23
Cox Pang Yosiyax Krax Krub
1 Khaix an, simiang ploi kix kraix khrawm kwad riex ju haktiex Yudax mai veng Yerusaliem khawmuik hoek ka nawh heue.
2 Simiang haok laig ka daux nyiex bwan Siyiex tau mai pui haktiex Yudax khankix mai can pui pa ot ka daux veng Yerusaliem khankix, khawm cao giex kaing li, cao jhai mai pui ting pui iak khawmuik mai nawh phat kix mhong gumlox phuk lai sijax mukheu, pa hoik yaox ka daux nyiex bwan Siyiex heue.
3 Simiang cung hawt rong mai yuh sijax mukheu ka plak sivoe ngai Siyiex, sonsang hawt khaix Siyiex mai priex rien ka gumlox pingnyap Nawh Cao khankix mai beenli mai lox tawm jhawm prawng, tau mai khawm rhawm mai khawm ju nawh khawmuik, sonsang hawt yuh awm lox sijax mukheu pa hoik tiem ka phuk lai in mai pui khawmuik cung mai kham ka lox sijax mukheu in heue.
Krax Deeh Cox Yosiyax
(2Been 34:3-7)
4 Simiang tawx lox ka Hilakhix cao giex kaing li ting mai cao giex kaing li pa ot greem nawh khankix mai ka cao pau diang siviex, kieh kix gah kraung khrai pa hoik koe son Balax mai son siyiex Asherax mai son pa koe ka piang raoma khankix lih khaing ka daux nyiex bwan Siyiex mai nawh gleeing ankix ka plak praix veng Yerusaliem daux tiag Kidaron mai deeh viex nyaox an ing ka veng Petelax heue.
5 Nawh teei ti tik cao giex kaing li pa krub riang grang khankix, pa hoik yaog cub simiang haktiex Yudax ti deuh sonsang gleeing nyawng bhawng ka piang dee pa lhaong khankix pa koe ka daux veng haktiex Yudax mai pa koe hawt vung viang haktiex Yerusaliem mai pui pa hoik gleeing nyawng bhawng ka Balax, ka singaix, ka khix mai ka simuing pa koe ka piang raoma khawmuik heue.
6 Nawh gah ti tik riang grang Asherax pa yuh ka khaox khaing nyiex bwan Siyiex mai viex hoek ka praok rawm klawng Kidaron plak praix veng Yerusaliem mai veng ankix ka praok rawm klawng Kidaron mai tawk tom phawng awm nyaox mai rhuat ka piang simeeig pui hot heue.Ref 23:4-6 2Sim 21:3; 2Been 33:3.
7 Nawh yieh ti tik nyiex gox simex seeing mai simex pa koe ka daux nyiex bwan Siyiex ka dee taing bun khankix man pa teuk teue tix son khaox riang grang Asherax heue.
8 Nawh viex cao jhai cao giex kaing li khankix hoek khaing veng pa koe daux haktiex Yudax mai yuh pa seeing brai ka dee pa lhaong an khankix dee pa gleeing cao giex kaing li nyawng bhawng, jah ka veng Gebax tom hoek ka veng Berashebax khankix, nawh baox yieh ti tik dee pa lhaong khankix, pa koe hawt siviex veng dee laig ka siviex veng Yawsux pa mawh cao kwang veng, pa ot ka plak gwiex siviex veng heue.
9 Viang yuh ka mawx kawx, cao giex kaing li dee pa lhaong khankix ang lai hoek ka khu dee tan Siyiex ka daux veng Yerusaliem, viang mawh nan, kix ih blah pa ang viex susaix ka daux sinax puxaik kix heue.
10 Nawh kieh baoh haktiex Tawphiet pa koe ka daux ngawd kawn simex HinonRef 23:10 Ye 7:31; 19:1-6; 32:35. seeing brai son ang pui tix kaux kawx lai kieh kawn simex kawn bun ti tan gleeing daux ngu ka siyiex Moliet heue.
11 Simiang teei ti tik brung khankix pa appong cub simiang haktiex Yudax tix tan ka singaix, pa koe hawt diang siviex nyiex bwan Siyiex hawt lawg nyiex Natameliet pa mawh cao kaing pa ot rawb biang nyiex an mai nawh gleeing ti tik ling lawx brung singaix khankix ka ngu heue.
12 Khu dee tan pa koe piang braux thaix plak piang Ahaza pa yuh cub simiang haktiex Yudax khankix mai khu dee tan pa yuh Manashe ka biang nyiex bwan Siyiex khawm ra plak, Ref 23:12 2Sim 21:5; 2Been 33:5. simiang yieh ti tik ankix mai lah tom phawng mai tik phawng nyaox khankix ka daux rawm klawng Kidaron heue.
13 Simiang hoik kieh dee pa lhaong pa koe plak lih singaix khaing veng Yerusaliem seeing brai pa koe plak seh gawng pa laux leeing, pa hoik sum Sawlamon simiang ceu pui Isarelax ti deuh son Ashatawriet pa mawh siyiex pa seeing brai, cie ceu pui Sidon mai son Khemawsha, pa mawh siyiex pa seeing brai cie ceu pui Mawbax mai son Milakom pa mawh siyiex pa seeing brai cie pui Amon khankix, Ref 23:13 1Sim 11:7.
14 Mai nawh tawk toing ka riang grang simaox khankix tom phawng mai kid ti tik khaox riang grang Asherax khankix mai hoik kieh dee an naog ka si-ang pui yum heue.
15 Lheu khaing an khu dee tan pa koe daux veng Betelax mai dee pa lhaong pa yuh Yerobom kawn simex NebatRef 23:15 1Sim 12:33. ceu pui Isarelax koe krax phix krax lud, khawm khu dee tan mai dee pa lhaong an khankix, nawh yieh ti tik mai gleeing ka dee pa lhaong mai lah an kix tom phawng mai gleeing ti tik khaox riang grang Asherax khankix heue.
16 Yam deeh veeh Yosiyax ti jhak nawh yaox ka simeeig pa koe ka piang gawng mai nawh ploi pui hu kuah si-ang khankix khaing daux simeeig mai gleeing si-ang khankix ka piang khu dee tan mai yuh seeing brai awm gumlox pa gruh krai Siyiex pa hoik krai pao pui Siyiex khankix heue.Ref 23:16 1Sim 13:2.
17 Khaix an, nawh ah nin, “Lon simaox simeeig pa yaox aux in mawh tix lie?” Mai pui veng khankix deeh krai ka nawh, “An mawh simeeig pui Siyiex pa hoek khaing haktiex Yudax mai pa hoik krai pao in kix pa hoik yuh maix ka piang khu dee tan veng Betelax heue.”
18 Nawh ah nin, “Kieh nawh ot tan heue, paw kieh pui tix kaux kawx gah ka si-ang nawh heue.” Mawh kheu nan, kix prah si-ang nawh ot tan tau mai si-ang cao jhai pui hoek khaing veng Samarix heue.
19 Khaix an, Yosiyax teei ti tik nyiex moeg dee pa lhaong khawmuik pa koe ka daux nyiex yaong veng Samarix, pa yuh cub simiang Isarelax ti kieh Siyiex song rhawm mai nawh yuh ka kix awm pa hoik yuh nawh ka veng Betelax heue.
20 Nawh pah ka cao giex kaing li dee pa lhaong pa ot hawt khu dee tan khankix mai gleeing si-ang pui khankix ka piang khu dee tan mai nawh dee ing ka veng Yerusaliem heue.
Grawng Priex Pawie Pasakha
(2Been 35:1-19)
21 Khaix an, simiang tawx lox ka pui khankix ah nin, “Priex ka pawie Pasakha Siyiex pex awm pa hoik tiem ti deuh ka daux phuk lai sijax mukheu in heue.”
22 Pawie Pasakha pa awm in ang lai sax yuh tete glang kwang cao prawng see khankix ka ceu pui Isarelax mai ka glang kwang simiang Isarelax mai cub simiang Yudax khankix ka haktiex heue.
23 Viang mawh nan, ka daux num yam kwang simiang Yosiyax ka haktiex kao daix num tix num mai yuh pawie Pasakha in ka plak sivoe Siyiex ka daux veng Yerusaliem heue.
24 Lheu khaing an Yosiyax teei ti tik pui ankix, pa chix simeed mai pa koe khwan singie khankix mai khawm riang grang pa krub pui khankix mai can ceu pa seeing brai khawmuik pa hoik yaox ka daux Yudax mai ka daux veng Yerusaliem, nawh hoik hawt yuh awm gumlox beenli pa tiiem ka daux phuk lai an, pa yaox cao giex kaing li Hilakhix ka daux nyiex bwan Siyiex heue.
25 Phao voe nawh ang lai koe simiang pa awm nawh tix kaux kawx, pa deeh veeh ti ing ka Siyiex tau mai khawm rhawm tix mai khawm ju tix mai riang rao tix khawmuik, awm lox tat jhawm prawng Mose khawmuik, khaix nawh pui pa lih ti kaoh awm nawh ang lai koe tix kaux kawx heue.
Krax Prawng Ca Haktiex Yudax
26 Viang yuh ka mawx kawx Siyiex ang nyang veeh tix khaing pa kied song rhawm Nawh Cao, tau mai pa song rhawm ka pui Yudax khankix kheu pa lud pa hoik yuh Manashe so rhawm Nawh Cao meet heue.
27 Siyiex ah nin, “Aux tak tik vud ceu pui Yudax khaing plak sivoe ngai Aux awm hoik tik vud Aux ka ceu pui Isarelax khankix mai aux tak tik vud ka veng Yerusaliem in pa hoik laug Aux mai ka nyiex bwan pa hoik ah Aux tix sum ka min ceu kaux Aux tan heue.”
Yosiyax Yum Ka Daux Naing
(2Been 35:20-27)
28 Yam in, grawng kaing pa deuk Yosiyax mai can ceu pa hoik yuh nawh khankix an mawh pa tiiem ti deuh ka daux phuk lai been cub simiang ceu pui Yudax khankix heue?
29 Ka daux baux ju mawh Yosiyax simiang, Pharaw Nekhaw simiang haktiex Ejiptux haok puing simiang haktiex Asurix, tom hoek ka rawm klawng Upharat mai simiang Yosiyax hu sipub ka nawh mai Pharaw Nekhaw yaox ka Yosiyax mai pah nawh yum ka daux veng Megidaw heue.
30 Kawncau nawh khankix teei ti sau tokaux yum nawh ka piang ling lawx naing brung lih hu khaing veng Megidaw mai viex hoek ka veng Yerusaliem mai sipaung nawh ka daux simeeig cao nawh heue. Pui haktiex khankix deeh teei Yohohaza kawn simex Yosiyax mai groi rawm bee ka piang nawh mai yaog nawh mawh simiang ka dah dee ot keeing nawh heue.
Grawng Kwang Yehohaza Haktiex
(2Been 36:1-4)
31 Yehohaza koe ju tixnga loe num yam mawh nawh simiang mai nawh kwang ka veng Yerusaliem loe khix heue. Ceu kaux miex nawh mawh Hamotalax kawn bun Yeramix pui veng Lebanax heue.
32 Nawh yuh pa caox caig ka daux ngai Siyiex awm pa hoik yuh tax du nawh heue.
33 Pharaw Nekhaw giex ti sau nawh ka daux thawng veng Rebalax ka daux haktiex Hamat, sonsang ang nawh pon kwang ka daux veng Yerusaliem, mai nawh mhaing keen ka daux haktiex Yudax, ka mau tixyieh talantan mai khri tix talantan heue.
34 Pharaw Nekhaw deeh yaog Eliyakim kawn simex Yosiyax mawh simiang ka dah dee ot keeing nawh Yosiyax mai deeh loh ceu kaux nawh mawh Yehoyakim mai Pharaw viex Yohohaza ing ka haktiex Ejiptux mai Yehohaza yum tan heue.Ref 23:34 Ye 22:11-12.
Yehoyakim Kwang Ka Haktiex Yudax
(2Been 36:5-8)
35 Mawh kheu nan, Yehoyakim tawx mau mai khri ka Pharaw, viang mawh nan, nawh koh keen ka pui haktiex sonsang tawx mau awm gumlox pa tawm Pharaw, nawh khin ti koh mau mai khri khaing pui haktiex, ka pui ku kaux awm pa gwieh nawh ti mhaing sonsang pon tawx nawh ka Pharaw Nekhaw heue.
36 YehoyakimRef 23:36 Ye 22:18-19; 26:1-6; 35:1-19. koe ju tixnga phwan num, yam mawh nawh simiang mai nawh kwang ka veng Yerusaliem kao tix num heue. Ceu kaux miex nawh mawh Zebudax, kawn bun Petayax khaing veng Ruma heue.
37 Nawh yuh pa caox caig ka plak ngai Siyiex awm pa hoik yuh tax du nawh khankix heue.