8
Teug Sijax Mukheu Laig Daux Nyiex Bwan
(2Been 5:2-14)
1 Simiang Sawlamon khrawm kwad riex ju pui Isarelax mai cub cao kaing ru ceu pui khawmuik mai cao kaing keeing nyiex ma pui Isarelax khankix hoek ka tix, ka daux veng Yerusaliem sonsang viex teug bwan sijax mukheu Simiang Siyiex khaing veng DavitRef 8:1 2Sa 6:12-16; 1Been 15:25-29. pa mawh Zion tan heue.
2 Pui Isarelax khawmuik khrawm paox tix hoek ka simiang Sawlamon, daux bawg yam pawie daux khix Etanim khix aliah heue.
3 Kuad riex ju pui Isarelax khawmuik hoek mai cao giex kaing li khankix teei ti klawm teug sijax mukheu Simiang Siyiex heue.
4 Mai kix viex teug sijax mukheu Simiang Siyiex hoek ka daux nyiex gox bwan man bang kum mai kix viex kraung shiao pa singax hoek ka daux nyiex gox bwan man, cao giex kaing li mai pui Lewix khankix mawh cao pa viex hoek heue.
5 Simiang Sawlamon mai pui hun Isarelax khrawm tix hoek ka plak sivoe teug sijax mukheu mai kix tan yung, mawie khankix tom ang lai uik simin mu heue.
6 Mai cao giex kaing li khankix viex teug sijax mukheu Simiang Siyiex laig ka dee ot nawh, ka daux nyiex bwan ka dee pa kied singax mai kix deuh teug sijax mukheu an ka greem pruik Cherubin heue.
7 Cherubin an khankix di pruik tix ka piang teug sijax mukheu mai Cherubin an khankix tawb ka piang teug sijax mukheu mai khawm ka piang khaox glawm nawh heue.
8 Khaox glawm an kied lang mai pon yaox toh khaox glawm an khaing dee pa kied singax, ka sivoe lawg dee pa singax, viang mawh nan ang chix yaox ka plak praix mai an koe tan tom in singaix heue.
9 Ang koe tidtix daux teug sijax mukheu, lheu khaing khlawp simaox an ra khlawp, pa sau Mose tix priex yam ot ka baoh Hawrap, Ref 8:9 Pi 10:5. yam yuh Simiang Siyiex gumlox sijax mukheu tau mai pui Isarelax, yam lih kix khaing meung Ejiptux heue.
10 Khaix hoik lih cao giex kaing li khankix khaing ka dee pa singax singeh, paiawm naog ka daux nyiex bwan Simiang Siyiex heue.
11 Kheu jao hoik ceep paiawm mai naog min siawp sibrawm Simiang Siyiex ka daux nyiex bwan, cao giex kaing li ang lai pon cung ti yuh kaing jhaw heue.Ref 8:10-11 Lih 40:34-35.
Krax Appong Nyiex Bwan
(2Been 6:3-11)
12 Sawlamon ah nin, “Simiang Siyiex hoik krai ti deuh, Nawh Cao tak sang ot ka daux paiawm pa faik heue.
13 Aux hoik sum nyiex bwan ka son Maix Cao, sonsang ot Maix Cao ka daux leeing ju heue.”
14 Yam cung pui hun Isarelax, simiang veeh ngai tix mai nawb bwan ka piang kix heue.
15 Mai nawh ah nin, “Kieh Simiang Siyiex pui Isarelax koe bwanson, pa hoik yuh Nawh Cao grum naog ka taix Tix, awm hoik koe lox mukheu Nawh ka keeing aux Davit ka jheeh tix,
16 jah ka singaix hoik viex Aux pui Isarelax lih khaing meung Ejiptux, Aux ang nyang bax laug veng tix veng kawx, khaing doeh ru pui Isarelax, sonsang sum ka nyiex bwan, sonsang ot min ceu kaux Aux tan, viang mawh nan Aux hoik laug Davit, sonsang kwang ka pui Aux IsarelaxRef 8:16 2Sa 7:4-11; 1Been 17:3-10. heue.
17 Grawng ceu an hoik mawh pa koe ka daux rhawm rhi keeing aux Davit, sonsang sum nawh nyiex bwan ka son min ceu kaux Simiang Siyiex, Siyiex pui Isarelax heue.”
18 Viang mawh nan, Simiang Siyiex ah nin ka keeing aux Davit, “Awm hoik koe rhawm rhi maix ti sang sum nyiex bwan ka son min ceu kaux Aux maix hoik yuh ceu pa mhawm pa koe ka daux rhawm rhi tix.Ref 8:17-18 2Sa 7:1-3; 1Been 17:1-2.
19 Viang yuh ka mawx kawx maix tak ang pon ti sum nyiex bwan, tak mawh kawn simex li maix pa sum nyiex bwan son min ceu kaux Aux heue.Ref 8:19 2Sa 7:12-13; 1Been 17:11-12.
20 Simiang Siyiex hoik yuh grum naog awm gumlox pa hoik krai Nawh Cao ti deuh mai kieh aux plud dee ot keeing aux Davit mai hoik kieh aux ngawm ka piang dangngeung pui Isarelax awm lox mukheu hoik yuh Simiang Siyiex mai aux hoik sum nyiex bwan son min ceu kaux Simiang Siyiex, Siyiex pui Isarelax heue.
21 Mai aux hoik khre dah dee tix dah, son teug sijax mukheu, pa hoik koe lox mukheu Siyiex ka daux pa hoik yuh Nawh Cao sijax mukheu tau mai keeing ex, yam viex Nawh Cao kix lih khaing meung Ejiptux heue.”
Bwan Rawg Sawlamon
22 Sawlamon cung ka plak sivoe khu dee tan Simiang Siyiex mai ka plak sivoe pui hun Isarelax mai nawh yaog taix tix khawm ra khawn ka raoma,
23 ah nin, “Simiang Siyiex pui Isarelax eue, ka daux raoma long mai ka piang haktiex in greem raoma, Siyiex pa awm Maix ang lai koe tix kaux kawx mai pa priex rien lox sijax mukheu mai jhi krax pa caux rhawm tix ka kawncau Maix Cao pa hawt grawng lawng khaix Maix Cao khawm rhawm rhi tix ka plak sivoe Maix Cao heue.
24 Maix Cao hoik priex gumlox sijax mukheu pa hoik yuh tix ka kawncau Maix keeing aux Davit, Maix Cao hoik yuh ceu an grum naog ka taix Tix heue. Awm mukheu pa krai Maix ka jheeh tix, awm pa koe daux in singaix heue.”
25 Simiang Siyiex pui Isarelax eue, yam in priex rien ka lox sijax mukheu pa hoik yuh Maix Cao ka kawncau tix keeing aux Davit mai pa hoik ah Maix Cao nin, “Phan kawn praix maix khankix chix yuh satix tix mai lawng hu plak sivoe Aux, awm lawng maix sivoe Aux, ru maix tak ang jud khaing ka piang dangngeung pui Isarelax khankix heue.”Ref 8:25 1Sim 2:4.
26 Siyiex pui Isarelax eue, kieh gumlox mukheu pa yuh Maix Cao ka kawncau Maix keeing aux Davit grum naog liak.
27 Viang mawh nan, mawh sang ot Siyiex ka piang haktiex tete lie? Jhak heue, raoma mai raoma pa kied lhaong ang lai kub dee ot son Maix Cao, nyiex bwan pa hoik sum aux in, Maix Cao nie sang chix ot ka yuh ka mawx?Ref 8:27 2Been 2:6.
28 Simiang Siyiex eue, doh keud ka lox rawg kawncau Maix bwan mai nghiet ka lox khyox khaw kok yo aux kawncau Maix ka plak sivoe Maix Cao daux in singaix,
29 Maix Cao jhak ka nyiex bwan in ku singaix, ka dah dee pa hoik ah Maix Cao nin, min ceu kaux Aux tak koe tan, Ref 8:29 Pi 12:11. yam veeh aux ngai tix plak nyiex bwan mai rawg bwan, nghiet ka lox rawg kawncau Maix bwan liak.
30 Nghiet ka lox khyox khaw kawncau Maix Cao mai pui Maix Isarelax yam hoek rawg kix bwan ka dee in, nghiet ka lox rawg kix bwan khaing raoma ka dee ot Maix Cao liak, yam mhong Maix ka lox kix, pluat ploi phimap kix liak.
31 “Yam lud pui tix kaux kaux ka paox plawg tix mai khin tix kieh nawh tiextu mai kix tak hoek ti tiextu ka plak sivoe khu dee tan Maix ka daux nyiex bwan in,
32 Maix Cao nghiet khaing daux raoma mai prawng ca ka kawncau Maix khankix, ciyang ka pa yuh pa caox caig mai kieh pa caox yuh nawh deeh hoek ka piang kaing nawh mai prawng ca pui rahsee ka daux pa rahsee mai deeh tawx bwanson ka pa rahsee yuh nawh heue.
33 “Yam som pui Maix Isarelax ka sivoe pui koeng tix, kheu koe phimap tieh feen kix ka Maix Cao, yam veeh kix tix hoek ka Maix, phan kix riep ka ceu kaux Maix mai rawg bwan khyox khaw ka Maix ka daux nyiex bwan in,
34 nghiet khaing daux raoma mai pluat ploi phimap pui Maix Isarelax mai deeh viex kix hoek ka haktiex pa hoik tawx Maix Cao ka keeing kix heue.
35 “Yam caox praix ang lhiex lih kheu jao phimap lud kix ka Maix Cao, yam deeh hoek kix tix rawg bwan ka dee in, phan kix rieb ka min ceu kaux Maix Cao mai deeh veeh ti khaing phimap tix, yam ciyang Maix Cao ka kix,
36 Maix Cao nghiet khaing daux raoma mai pluat ploi phimap kawncau Maix pui Isarelax mai sonsang lawng hu kix daux krax pa mhawm, mai deeh kieh lhiex lih ka piang haktiex, pa hoik tawx ka ceu pui Maix pa mawh sinngao pa pon kix heue.
37 Yam sibhawm praix ka piang haktiex ang ah, jhawm saux preng ang ah, jhawm saux muad ang ah mai yam yum khaox ox ka bhaung pa si aoh mai khaox yum kheu jauh rawm tix lih khaing ang ah, yam lih sido nghox ti yuh ka ma koi laux ang ah mai yam hoek pui koeng tix lai lawm ka veng kix ang ah mai khawm jhawm saux ceu pa yuh ka mawx ang ah,
38 pui Maix Isarelax tix kaux kaux ang ah, yam hoik tawng nawh ka krax ciyang pa hoek ka piang tix ka daux rhawm nawh mai phan nawh hoik yaog taix tix rawg bwan khyox khaw ka ceu patix ang ah, ka daux nyiex bwan in,
39 nghiet khaing daux raoma ka dee ot Maix Cao mai pluat ploi phimap kix mai yuh mai tawx ka pui ku kaux, ka pui pa tawng Maix Cao rhawm nawh, mawh kheu Maix Cao tix kaux khaing pa tawng rhawm kawn pui khawmuik,
40 sonsang lhat graung kix ka Maix Cao, glang singaix im ju kix ka daux haktiex pa hoik tawx Maix Cao ka keeing ex heue.
41 “Awm an son pui tang ceu, pa ang mawh pui Isarelax pui Maix Cao kawx, pa hoek khaing haktiex dee singai son min ceu kaux Maix Cao,
42 kheu kix tak mhong min ceu kaux pa ting lhaong Maix Cao mai ka riang rao taix Maix Cao mai plawng taix pa nyeu Maix Cao lih, yam hoek kix tix rawg bwan daux nyiex bwan in,
43 nghiet khaing daux raoma ka dee ot Maix Cao, yuh awm can pa rawg pui tang ceu ka Maix Cao, sonsang tawng pui haktiex khawmuik ka ceu kaux Maix Cao mai lhat graung ka Maix Cao, awm pa yuh Maix Cao ka pui Isarelax khankix mai sonsang tawng kix ka nyiex bwan pa sum aux in, mawh dee pa kok ka min ceu kaux Maix Cao heue.
44 “Yam ploi Maix Cao ceu pui tix khankix hu puing ka pui koeng khankix ka dee mawx ang ah, yam rawg kix bwan ka Simiang Siyiex, kix tak veeh ngai tix plak see veng pa hoik laug Maix Cao ka nyiex bwan pa hoik sum aux ka son ceu kaux Maix Cao,
45 “Maix Cao nghiet ka lox pa rawg kix bwan mai lox pa khyox khaw kix khaing daux raoma mai caux rhawm ka kix liak.
46 “Yam lud kix ka Maix Cao, ang koe pui pa ang lud tix kaux kawx, yam song rhawm Maix Cao ka kix mai ap kix ka pui koeng khankix mai kix mawh pui pa giex laung ka haktiex pui koeng, viang singai ang ah, dex ang ah,
47 yam hoek kix ka haktiex dee mawh kix pa giex laung, phan kix doh keud ka pa lud daux rhawm tix mai deeh khyox khaw ka Maix Cao, ka daux haktiex pa viex kix mawh pa giex laung, ah nin, yix hoik lud mai hoik yuh pa caox caig mai pa ang rahsee,
48 yam veeh kix tix hoek ka Maix Cao khawm rhawm tix, ka daux haktiex pui koeng pa giex laung kix mai rawg bwan ka Maix Cao ka plak see haktiex cao kix, pa hoik tawx Maix Cao ka keeing kix mai ka veng pa laug Maix Cao, ka nyiex bwan pa hoik sum aux son ceu kaux Maix Cao,
49 nghiet khaing daux raoma ka dee ot Maix Cao mai nghiet ka lox rawg kix bwan mai lox pa khyox khaw kix mai caux rhawm ka kix liak!
50 Mai pluat ploi phimap pui Maix Cao khankix, pa koe phimap krax lud ka Maix Cao mai khawm pa lud loe kix, pa hoik lud kix ka Maix Cao, mai deeh caux rhawm ka kix ka plak sivoe pui pa viex kix mawh pui pa giex laung, sonsang koe krax caux rhawm pui ankix ka piang kix,
51 kheu jao mawh kix pui Maix Cao mai sinngao Maix Cao, pui pa hoik viex Maix lih khaing meung Ejiptux mai khaing ka daux glah ngu rhiem,
52 kieh ngai Maix Cao jhak ka kawncau tix mai nghiet ka can ceu pa khyox khaw pui Maix Isarelax ka Maix Cao heue.
53 Simiang Siyiex eue, mawh kheu hoik tang tiah Maix kix khaing sinax ceu pui, pa ot ka piang ca haktiex in khawmuik, sonsang mawh kix sinngao Maix Cao, awm pa hoik krai Maix ka kawncau Maix Mose yam viex Maix keeing ex lih khaing meung Ejiptux heue.”
Sawlamon Nawb Bwan Ka Pui Hun
54 Yam hoik naox Sawlamon ka krax rawg tix bwan mai krax pa khyox khaw tix ka Simiang Siyiex, nawh yaog ti kaoh khaing ka plak sivoe khu dee tan Simiang Siyiex, khaing pa grux ngawng mai yaog taix tix ka raoma,
55 nawh cung mai nawb bwan ka pui Isarelax ka lox pa kied ting ah nin,
56 “Kieh Simiang Siyiex koe bwanson, pa tawx krax pa nhim ka pui Nawh Isarelax, awm pa hoik yuh Nawh lox mukheu, lox mukheu mhawm yuh Nawh tau mai kawncau Nawh Cao Mose, Ref 8:56 Pi 12:10; Yaw 21:44-45. ang lai cod tix gum kawx heue.”
57 Kieh Simiang Siyiex ex ot tau mai ex, awm ot Nawh Cao tau mai keeing ex, paw kieh Nawh Cao tik vud ka ex mai prah ka ex,
58 sonsang kieh Nawh Cao rhawm ex deeh veeh ti hoek ka Nawh Cao mai sonsang pon hu ex ka daux krax Nawh Cao mai priex gumlox pingnyap Nawh khankix mai beenli Nawh Cao khawm lox tat jhawm prawng pa tawm Nawh ka keeing ex khankix heue.
59 Kieh gumlox pa khyox khaw aux ka plak sivoe Simiang Siyiex, mawh pa dex mai Simiang Siyiex, Siyiex ex ku singaix, sonsang caux rhawm Nawh ka kawncau tix mai ka pui Nawh Isarelax khankix, awm pa lo kix ku singaix,
60 mai sonsang pon tawng pui piang haktiex khawmuik ka mawh Nawh Cao Simiang Siyiex, Siyiex tix kaux khaing heue.
61 Mai kieh rhawm rhi pex mawh pa kaux sijax ka Simiang Siyiex ex mai hawt hu ka daux lox lai beenli Nawh Cao mai priex ka gumlox pingnyap Nawh Cao, awm pa hoik koe ka daux in singaix heue.”
Grawng Ap Sawlamon Ka Nyiex Bwan
62 Simiang mai pui Isarelax khankix tan krax tan pa appong ti ka plak sivoe ngai Simiang Siyiex heue.
63 Sawlamon yuh krax tan pa nhim, ka mawie ra mheen ra rheng mu mai yung tix sien ra mheen mu ka Simiang Siyiex heue.Mai ap nyiex bwan ka Simiang Siyiex heue.
64 Ka daux singaix an simiang appong lawg daux sigreung pa koe sivoe nyiex bwan Simiang Siyiex mawh pa singax singeh, mai simiang tan krax tan pa gleeing mai krax tan phawng nghox ca mai khawm khlawp bee krax tan pa nhim tan, mawh kheu iak khu dee tan tawng lheung pa koe ka plak sivoe Simiang Siyiex ang kub tan krax tan pa gleeing mai krax tan phawng nghox ca mai khlawp bee krax pa nhim khankix ka piang heue.
65 Yam an Sawlamon khan kheu pawie ting, ka pui Isarelax pa kied haoh hun, pa hoek jah khaing dee laig ka veng Hamat tom hoek ka rawm klawng iak Ejiptux, pa hoek ka pawie plak sivoe Simiang Siyiex ex, aliah singaix ra bawg khawmuik kao pon singaix heue.
66 Yam hoek daux daix singaix, nawh ploi pui khankix deeh ing mai kix nawb bwan ka simiang mai tang ing ka nyiex tix, ka daux pa nyawm rhawm nyawm mai ka daux pa gaux rhawm ti, son krax pa mhawm pa yuh Simiang Siyiex ka kawncau Nawh simiang Davit mai ka pui Nawh Isarelax khawmuik heue.