4
Elishie Mai Bee Miexmai
1 Bun tix kaux pa mawh moeng kawn simex cao jhai khankix yiiem ka Elishie ah nin, “Mex aux kawncau mau soi maix hoik yum mai maix tawng ka lhat graung kawncau maix ka Siyiex mai cao pa tawx ceuk hoek ti teei kawn simex aux ra kaux, sonsang mawh siliex tix heue.”
2 Elishie ah nin ka miexmai, “Sang kieh maix aux yuh ceu patix ka son maix lie? Krai aux mhong koe ceu patix ka daux nyiex maix lie?” Mai miexmai ah nin, “Kawncau maix ang koe tidtix, lheu khaing ngoi bee tix mu khaing pa koe daux nyiex heue.”
3 Khaix an, Elishie ah nin, “Hu heue, teei maix vai aw khaing paox plawg maix khawmuik, kieh mawh aw pa yi, paw vai ngie ceeix ceeix awx.”
4 “Khaix an maix laig ka daux nyiex mai nyeep siviex ka plak khaix tix tau mai kawn simex maix; mai rauk rawm bee ka daux aw khankix mai deuh pa hoik naog praok maix heue.”
5 Bun an lih hu khaing nawh mai nyeep siviex ka plak khaix tix tau mai kawn simex nawh; pa hoik teei ti viex aw tawng an khankix hoek ka nawh mai nawh rauk rawm bee ka daux aw ankix heue.
6 Khaix an, yam hoik naog aw ankix, bun an deeh ah nin ka kawn simex tix, “Baox viex aw hoek ka aux heue. Nawh ah nin, “Aw pa yi ang lai koe heue.” Mawh kheu nan, bee hit ang lai lih heue.
7 Bun an hoek krai ka pui Siyiex mai nawh ah nin, “Hu coh bee an khankix mai viied ceuk maix kah, eei ju maix khawm kawn simex maix ka pa kawn deuk heue.”
Elishie Kieh Kawn Simex Deeh Im
8 Tix singaix; Elishie hu ka veng Shunam, dee ot bun pa mi tix kaux mai bun an khin nawh ih priex preem, mawh kheu nan, nawh brax hoek tan ti vud ti vud, yie viex ti ih priex preem tan heue.
9 Bun an ah nin ka mex tix, “Yam in jhak heue, aux tawng ka pui pa yie tiang ti hoek ka baoh ex sijheeng mawh pui Siyiex pa singax singeh tix kaux heue.
10 Yuh bwanson kieh ex yuh lawg plak piang tix mu mai yuh ti deuh dee it ka son nawh tan mai pheen khawm khaox ngawm mai jawk ten tix mu, mawh kheu yam hoek nawh ka ex yam mawh ang ah, nawh tak laig ka daux lawg plak piang an heue.
11 Ka daux tix singaix, yam hoek nawh tan mai nawh veh laig ka daux lawg plak piang mai nyat tix heue.
12 Khaix an nawh ah nin ka kawncau tix Gehazix, kok ka bun Shunam heue. Yam kok nawh bun an hoek, bun an cung ka plak sivoe Elishie heue.
13 Elishie ah nin ka kawncau tix, “Ah nin ka bun an, maix hoik nyhap rhawm rhi tix khre rien ka yix, sang yuh aux ceu patix son maix lie? Sang kieh maix aux sikah tang tix ka simiang, phan ang mawh nan, ka cao kaing kru naing khankix lie? Bun an deeh pawk ah nin, “Aux hoik nyawm ot sinax ceu pui tix khankix heue.”
14 Elishie deeh ah nin, “Phan ang mawh nan, sang pon yuh ex tix tawx ceu patix ka son bun an lie? Gehazix deeh ah nin, “Bun in ang koe kawn simex tix kaux kawx mai mex nawh kawx hoik kuad heue.”
15 Nawh ah nin, “Baox kok nawh hoek, “Yam hu kok nawh bun an hoek, bun an cung ka daux diang siviex heue.
16 Elishie deeh ah nin, “Ka daux num khaix bawg yam in maix tak yaox ti teem kawn simex tix kaux mai bun an deeh ah nin, Cao simiang aux mai pui Siyiex eue, paw doh pie lhen ka kawncau bun maix yuh nan liak!”
17 Bun an koe kaux mai nawh keh kawn simex tix kaux, yam hoek bawg yam pa krai Elishie ka nawh heue.
18 Kawn simex an ting sipie, ka daux tix ngaix, nawh lih hu ka keeing tix mai ka cao pa vawg nghox khankix heue.
19 Nawh ah nin ka keeing tix, “Keeing aux, keeing aux, ” Mawh kheu nan, keeing nawh ah nin ka kawncau tix, “Viex nawh ing ka miex nawh heue.”
20 Yam viex kix kawn simex an ing ka miex nawh, nawh ngawm ka piang ngawng miex tix tom hoek greung ngaix mai khaix an nawh yum heue.
21 Miex nawh teem nawh haok ka plak piang mai deuh nawh ka piang dee it pui Siyiex mai nyeep siviex lih hu plak praix heue.
22 Khaix an, nawh kok ka mex tix ah nin, “Yuh bwanson ploi pui awn ju tix kaux hoek ka aux tau mai la tix mu, sonsang nied aux ti hu ka pui Siyiex mai deeh nied ti hoek phaiphai heue.”
23 Mex nawh ah nin, “In ngaix ang nyang mawh haok khix khraox mai singaix twah maix sang hu ka nawh yuh ka mawx?” Nawh ah nin, “Ang yuh tidtix, mhawm heue.”
24 Nawh sau an brug tix ka piang la mai ah nin ka kawncau tix, “Grheu la hu phaiphai, phan aux ang nyang ah tidtix ka maix paw nyang nhim heue.”
25 Kheu nan, nawh lih mai hu ka pui Siyiex ka piang gawng Khamelax mai yam yaox pui Siyiex ka yam hoek nawh dee singai, nawh ah nin ka kawncau tix Gehazix, “Bun veng Shunam hoek heue.”
26 “Yuh bwanson yam in to ti rieb nawh mai ah nin ka nawh, nyawm ot maix lie? Nyawm ot mex maix lie? Nyawm ot kawn simex maix lie?” Mai bun an deeh pawk ah nin, “Nyawm ot heue.”
27 Yam hoik hoek bun an ka pui Siyiex ka piang gawng, nawh kawm ka caong pui Siyiex mai Gehazix hoek dex mai sang nyheen ka bun an heue. Viang mawh nan, pui Siyiex ah nin, “Ploi nawh, mawh kheu nawh laux rhawm sigrien sigre mai Siyiex hoik mox grawng ceu an khaing aux mai ang bax krai grawng ceu an ka aux heue.”
28 Bun an ah nin, “Mawh sax mhaing aux kawn simex ka cao simiang aux lie? Aux hoik sax ah nin paw pie lhen ka aux ang mawh lie?”
29 Khaix an nawh ah nin ka Gehazix, khre rien tokaux cao maix mai teei ti giex khaox gix aux ka daux taix maix mai lih hu ka daux krax hu maix heue. Phan maix pub pui tix kaux kaux, paw vi sikah mai nawh awx. Phan pui tix kaux kaux sikah mai maix paw vi pawk ka, deuh khaox gix aux ka piang ngai baoh kawn nyawm an heue.
30 Miex kawn nyawm an deeh ah nin, “Awm pa im ju Siyiex mai awm pa im ju maix, aux tak ang pon lih hu khaing maix, ” Mawh kheu nan, nawh yaog ti kaoh mai hawt khaix kiex heue.
31 Gehazix hu sivoe kix mai deuh khaox gix an ka piang ngai baoh kawn nyawm an, viang mawh nan, kawn nyawm an ang lai chix sikah mai ang lai chix mhong pie tix ceu kawx heue. Mawh kheu nan, nawh deeh ing pub ka nawh mai krai ah nin, “Kawn nyawm ang lai siduad heue.”
32 Yam hoek Elishie ka nyiex, kawn nyawm an koe sivoe nawh tan, hoik noi ti yum ka piang dee it cao nawh heue.
33 Mawh kheu nan, nawh laig ka daux lawg mai nyeep siviex plak khaix kiex khawm ra kaux mai rawg bwan ka Siyiex heue.
34 Nawh haok ka piang dee it kawn nyawm an mai gup ti it ka piang kawn nyawm an mai nawh deuh jheeh tix ka piang jheeh nawh mai deuh ngai tix ka piang ngai nawh mai deuh taix tix ka piang taix nawh mai nawh naih kaux cao tix ka piang kawn nyawm an mai nham kawn nyawm an deeh siu heue.
35 Nawh lih khaing ka piang kawn nyawm an mai hu hu hoek hoek ka daux nyiex, khaix an, nawh deeh baox laig ka daux nyiex mai nawh deeh baox haok ka piang kawn nyawm an mai deeh naih tokaux cao tix piang nawh, khaix an, kawn nyawm an miah aliah bawg mai blah ngai tix heue.
36 Elishie deeh kok ka Gehazix ah nin, kok ka bun Shunam an heue. Mawh kheu nan, hu kok ka bun an mai yam laig bun an ka dee ot nawh, nawh ah nin, “Yaog ti klien kawn simex pax heue.”
37 Bun an laig ka plak daux mai grux ngawng tix hawt caong nawh mai gup tix ka piang tiex, khaix an, kiex yaog ti klien kawn simex tix mai lih hu plak praix heue.
Grawng Yuh Elishie Aw Ngaik Taux Singax
38 Elishie deeh ing ka veng Gilagalax mai krax sibhawm praix lih ti koe ka daux haktiex an mai kawn simex cao jhai khankix hoik ngawm ka plak sivoe nawh mai nawh ah nin ka kawncau tix, “Tang ti deuh aw pa ting mai ngaik taux lhax son kawn simex cub cao jhai khankix heue.”
39 Pui tix kaux lih hu daux tong kaung sonsang caik taux lhax mai yaox pang num plix siiet tiag tix nhu mai caik taux lhax ankix mai nawh baox pieh ti viex plix singiien tiag khankix tom naog ka daux khawn taix nawh mai khawp ankix deeh hoek, khaix an plix singiien tiag an mai sau ka daux aw ngaik taux viang ang kix tawng ka mawh ankix ceu patix heue.
40 Khaix an, kix khankheu ti tawx ka pui khankix sonsang ih kix, yam in ceu an khankix lih ti mawh yam kawn ih kix ka taux ngaik an, kix riag yo lox tix lih ah nin, “Pui Siyiex eue, ceu pa yum koe ka daux aw in;” Mai kix ang lai pon ih ka taux an heue.
41 Nawh ah nin, “Viex phawng gaox nghox ca hoek ceeix, ” Mai nawh sau phawng gaox nghox ca an ka daux aw ah nin, “Khan kheu ti tawx ka pui khankix sonsang pon ti ih mai can ceu pa awp khankix, tak ang lai koe tix ceu kawx ka daux aw an heue.”
Grawng Tawx Elishie Pui Tixyieh Kaux Ih Priex
42 Khaix an pui tix kaux hoek khaing veng Balax Shalisha nawh viex ti tawx blah phawng gaox nghox ca cao tixnga lon mai simie nghox ca pa khraox ankix, ka daux chee hoek ka pui Siyiex mai nawh ah nin, “Tawx ceu ankix ka pui khankix sonsang yaox kix ti ih heue.”
43 Kawncau nawh ah nin, “Mawh ceu patix lie? Mawh sang deuh aux ceu inkix ka plak sivoe pui tiyieh kaux lie?” Nawh baox ah nin, “Tawx ceu ankix ka pui khankix sonsang pon kix ti ih; mawh kheu Siyiex ah nin, kix tak ih tom sak tix mai tak kawn lheu ka heue.”
44 Kheu nan, nawh hu deuh ceu ankix ka plak sivoe kix mai kix ih tom sak tix mai prah pa lheu tom nie awm gumlox ah Siyiex heue.