11
Athaliyax Kwang Ka Haktiex Yudax
(2Been 22:10; 23:21)
1 Yam yaox Athaliyax miex Ahaziyax ka yum kawn simex tix, kiex yaog ti kaoh yuh doeh nyiex ma simiang laux leeing khawmuik heue.
2 Viang mawh nan, Yehoshebax kawn bun simiang Yoram nan Ahaziyax, hoik briex teei Yosha kawn simex Ahaziyax mai hu dee singai khaing daux sinax cub kawn simex simiang khankix, ka pa sang pah kix nawh yum mai kix mox nawh tau mai miex pa kia ngien ka nawh ka daux lawg it, khaing Athaliyax sonsang ang kix pon pah nawh yum heue.
3 Mawh kheu nan, nawh hoik mox tix tau mai miex pa kia ngien nawh ka daux nyiex bwan Siyiex liah num glang kwang Athaliyax ka haktiex heue.
Yosha Ceep Mhok Khri
4 Ka daux aliah num tix num, Yehoyadax ploi pui hu kok ka cao kaing naing pa kwang lien tixyieh, khaing daux cub lien cao pa pau nawh mai khaing daux cub lien cao pa pau veng khankix, hoek ka daux nyiex bwan Siyiex mai nawh yuh sijax mukheu tau mai kix mai kieh kix tiextu tix ka daux nyiex bwan Siyiex mai jhi kix yaox kawn simex simiang heue.
5 Khaix an, nawh tawm lox ka kix ah nin, “In mawh pa tak sang caw pex ti yuh ka daux pex loe son tix son, pa hoek ti teei beeh glawm ka daux singaix twah, tak mawh pa khre rien ka nyiex haw simiang heue.
6 Loe son tix son tak mawh pa pau diang siviex Surax mai loe son tix son tak mawh cao pa pau diang siviex ka plak khaix cub lien cao pa pau veng khankix, pex tak mawh cao pa priex rien tix tiebtie ka nyiex haw sonsang ang hoek krax laux heue.
7 Khaing ka daux pex ra cub, pa hoik pluat beeh glawm tix khaing daux singaix twah tak mawh cao pa priex rien tix jhak ka nyiex bwan Siyiex son simiang heue.
8 Pex tak ot rawb rim simiang ku daog ku dawn tau mai kraung naing ka daux taix tix ku kaux daux pui mai can pui pa preeng tix laig sinax pex tak pah nawh yum heue. Pex tak ot tau mai simiang yam lih yam laig nawh heue.”
9 Cao kaing piang pui tixyieh kaux khankix hawt ti yuh can ankix, awm pa hoik tawm cao giex kaing li Yehoyadax khawmuik, kaux pui mawh kaux pui an tang viex ka pui cao tix khankix, pa hoik koe beeh glawm singaix twah mai khawm pui ankix pa hoik pluat beeh glawm tix khaing singaix twah mai hoek ka cao giex kaing li Yehoyadax heue.
10 Cao giex kaing li teei ti tawx pliah mai plah tieb cie simiang Davit khankix, pa koe ka daux nyiex bwan Siyiex ka cub cao kaing naing pa kwang ka lien tixyieh kaux heue.
11 Khaix an, cub pa pau khankix, cung ku kaux daux pui mai kraung naing cie tix, pa koe daux taix mai ot rawb rim hawt vung viang simiang, jah khaing praok plak dawm nyiex bwan tom hoek ka praok plak gwiex nyiex bwan hawt dex khu dee tan mai nyiex bwan heue.
12 Cao giex kaing li hoik viex kawn simex simiang lih plak praix mai ceep mhok khri ka piang nawh mai ap phuk lai sijax mukheu ka nawh, kix yaog nawh mawh simiang mai groi rawm bee ka piang nawh mai kix dieh taix tix ah nin, “Kieh simiang lang ju heue.”
13 Yam mhong Athaliyax ka lox sinum cao pa pau mai cub pui hun khankix, nawh hoek ka pui khankix pa ot ka daux nyiex bwan Siyiex heue.
14 Yam yaox nawh ka ankix, simiang cung ti ot hawt rong, awm pa koe been simiang haktiex Yudax khankix mai cao thong cao bung cub cao phlu teettawng khankix ot hawt simiang, pui haktiex khawmuik hoik koe krax gaux rhawm mai phlu teettawng khankix, Athaliyax riah kraung ceep tix mai riag yo ah nin, krax pa tieh feen! Krax pa tieh feen!
15 Khaix an, cao giex kaing li Yehoyadax tawx lox ka cub cao kaing naing piang pui tixyieh khankix mai ka cao kaing kru naing khankix mai ah nin ka kix, “Teei kiex lih plak praix sinax cao pa pau khankix mai pah kiex yum tau mai can pui pa hawt khaix kiex khankix ka lawm vaig heue.” Mawh kheu cao giex kaing li ah nin, “Paw pah kiex ka daux nyiex bwan Siyiex.”
16 Kix giex kiex mai kiex lih hu krax laig brung ka daux nyiex haw simiang mai pah kiex yum tan heue.
17 Khaix an, Yehoyadax yuh sijax mukheu sinax Siyiex mai simiang mai pui hun khankix, sonsang mawh kix pui Siyiex mai baox yuh sijax mukheu sinax simiang mai pui khankix heue.
18 Pui haktiex khawmuik hu ka nyiex bwan Balax mai kix yieh ti tik ankix mai kix raig ti tik khu dee tan mai riang grang khawmuik mai pah Mattan cao giex kaing li Balax ka plak sivoe khu dee tan mai cao giex kaing li Yehoyadax deuh cao pa pau tix jhak nyiex bwan Siyiex heue.
19 Khaix an, nawh viex cao kaing naing pa kwang ka piang pui tixyieh khankix mai cub lien pa pau nawh khankix mai khawm cub lien pa pau khankix mai khawm pui haktiex khawmuik mai kix viex simiang lih khaing daux nyiex bwan Siyiex mai viex nawh hu ka plak krax diang siviex dee ot lien cub pa pau veng khankix ka nyiex haw simiang mai nawh ngawm ka piang dang neung simiang heue.
20 Mawh kheu nan, pui haktiex khawmuik koe krax gaux rhawm mai veng hoik yiien mai kix hoik pah Athaliyax yum ka vaig, daux nyiex haw simiang heue.
21 Yehosha koe ju aliah num, yam yaog nawh tix mawh simiang heue.