21
Krax Kwang Manashe Ka Yudax
(2Been 33:1-20)
1 Manashe koe ju kao ra num yam yaog nawh ti mawh simiang mai nawh kwang ka veng Yerusaliem tixphwan phwan num heue. Ceu kaux miex nawh mawh Hephazibax heue.
2 Nawh yuh pa caox caig ka daux ngaix Siyiex, Ref 21:2 Ye 15:4. awm pa seeing brai ceu pui an khankix pa hoik grheu Siyiex lih khaing plak sivoe ngai pui Isarelax khankix heue.
3 Nawh deeh sum dee pa lhaong khankix, pa hoik yuh keeing nawh Hezakiyax laux leeing, nawh deeh sum khu dee tan khankix son Balax mai yuh khaox riang grang siyiex Asherax khankix awm pa yuh Ahap simiang haktiex Isarelax, mai nawh krub ka pa koe piang raoma khankix mai yuh kaing jhaw kix heue.
4 Nawh baox sum khu dee tan ka daux nyiex bwan Siyiex, pa hoik sax ah Siyiex yuh nin, “Aux tak deuh min ceu kaux tix ka daux veng Yerusaliem heue.”Ref 21:4 2Sa 7:13.
5 Nawh sum khu dee tan son pa koe piang raoma khankix, ka daux sigreung biang nyiex bwan Siyiex khawm ra plak heue.
6 Nawh gleeing ti tan kawn simex tix ka ngu mai gau tix ka lox sibawk mai shiao ka pa chix meed mai yuh paox pie tau mai krax keud krax sawn khaing phicaox mai khawm pa yuh singie khankix heue. Nawh hoik nie yuh pa caox caig ka plak ngai Siyiex sonsang so pa song rhawm Nawh Cao heue.
7 Nawh kawn deuh riang grang Asherax pa yuh nawh ka khaox tix mu ka daux nyiex bwan, awm pa hoik sax ah Siyiex ka Davit mai ka kawn simex nawh Sawlamon yuh nin, “Ka daux nyiex bwan in mai ka daux veng Yerusaliem, pa hoik laug Aux ti deuh khaing doeh ru pui Isarelax khankix, Aux tak deuh min ceu kaux ti tan leeing ju heue.
8 Phan kix priex rhawm ti hawt yuh awm gumlox pa hoik tawm Aux ti deuh ka kix mai awm gumlox been pa hoik tawm kawncau Aux Mose ti deuh ka kix mai aux tak ang lai kieh caong ceu pui Isarelax khankix vung viang khaing haktiex pa hoik tawx Aux ka keeing kix heue.”Ref 21:7-8 1Sim 9:3-5; 2Been 7:12-18.
9 Viang mawh nan, kix ang cu ti nghiet mai Manashe hoik nyaw glaw kix yuh pa caox caig nie lheu khaing ceu pui khankix pa hoik yuh Siyiex kix laux leeing ka plak sivoe pui Isarelax heue.
10 Siyiex krai khaing cao jhai pa mawh kawncau mau soi Nawh khankix ah nin,
11 “Mawh kheu hoik yuh Manashe simiang haktiex Yudax ka ceu pa seeing brai inkix, nawh hoik yuh pa nie lheu caox khaing pui Amorix khankix pa koe ka phao ka nawh mai nawh baox yuh pui Yudax, koe pa lud tau mai riang grang pa krub nawh heue.”
12 Mawh kheu nan Siyiex ceu pui Isarelax ah nin, jhak heue, Aux tak sang viex krax pa kha rhawm hoek ka piang veng Yerusaliem mai haktiex Yudax, can pui pa mhong grawng an khankix tak lak lheet yhaok ka khawm ra khawn heue.
13 Aux tak tuk ka maox tiag Samarix mai maox diag tiag ka nyiex ma Ahap ka piang veng Yerusaliem, Aux tak awt ka veng Yerusaliem awm awt pui ka tawg klong mai gup ka heue.
14 Aux tak teei ti tik pui pa mawh sinngao Aux khankix mai ap tix tawx kix ka daux tawm taix pui koeng kix mai kix tak mawh pui pa kham pa giex gang ka pui koeng kix khawmuik,
15 mawh kheu hoik yuh kix pa caox caig ka daux ngai Aux mai yuh Aux song rhawm, jah tom singaix lih hu kix khaing haktiex Ejiptux, tom hoek in singaix heue.
16 Lheu khaing an, Manashe hoik jauh yuh nham pui pa ang koe pa lud khankix tom nie, tom hoik kieh veng Yerusaliem naog ka nham jah khaing plak in tom hoek ka plak an, lheu khaing phimap pa yuh nawh mai kieh pui Yudax khankix lud, ka daux pa yuh kix pa caox caig ka daux ngai Siyiex heue.
17 Yam in, grawng kaing pa deuk Manashe mai can pa hoik yuh nawh khankix mai phimap pa hoik lud nawh khankix, ang hoik mawh pa tiiem ti deuh ka daux phuk lai been cub simiang haktiex Yudax lie?
18 Mawh kheu nan, Manashe hoik laux lee ti tau mai keeing nawh mai sipaung nawh ka daux sipeem nyiex haw cao nawh, ka daux sipeem Awza heue. Khaix an, kawn simex nawh Amon deeh plud ti kwang ka dah dee ot nawh heue.
Krax Kwang Amon
(2Been 33:21-25)
19 Amon hoik koe ju kao ra num yam mawh nawh simiang mai nawh kwang ka veng Yerusaliem ra num heue. Ceu kaux miex nawh mawh Meshulemiet kawn bun Haruza khaing veng Yotaba heue.
20 Nawh yuh pa caox caig ka daux ngai Siyiex, awm pa yuh keeing nawh Manashe heue.
21 Mawh kheu nan, nawh hawt hu ka daux krax pa lawng keeing tix khawmuik mai nawh yuh kaing jhaw pa hoik yuh keeing tix mai krub ka ankix heue.
22 Nawh hoik tik vud ka Siyiex keeing tix khankix mai nawh ang lai hawt grawng lawng khaix Siyiex heue.
23 Khaix an, kawncau mau soi Amon khankix hoik rom ti tieh feen ka nawh mai pah simiang yum ka daux nyiex haw cao nawh heue.
24 Pui haktiex khankix pah ka pui pa rom ti tieh feen ka Amon khankix heue. Khaix an pui haktiex an khankix yaog kawn simex nawh Yosiyax mawh simiang ka dah dee ot nawh heue.
25 Yam in, grawng kaing pa deuk Amon mai pa hoik yuh nawh khankix, ang hoik mawh pa tiiem ti deuh ka daux phuk lai been cub simiang haktiex Yudax khankix lie?
26 Sipaung nawh ka daux simeeig cao nawh pa koe ka daux sipeem Awza heue. Khaix an, kawn simex nawh Yosiyax deeh plud ti kwang ka dah dee ot nawh heue.