10
Lauxsimiang Shebax Hoek Fi Ka Sawlamon
(2Been 9:1-12)
1 Yam mhong laux simiang ShebaxRef 10:1-10 Mat 12:42; Luk 11:31. ka ao min ceu kaux Sawlamon kheu ceu kaux Simiang Siyiex, nawh hoek ti cheuk cheu Sawlamon ka lox pa kied nu tix pawk heue.
2 Nawh hoek ka veng Yerualiem tau mai pui pa hawt tom nie mai Kala uk pa tang pa sioe bhawng kuceu mai khri tom nie mai siang simaox pa ngawh mai yam bleeh nawh Sawlamon krai can pa koe daux rhawm tix khawmuik heue.
3 Sawlamon deeh pawk pa chawk nawh khankix, can pa ang Sawlamon pon pawk ang koe tix ceu kawx heue.
4 Yam yaox laux simiang Shebax ka pingnya cuyi pa koe Sawlamon mai ka nyiex haw pa hoik sum nawh,
5 mai pa ih pa koe ka piang pheen sawm nawh khankix mai dee ngawm cao giex kaing mai kawncau pa khan kheu nawh mai kraung ceep kix mai pa giex kawk nyaux nawh mai krax pa khre nawh krax tan pa gleeing tix, ka daux nyiex Simiang Siyiex, nawh hoik daox deng ka tom ang tix koe lox krai heue.
6 Mai nawh ah nin ka simiang, “Can ceu pa hoik mhong aux yam ot aux ka haktiex tix, grawng kaing pa yuh maix mai pingnya cuyi pa koe maix rug mawh tete heue.”
7 Viang mawh nan, aux ang nyang yum rhawm ka lox ankix, sivoe ang aux nyang yaox ka ngai tix mai ceu ankix ang nyang mawh tix plak awm pasax mhong aux, pingnya cuyi maix mai kraung khrai sinngao maix, hoik nie lheu khaing pa mhong aux heue.
8 Kieh pui maix mai kawncau pa cung plak sivoe maix jheung jheung mai pa mhong gumlox pingnya cuyi maix khankix koe bwanson!
9 Kieh Simiang Siyiex koe bwanson, khaw rhawm rhi ka maix mai pa yaog maix ka piang dangngeung pui Isarelax! Mawh kheu Simiang Siyiex moh ka pui Isarelax leeing ju, Nawh Cao yaog maix mawh simiang sonsang prawng ca maix daux pa rahsee heue.”
10 Mai nawh tawx khri tix yieh tixnga talantan mai sidah bhawng tom nie mai siang simaox pa kied ngawh, ceu sidah bhawng pa kied nie awm in, pa tawx laux simiang Shebax ka simiang Sawlamon, ang lai hoek khaix an tix bawg kawx heue.
11 Lheu khaing an reu ting Hiram, viex khri mai khaox Alagun khankix mai siang simaox pa kied ngawh hoek khaing Awphirax tom nie heue.
12 Mai simiang yuh rong ka khaox Alagun, son nyiex bwan Simiang Siyiex mai son nyiex haw mai yuh ting feuk mai ting pawd son pui rhax lai heue. Ceu khaox Alagun khankix ang lai sax hoek mai ang lai sax yaox tom hoek in singaix heue.
13 Simiang Sawlamon tawx ceu pa koe rhawm laux simiang ti sang cie khawmuik, lheu khaing an simiang Sawlamon baox tawx ceu pa mhaing laux simiang ti cie khankix, khaix an nawh deeh ing mai kawncau tix ka haktiex tix heue.
Krax Magmi Sawlamon
(2Been 9:13-24)
14 Krax cien khri pa pon simiang Sawlamon ka daux tix num, koe liah yieh tixgliah liah talantan heue.
15 Lheu khaing an nawh baox pon khaing pui pa yuh lai geu khankix mai khaing keen pa tawx caox lai geu khankix mai khaing simiang Arebia khankix mai khaing cao kwang haktiex khankix heue.
16 Simiang Sawlamon yuh pliah tieb pa ting ka khri ra yieh plah, pa cien tix plah liah yieh shekhe heue.
17 Nawh baox yuh plah tieb pa iak ka khri loe yieh plah, pa cien tix plah loe yieh mina, mai simiang deuh an khankix ka daux nyiex haw pa hoik sum ka khaox khaing nong Lebanon heue.
18 Lheu khaing an simiang yuh dangngeung ting ka nga sang mai om an ka khri nawnaw heue.
19 Dangngeung an koe bawng liah glawk mai dee neung plak khaix lawm le, dangngeung khawm ra plak koe dee deuh taix tix, ka praok dee deuh nawh taix tix riang sivai sangsi ra mu cung ka heue.
20 Riang sivai sangsi kao ra mu cung ka piang glawk bawng ku glawk plak in mai plak an heue. Pa yuh awm in ang koe ka meung tang dah tix meung kawx heue.
21 Kawk nyaux simiang Sawlamon yuh ka khri mai can kawk nyaux yuh nawh ti deuh ka daux nyiex haw pa sum nawh ka khaox khaing nong Lebanon, yuh tix ka khri nawnaw mai ang lai yuh ka mau, Mawh kheu baux ju Sawlamon ang sawn mau mawh pa koe jum heue.
22 Mawh kheu simiang koe cub reu ting pa yuh lai geu ka veng Tasux daux rawm sigrit sigra tau mai cub reu ting Hiram ka veng Tasux heue. Mai cub reu ting an hoek bleeh mai viex khri, mau, nga sang, rao khaox mai sim kawng khankix hoek ka nawh loe num tix bawg heue.
23 Simiang Sawlamon kied magmi mai koe pingnya cuyi khaing simiang ka piang haktiex khawmuik heue.
24 Pui piang haktiex khawmuik hoek plak sivoe ngai Sawlamon, sonsang nghiet ka pingnya cuyi nawh, pa hoik tawx Siyiex ka daux rhawm nawh heue.
25 Pui ku kaux viex totaix tix, pa mawh kraung khri kraung mau, kraung ceep, kraung naing, sidah bhawng kuceu, brung mai la khankix hoek ka nawh mai keen pa caw ti tawx tix num hoik tix num heue.
Lieag Lah Lai Pa Yuh Sawlamon
(2Been 1:14-17; 9:25-28)
26 Sawlamon khrawm ling lawx naing brung mai pui naing brung khankix, nawh koe ling lawx naing brung tix rheng pon yieh lhang mai pui naing brung tix mheen ra rheng kaux, Ref 10:26 1Sim 4:26. nawh priex ka daux veng pa deuh ling lawx naing brung tau mai tix ka daux veng Yerusaliem heue.
27 Simiang kieh mau pa koe daux veng Yerusaliem khankix awm lon simaoxRef 10:27 Pi 17:17. mai kieh khaox Arit awm khaox ruh pa kwah ka daux ngawd daux lung heue.
28 Mai brung pa koe simiang Sawlamon mawh diang lai pa laig khaing meung EjiptuxRef 10:28 Pi 17:16. mai veng Kaw cao lai simiang hoik liag awm jum pa hoik tat kix ti deuh khaing veng Kaw heue.
29 Diang lai laig ling lawx naing brung tix lhang kix liag khaing meung Ejiptux, jum mawh liah yieh mau shekhe, brung tix mu tix yieh tixphwan shekhe, diang lai pa lih ling lawx naing mai brung khankix, kix deeh coh ka simiang Hetax mai simiang Sirix heue.