1 YosiyaxRef 22:1 Ye 3:6. hoik koe ju daix num yam yaog nawh ti mawh simiang mai nawh kwang ka veng Yerusaliem tixngoe tix num heue. Ceu kaux miex nawh mawh Yedidax kawn bun Adeyax khaing veng Bozakat heue. 2 Nawh hoik yuh pa khaw caw ka daux ngai Siyiex mai hawt grawng lawng khaix keeing nawh Davit, nawh ang lai veei ti ka praok plak dawm mai plak khawn gwiex heue.

3 Yam hoik kwang simiang Yosiyax ka haktiex kao num tix num, simiang ploi cao tiiem lai tix Shaphan, pa mawh kawn simex Azaliyax kawn simex Meshulam, hu ka nyiex bwan Siyiex ah nin, 4 “Hu ka cao giex kaing li ting Hilakhix kieh nawh simin ka mau pa hoik viex tix laig ka daux nyiex bwan Siyiex, pa hoik khrawm cao pau siviex khaing pui khankix heue.” 5 Kieh kix ap ka daux tawm taix pui pa yuh kaing, pa kia ngien ka nyiex bwan Siyiex, kieh kix tawx ankix ka pui pa yuh kaing ka daux nyiex bwan Siyiex, sonsang deeh cox ka dee laux nyiex bwan, 6 son cangmai mai son pui sum nyiex khankix mai son cao pa yuh kaing mai son pa liag kix khaox mai lon simaox pa hoik saik tix khankix sonsang deeh cox nyiex bwan heue. 7 “Viang yuh ka mawx kawx kix ang lai ji carang mai ap ti tawx mau ka daux tawm taix kix kheu mawh kix pui pa yuh kaing mai pa kaux sijax tix heue.” 8 Khaix an, cao giex kaing li ting Hilakhix ah nin ka Shaphan pa mawh cao pa tiiem lai, “Aux hoik yaox phuk lai lox tat jhawm prawng ka daux nyiex bwan Siyiex heue.” Hilakhix tawx phuk lai an ka Shaphan mai nawh phat ka heue. 9 Mawh kheu nan, Shaphan cao pa tiiem lai hu ka simiang mai viex grawng an hoek ka simiang ah nin, “Kawncau mau soi maix khankix hoik khrawm ti simin mau pa koe ka daux nyiex bwan mai hoik ap ka daux tawm taix pui pa yuh kaing mai pui pa kia ngien ka nyiex bwan khankix heue.” 10 Khaix an, Shaphan cao tiiem lai jhi simiang yaox ah nin, “Cao giex kaing li Hilakhix tawx phuk lai ka aux tix pheen heue.” Shaphan phat lai an plak sivoe simiang heue. 11 Yam hoik mhong simiang ka gumlox phuk lai lox tat jhawm Prawng an mai nawh riah ka kraung ceep tix heue. 12 Khaix an, simiang tawm lox ka cao giex kaing li Hilakhix mai ka Ahikam kawn simex Shaphan mai ka Akhabaw kawn simex Mikhayax mai ka Shaphan cao pa tiiem lai mai ka Asiyax kawncau simiang ah nin, 13 “Hu chawk ka Siyiex ka son aux mai son pui khankix son ceu pui Yudax khawmuik, son grawng gumlox phuk lai in pa hoik yaox ti mawh kheu jao hoik kied song rhawm Siyiex ka piang ex, grawh grawng nawh keeing ex khankix hoik ang cu nghiet ka gumlox pa koe ka daux phuk lai in, ang hawt yuh awm pa hoik tiem ti khawmuik ka grawng pa dex dawd Hilakhix mai ex heue.” 14 Mawh kheu nan, cao giex kaing li Hilakhix, Ahikam, Akhabaw, Shaphan mai Asiyax khankix hu ka Hulata cao jhai bun, pa mawh moeng Shalum kawn simex Tikava, kawn simex Harahap, pa mawh cao pa pau nyiex deuh sibex heue. Bun an ot ka daux veng Yerusaliem plawg ra heue. Kix sikah tau mai bun an heue. 15 Bun an ah nin ka kix, “Siyiex ceu pui Isarelax ah nin, krai ka pui pa hoik ploi pex hoek ka aux heue.” 16 Siyiex ah yuh nin, jhak heue, Aux tak viex krax pa kha rhawm ka dee in mai ka piang pui ot baoh in mhong ka gumlox pa koe ka daux phuk lai pa hoik phat simiang Yudax khawmuik heue. 17 Mawh kheu kix hoik tik hoik vud ka Aux mai kix gleeing nyawng bhawng ka siyiex pui tang kaux tang hak khankix, sonsang so kix Aux song rhawm ka kaing pa yuh kix ka taix tix khankix heue. Mawh kheu nan, krax song rhawm Aux tak lih ka dee in mai ang chix yeet heue” 18 “Viang mawh nan, son simiang haktiex Yudax pui pa hoik ploi pex hoek ti chawk ka Siyiex, ka grawng in pex tak deeh ing krai ka nawh yuh nin, Siyiex ceu pui Isarelax ah nin, ” Ka son grawng lox pa hoik mhong maix khankix, 19 “Mawh kheu hoik mhong maix ka lox ghlat Aux ka dee in mai ka pui pa ot baoh tin khankix tak sang lih mawh pa prah ti riem mai pa jhax lawg mai tom koe pa awn rhawm awn rhi mai pa tiiem rhawm mai riah kraung ceep tix yiiem yo ka plak sivoe Aux, mawh kheu nan, Aux tom nghiet ka lox maix, ” In mawh lox ah Siyiex heue. 20 “Mawh kheu nan, Aux tak khrawm maix hu ka keeing maix khankix mai maix tak mawh pa khrawm ti ka simeeig mai ka daux pa nhim mai ngai maix tak ang yaox pa kha rhawm an khankix, ka pa sang viex Aux hoek ka piang dee in, ” Mawh kheu nan, gumlox an hoek ka simiang heue.