7
Nyiex Tang Ceu Pa Sum Sawlamon
1 Sawlamon sum nyiex haw tix kao loe num mai nawh hoik kied grum naog khawmuik heue.
2 Nawh sum nyiex haw ka khaox daux nong gawng Lebanon khankix, krax lang tix yieh sawk, krax vieh tixphwan sawk mai krax lhaong tixngoe sawk, tau mai rong pon tia mai kab lat ka piang rong heue.
3 Mai nawh yuh braux ka phia khaox piak van, lawg plak piang pa koe ka piang rong tixpon phwan lawg, tix tia koe kao phwan lawg heue.
4 Siviex iak koe loe tia mai siviex iak an hoik ra lai see ka paox ti heue.
5 Siviex mai siviex iak mai pang nawh khankix mawh pakpeung pon daog mai siviex iak loe tia ra lai see ka paox ti heue.
6 Nawh sum nyiex kum pa koe rong, krax lang tixphwan sawk mai krax vieh tixngoe sawk, koe sidub ka plak siviex iak an loe tia tau mai rong khawm glawk bawng heue.
7 Mai nawh yuh nyiex kum dangngeung pa mawh dee prawng see, nawh tawm an ka phia khaox piak van, jah ka bing nyiex tom hoek ka braux plak daux heue.
8 Mai nyiex haw ot nawh koe plak khaix nyiex kum, rhoi khaix taix pa yuh kix awm paox tix mai nawh baox yuh nyiex tix lhang pa awm nyiex kum dee prawng see, son kawn bun Pharaw pa mawh moengRef 7:8 1Sim 3:1. nawh heue.
9 An khawmuik sang ti ka simaox pa koe ngawh mai saik sidu awm paox tix mai rid plak khaix mai sivoe ka jhi, jah khaing plak jaong tom hoek plak piang mai baox sang simaox jah ka plak praix tom hoek ka brawk ting heue.
10 Jaong num an sang tix ka simaox pa kied ting pa koe ngawh jum mai simaox an tiblah lang kao sawk, tiblah lang daix sawk heue.
11 Ka piang an mawh simaox pa koe ngawh jum, pa hoik saik tix sidu awm paox tix mai khaox piak van heue.
12 Nawh vie vung viang brawk nyiex haw ka simaox pa hoik saik tix loe tia mai ka khaox piak van tix tia, pak daux brawk nyiex bwan mai sidub nyiex bwan kawx vie tix awm an heue.
Kaing Jhaw Yuh Hiram
(2Been 2:13-14; 3:15-17)
13 Simiang Sawlamon ploi pui hu kok ka Hiram khaing Turux heue.
14 Nawh mawh kawn simex miexmai pui Napthalix mai keeing nawh mawh pui veng Turux cao yuh kaing kraung tawng lheung, nawh grum naog ka pingnya cuyi mai krax tawng krax yung mai min ka kaing kraung tawng lheung heue. Nawh hoek ka simiang Sawlamon mai yuh kaing son nawh khawmuik heue.
15 Nawh raug rong tawng ra mu, rong tix mu lhaong kao daix sawk, plak ting kao ra sawk heue.
16 Nawh baox raug kaing rong ra mu ka tawng sonsang sau ka piang toeh rong, krax lhaong kaing rong tix mu koe phwan sawk mai plak lhaong an tix mu kawx koe phwan sawk heue.
17 Nawh yuh ngai rub tawng mai maox ceng tawng mai lhop ngai rub tawng aliah mu ka piang choek rong tix mu ka ku mu rong heue.
18 Nawh yuh riang plix kla jiang mai sau ka piang ngai rub ra tia vung viang kaing rong khankix, sonsang tawb ka piang kaing rong pa koe ka piang toeh rong khankix mai ka kaing rong pa kawn deuk an tix mu kawx yuh awm an heue.
19 Mai kaing rong pa koe piang toh rong sidub khankix mawh kho tai kraox nhawng pa koe ka pon sawk heue.
20 Nawh sau plix kla jiang khankix ka piang kaing rong pa koe piang toh rong an ra mu, hawt dee peem rong dex dee koe ngai rub hawt vung viang ji koe riang plix kla jiang ka ra tia, khawm ra tia koe ra yieh mu heue.
21 Nawh sum rong sidub nyiex bwan, mai jung rong tix mu ka plak dawm kok an mawh Yakhim mai baox jung rong tix mu ka plak gwiex mai kok an mawh Bawzax heue.
22 Toh kaing rong koe kho tai kraox nhawng ka heue. Mai kaing yuh rong khankix hoik sidah heue.
Kraung Khrai Son Nyiex Bwan
(2Been 4:2-5)
23 Nawh baox raug dung rawm tawng lheung lak lo, krax vieh kao sawk, lhaong phwan sawk mai hawt vung viang moing koe tixngoe sawk heue.
24 Hawt greem praok moing hoik yuh t sau riang loi plix singiien hawt vung viang moing tix sawk kao mu, riang loi plix singiien an ra tia hoik raug tix tau ka moing dung rawm heue.
25 Mai deuh dung rawm an ka piang riang mawie kao ra mu, riang mawie an loe mu veeh ngai tix plak laong, loe mu veeh ngai tix plak klip singaix, loe mu veeh ngaix tix plak seh mai an loe mu veeh ngai tix ka plak lih singaix mai deuh dung rawm an ka piang riang mawie khankix mai kieh mawie khankix ghaix kre tix ka plak daux heue.
26 Krax pu dung rawm an, koe tix tiag taix mai moing awm pakpeung moing klong mai awm kho tai kraox nhawng mai pon sau rawm ka daux ra rheng bat heue.
27 Nawh yuh khaox ngawm tawng lheung kao mu, lang pon sawk, vieh pon sawk, lhaong loe sawk heue.
28 Nawh yuh pakpeung khaox ngawm awm in, vung viang daog khaox ngawm an koe daux sang sau lat rhiem ka heue.
29 Ka piang dee sau lat an koe riang sivai sangsi, riang mawie, riang Cherubin ka heue. Ka piang daog khaox ngawm an koe dang tix mu, ka plak greem riang sivai sangsi, koe mawie mai riang kho tai ka heue.
30 Khaox ngawm tix mu koe jaong lawx tawng lheung pon mu mai khawm gawng lat tawng ka mai khawm pon daog koe dang pa sang deuh pan ka heue. Dang pa deuh pan hoik raug tix kab ka khaox ngawm an mai koe riang kho tai ka ku mu heue.
31 Moing dang pa ting an vieh tix sawk, mai lak lo daux mai pakpeung awm khaox ngawm, lang tix sawk, mai tix diex mai ka piang praok moing khankix mawh pa bre tix saik, dang pa deuh pan an koe pakpeung pon daog mai ang lak lo daux heue.
32 Greem lat khankix koe jaong lawx pon mu, gawng jaong lawx an hoik kleuk tix mai khaox ngawm, lhaong jaong lawx ku mu koe tix sawk mai tix diex heue.
33 Jaong lawx an khankix yuh awm pakpeung jaong ling lawx naing brung, gawng lat, jim, plawng mawng mai khawm gawng joh khawmuik mawh pa raug tix heue.
34 Khaox ngawm an tix mu koe caong pa joh ka pon daog, caong an mawh pa raug tix kab mai khaox ngawm heue.
35 Ka piang caong khaox ngawm an sau kangkaw lak lo pa koe tix diex ka, caong mai lat khankix kawx hoik mawh pa raug kleuk tix tau mai toeh khaox ngawm an heue.
36 Ka piang pakngai dang mai phia tawm khankix, hoik saik riang Cherubin mai sivai sangsi mai khaox jhie yaong tau mai riang kho tai hawt vung viang heue.
37 Nawh yuh khaox ngawm pa awm paox tix kao mu an khawmuik hoik raug awm paox tix, diang mai pakpeung kawx awm paox tix heue.
38 Nawh yuh pan ting kao mu ka tawng, Ref 7:38 Lih 30:17-21. pan ting an tix mu hoik kub sau rawm daux tix pon bat mai pan ting an vieh pon sawk, ka piang khaox ngawm kao mu nawh deuh pan ting ka piang ku mu heue.
39 Mai nawh deuh khaox ngawm plak dawm nyiex bwan phwan mu, plak gwiex phwan mu mai deuh dung rawm plak dawm nyiex bwan plak seh krax lih singaix heue.
Kraung Shiao Son Nyiex Bwan
40 Hiram hoik yuh aw, bug rawm mai pan khankix mai nawh hoik yuh kaing son simiang Sawlamon mai nyiex bwan Simiang Siyiex heue.
41 Ceu pa hoik yuh nawh khankix, mawh rong ting ra mu toeh peem kaing rong ra mu mai ngai rub pa tawb piang toeh rong an ra pheen,
42 mai riang plix kla jiang khankix pon yieh mu, pa sau ka piang ngai rub an ra pheen, tix pheen ra tia ka piang ngai rub pa sang tawb ka piang toeh peem kaing rong an khawm ra heue.
43 Khaox ngawm kao mu mai pan ting kao mu, pa koe ka piang khaox ngawm khankix,
44 dung rawm tix mu mai riang mawie kao ra mu, pa koe plak greem dung rawm an,
45 mai aw, bug rawm mai pan ting khankix mai kraung ceu in khawmuik hoik mawh pa kieh simiang Sawlamon Hiram yuh son nyiex bwan Simiang Siyiex, pa hoik raug tix ka tawng lheung heue.
46 Simiang hoik kieh kix raug ceu inkix ka dee koe tiex klox ka daux lung Yawdan, sinax veng Sukot mai veng Zaretan heue.
47 Sawlamon ang lai ciang tix yaox ka kraung an khankix, kheu hoik kied nie, krax cien tawng lheung ang lai dak uik tawng ka heue.
48 Sawlamon yuh kraung shiao ka daux nyiex bwan Simiang Siyiex khawmuik, pa mawh khu khri dee tan mai pheen khriRef 7:48 Lih 30:1-3. son pa khan blah plak sivoe Nawh Cao, Ref 7:48 Lih 30:1-3.
49 mai jawk ten khri nawnaw, pa koe plak dawm phwan mu mai plak gwiex phwan mu, ka plak sivoe dee pa kied singax, riang kho tai, kawk ngu khawm gip kong khri,
50 kawk, sigiiep ngu, klong, lawk tuh mai pan pa yuh ka khri nawnaw mai jhong siviex khri, son siviex ting pa koe ka daux lawg plak daux dee pa kied singax mai son siviex laig daux lawg ting bang kum pa koe ka daux nyiex bwan heue.
51 Khaix hoik yuh simiang Sawlamon kaing jhaw khawmuik ka son nyiex bwan Simiang Siyiex, nawh viex pa hoik appong keeing nawh DavitRef 7:51 2Sa 8:11; 1Been 18:11. tix tan pa mawh mau, khri mai kraung khrai pa shiao khawmuik, hoek daux nyiex bwan mai sau ka daux krao sinngao nyiex bwan Simiang Siyiex heue.