9
Siyiex Jhi Tokaux tix
(2Been 7:11-22)
1 Khaix hoik sum Sawlamon ka nyiex bwan Simiang Siyiex mai nyiex haw ot tix, awm pa koe rhawm nawh ti sang yuh khawmuik,
2 Simiang Siyiex deeh jhi tokaux tix ka Sawlamon ra bawg tix bawg, awm jhi Nawh tokaux tix ka nawh daux veng GibunRef 9:2 1Sim 3:5; 2Been 1:7. heue.
3 Mai Simiang Siyiex ah nin ka nawh, “Aux mhong lox rawg maix bwan mai lox pa khyox khaw maix khankix, pa hoik yuh maix ka plak sivoe Aux, Aux yuh nyiex pa hoik sum maix ka min ceu kaux Aux singax singeh leeing ju, ngai Aux mai rhawm Aux tak koe tan jheung jheung heue.
4 Phan maix lawng hu ka plak sivoe Aux, awm hu keeing maix Davit mai hawt yuh awm pa tawm Aux ka maix mai phan maix priex ti hawt lox lai beenli pa deuh Aux mai lox tat jhawm prawng Aux khankix,
5 Aux tak kieh dangngeung haktiex maix ka piang pui Isarelax khankix kaux cong leeing ju, awm hoik yuh Aux lox mukheu mai keeing maix Davit, pa ah in, ru maix tak ang jud khaing ka piang dangngeung pui Isarelax khankix heue.Ref 9:5 1Sim 2:4.
6 Phan ang mawh nan, phan kawn simex maix khankix deeh veeh ti khaing daux pa hawt ti khaix Aux mai ang lai priex rien ka lox tawm pingnyap cie Aux mai ka lox lai beenli pa deuh Aux plak sivoe maix mai hu yuh kaing jhaw siyiex tang kaux mai krub ka kix,
7 “Khaix an Aux tak tik pui Isarelax khankix khaing haktiex pa tawx Aux ka kix, mai nyiex bwan pa yuh Aux mawh pa singax singeh ka son ceu kaux Aux in, Aux tak tik an khaing plak sivoe ngai Aux, pui Isarelax khawmuik tak lih awm lox been praix mai lox sibriem ka plak sivoe pui heue.
8 Mai nyiex pa lhaong in, pui pa lailing hawt baoh in ku kaux, tak koe pa daox deng mai koe lox sibriem ah nin, Simiang Siyiex yuh nin ka haktiex in mai ka nyiex bwan in kheu jao patix lie?Ref 9:8 2Sim 25:9; 2Been 36:19.
9 “Khaix an, kix tak deeh pawk ah nin, mawh kheu hoik tik vud kix ka Simiang Siyiex, Siyiex tix pa hoik viex keeing kix lih khaing meung Ejiptux mai een rhawm tix ka siyiex tang kaux mai krub mai yuh kaing son kix, mawh kheu nan, Simiang Siyiex viex krax pa laux leeing hoek ka piang kix heue”
Yuh Sijax Mukheu Mai Hiram
(2Been 8:1-18)
10 Yam hoek ka daux tixnga num, khaix hoik sum Sawlamon nyiex ra lhang, pa mawh nyiex bwan Simiang Siyiex mai nyiex haw ot tix,
11 Hiram simiang veng Turux teem Sawlamon ka khaox Arit mai khaox gix mai khri tom nie awm pa koe rhawm nawh ti sang cie, simiang Sawlamon kawx deeh tawx Hiram cie veng khankix tixnga veng, pa koe ka daux haktiex Galilie heue.
12 Simiang Hiram lih khaing veng Turux mai hu jhak ka veng pa hoik tawx Sawlamon ka nawh, viang mawh nan, nawh ang khaw rhawm ka heue.
13 Mawh kheu nan, nawh ah nin, “Pux aux eue, veng pa hoik tawx maix ka aux khankix, mawh veng pa yuh ka mawh? ” Mai nawh kok haktiex baoh an mawh Khabulax, tom in singaix heue.
14 Hiram ploi pui hu tawx khri tix yieh tixnga talantan ka simiang, tix yieh talantan koe tix yieh tixnga coi heue.
15 Grawng pa koh simiang Sawlamon mau ka pui khankix mawh sonsang sum nyiex bwan Simiang Siyiex mai nyiex haw ot nawh mai veng Milaw mai guh veng Yerusaliem, veng Hazaw, veng Megidaw mai veng Geza khankix heue.
16 Pharaw simiang Ejiptux hu puing ka veng Geza, gleeing veng an ka ngu mai pah pui Khanan pa ot ka daux veng mai nawh tawx veng an awm totaix ka kawn bun tix, moeng simiang Sawlamon,
17 Sawlamon deeh sum veng Geza mai veng Biethawron plak seh,
18 veng Baliet mai veng Tama pa koe ka daux tiag haktiex Yudax,
19 veng deuh Sawlamon krao kraung khrai mai veng deuh ling lawx naing brung mai veng deuh kru naing brung mai can pa koe rhawm Sawlamon tix sum ka daux veng Yerusaliem mai Lebanon mai ka daux meung haktiex dee pa kwang nawh khawmuik heue.
20 Pui pa kawn deuk khaing pui Amawrix, pui Hetax, pui Perazix, pui Hewix mai pui Yebusix pa ang mawh pui Isarelax khankix,
21 mai cub kix mawh pa deuk ka daux haktiex pa ang Isarelax nyang pon yuh kix laux leeing khawmuik, Sawlamon kieh kix yuh siliex tom hoek daux in singaix heue.
22 Mai Sawlamon ang lai kieh pui Isarelax yuh siliex, nawh kieh kix mawh pui naing mai kawncau nawh mai cao kaing pa kwang greem nawh pui naing vao, kaing naing mai cao kaing naing ting cub ling lawx naing brung mai cub pui naing brung khankix heue.
23 Cao kaing pa kwang ka piang kaing jhaw koe phwan yieh tixphwan kaux, kix mawh cao kwang ka piang pui yuh kaing jhaw khankix heue.
24 Kawn bun Pharaw lih khaing veng Davit mai hu ot ka nyiex cao tix pa hoik sum Sawlamon ka son nawh, khaix Sawlamon deeh cox sum ka veng Milaw heue.
25 Sawlamon yuh krax tan pa gleeing mai krax tan pa nhim tix num loe bawgRef 9:25 Lih 23:17; 34:23; Pi 16:16. ka piang khu dee tan pa sum nawh ka son Simiang Siyiex mai gleeing nyawng bhawng ka plak sivoe Simiang Siyiex mai nawh hoik sum nyiex bwan heue.
26 Sawlamon yuh reu ting ka daux veng Ezion Gebax pa koe praok rawm sigrit sigra raoh, ka daux haktiex Edon heue.
27 Hiram ploi kawncau ti pa tawng krax rawm sigrit sigra, hu yuh kaing tau mai pui Sawlamon khankix heue.
28 Mai kix hu ka veng Awphirax mai pon viex khri pon yieh tixnga talantan coi khaing tan mai kix viex tawx ka Simiang Sawlamon heue.