khankix ka daux lawg it tix ka simiang Isarelax heue.”
13 Nawh deeh ah nin, “Hu jiang ti yaox dee ot nawh, aux tak sang ploi pui khankix hu giex ka nawh, ” Mai koe pui krai ka nawh ah nin, “Nawh ot ka daux veng Dawtan heue.”
14 Mawh kheu nan, nawh ploi pa ting riang cub pui naing ling lawx brung khankix hu tan, kix hoek tan plak pon sawm mai lai lawm ka veng heue.
15 Yam kaoh kawncau pui Siyiex ka plak praix ponngawb caocao, nawh yaox ka cub kru naing tix cub lai lawm ka veng, tau mai pui naing brung, cub pui naing ling lawx brung khankix mai kawncau nawh ah nin ka nawh, “Amiex eue, cao simiang eue, sang yuh ex ka mawx lie?”
16 Elishie pawk ah nin, “Paw lhat graung, mawh kheu pui pa ot tau mai ex nie lheu khaing pui pa ot tau mai kix heue.”
17 Elishie rawg bwan ah nin, “Siyiex eue! aux rawg maix paoh ngai nawh, kieh nawh chix yaox liak!” Siyiex paoh ngai pui awn ju an mai nawh jhak hoik yaox gawng lua hoik naog ka brung ngu mai ling lawx naing ngu khankix, hawt vung viang Elishie heue.
18 Yam rob pui Surix khankix ka nawh, Elishie rawg bwan ka Siyiex ah nin, “Aux rawg Maix kieh pui inkix dug ngai, ” Nawh Cao kieh kix dug ngai awm lox rawg Elishie bwan heue.
19 Elishie ah nin ka kix, “In ang mawh krax mai ang mawh veng an, hawt khaix aux mai aux tak viex pex hoek ka pui sawg pex heue.”
20 Ceu ankix lih ti mawh yam hoek kix ka veng Samarix mai Elishie deeh ah nin, “Siyiex eue, paoh Ngai pui inkix kieh kix deeh yaox liak.” Siyiex deeh paoh ngai kix mai kix deeh chix yaox khawmuik mai kix tawng ka ot tix ka daux veng Samarix heue.
21 Yam yaox simiang Isarelax ka kix, nawh ah nin ka Elishie, “Keeing aux eue, mawh sang pah aux kix yum lie?”
22 Nawh pawk ah nin, “Maix tak ang pon ti pah kix yum, mawh sang pah maix pui pa giex maix ti viex awm pui pa laung maix khankix, ka lawm vaig maix; khawm ka ak maix lie? Tawx kix ih, nyaux, mai kieh kix deeh ka simiang kix heue.”
23 Nawh khan kix ih priex mai khaix hoik ih, nyaux kix, nawh ploi kix hu singai ka simiang kix, khaix an cub kru naing Surix khankix ang lai hoek ka haktiex pui Isarelax heue.
Pui Surix Lai Lawm Veng Samarix
24 Benhadat simiang haktiex Surix deeh khrawm cub kru naing nawh khankix mai lih hu lai lawm ka veng Samarix heue.
25 Sibhawm praix pa kied ting koe ka daux veng Samarix mai kix lai lawm ka veng an, tom hoek ka bawg yam hoik coh kix kaing la tix mu tidaix shekhe ka mau mai kram tix mawk phwan shekhe ka mau heue.
26 Khaix an yam lailing simiang Isarelax ka piang guh veng, bun tix kaux riag yo ka nawh ah nin, “Simiang aux eue, teem aux liak.”
27 Nawh ah nin, “Phan Siyiex ang teem maix, aux tak pon sawg krax teem son maix khaing dee mawx lie? Mawh kaoh khaing daux gwang pah nghox lie? Phan ang mawh nan, khaing daux dung biiet rawm plix siiet lie?”
28 Simiang deeh chawk nawh ah nin, “Maix koe krax kha rhawm ceu patix lie?” Bun an deeh pawk lox ah nin, “Bun in ah nin ka aux, Tawx kawn simex maix sonsang ih ex ka in singaix mai tak ih kawn simex aux pasax heue
29 Mawh kheu nan, yix hoik ngaik ti ih kawn simex auxRef 6:29 Pi 28:57. mai aux ah nin ka nawh ka daux singaix khaix, tawx kawn simex maix sonsang ih yix nawh, viang mawh nan, nawh mox ka kawn simex tix heue.”
30 Yam mhong simiang ka lox bun an, nawh riah kraung ceep tix mai lailing ka piang guh veng, pui khankix jhak mai yaox ka ceep nawh chee ka greem tokaux tix heue.
31 Simiang ah nin, “Phan kaing Elishie kawn simex Shaphat kawn koe ka piang tokaux cao nawh ka daux in singaix, kieh Siyiex yuh awm ceu an ka aux lheu khaing an heue.”
32 Elishie kawn ngawm ka daux nyiex mai kuad riex ju khankix ngawm tau mai nawh, simiang ploi pui tix kaux hu ka plak sivoe nawh, sivoe sang hoek cao cau an, Eliishie ah nin ka cub kuad riex ju khankix, “Yaox pex ka kawn simex cao pa pah pui in tix kaux pa ploi pui hoek sonsang kid tix viex kaing aux hu dee singai lie? Jhak! yam hoek cao cau an, nyeep siviex mai giex nawh daux diang siviex, ang mawh lox diang caong simiang nawh pa hoek ka plak khaix nawh lie?”
33 Yam kawn sikah nawh tau mai kix, cao cau an bleeh ka nawh nin, “Krax pa kha rhawm in mawh pa kaoh khaing Siyiex tete, aux lai kawn krox jun ka Siyiex yuh ka mawx lie?”