1 Khaix hoik lih hu pui Isarelax khaing meung Ejiptux pon yieh tixdaix num, yam kwang simiang Sawlamon ka piang pui Isarelax pon num, ka daux khix Zepha khix ra, nawh jah tix sum nyiex bwan Simiang Siyiex heue. 2 Nyiex bwan pa sum simiang Sawlamon son Simiang Siyiex, krax lang tix gliah sawk, krax vieh tixnga sawk, krax lhaong tixngoe sawk heue. 3 Sim dub pa koe sivoe nyiex bwan, plak lang tixnga sawk, plak vieh kao sawk, plak vieh an sidu mai nyiex bwan heue. 4 Mai nawh yuh siviex iak sonsang riang ka daux nyiex bwan heue. 5 Nawh sum lawg jawn hawt vung viang plak praix ding nyiex bwan, hawt vung viang lawg pa singax singeh mai lawg pa plak jhi khawm ra dah, lawg jawn hoik rawb vung viang an heue. 6 Lawg plak greem vieh phwan sawk, lawg sigreung vieh liah sawk mai lawg plak piang vieh aliah sawk, nawh yuh lat ngip paox ti hawt vung viang plak praix nyiex bwan, son ang lat khankix chun tix laig ka ding nyiex bwan heue. 7 Yam sum ka nyiex bwan, kix sum ka simaox pa saik pa hoik khre tix sivoe ang nyang viex hoek, mawh kheu nan, ang lai chix mhong lox daix, lox moe mai lox kraung rhiem yam sum ka nyiex bwan heue. 8 Krax laig ka lawg plak greem koe ka plak dawm nyiex bwan, kix haok ka lawg sigreung ka bawng vawk vek, khaing lawg sigreung haok ka lawg plak piang glawk loe heue. 9 Mai nawh sum nyiex bwan hoik grum naog mai nawh yuh braux plak greem nyiex rawg bwan mai lhop rong, nuk ka phia khaox piak van heue. 10 Nawh sum lawg rawb vung viang nyiex bwan lhaong phwan sawk mai lawg an sitoe tix mai nyiex bwan ka lat khaox piak van heue. 11 Gumlox Simiang Siyiex hoek ka simiang Sawlamon ah nin, 12 pa dex mai nyiex bwan sum maix in, phan maix hawt lox lai beenli Aux mai nghiet lox tat jhawm prawng Aux mai priex ka lox tawm pingnyap Aux mai hawt yuh ceu an khawmuik, Aux tak kieh gumlox pa hoik krai Aux ka keeing maix Davit kaux cong mai maix heue. 13 Mai Aux tak ot sinax pui Isarelax mai ang tik vud ka pui Aux Isarelax heue.” 14 Simiang Sawlamon hoik sum nyiex bwan tom grum naog heue. 15 Mai nawh tawb ding plak daux khankix ka phia khaox piak van, jah khaing phia tawm daux nyiex bwan tom hoek ka braux plak daux yuh tix ka khaox mai nawh tawm ka piang bing daux nyiex bwan ka phia khaox gix pu heue. 16 Nawh yuh lawg dee pa kied singax singeh, krax lang krax vieh tixnga sawk awm paox, ka plak khaix daux nyiex bwan ka phia khaox piak van heue.Ref 6:16 Lih 26:33-34. 17 Mai lawg pa koe daux sigreung nyiex bwan, sivoe ngai dee pa kied singax plak lang koe tixpon sawk heue. 18 Plak daux nyiex bwan koe khaox piak van pa hoik bre tix saik awm tux tai mai riang tai pa hoik pruh pa yuh tix ka khaox piak van, ka ding an ang lai chix yaox ka simaox heue. 19 Mai nawh khre rien dee pa kied singax singeh daux nyiex bwan, sonsang deuh teug sijax mukheu Simiang Siyiex tan heue. 20 Krax lang lawg dee pa kied singax singeh koe tixnga sawk, plak vieh tixnga sawk mai plak lhaong tixnga sawk, nawh om an ka khri nawnaw mai yuh khu dee tan ka khaox piak van heue. 21 Simiang Sawlamon om plak daux nyiex bwan ka khri nawnaw, nawh takteue soi khri ka sivoe ngai dee pa kied singax an mai om ka khri heue. 22 Nawh om nyiex bwan ka khri, tom sidah hoik sum ka nyiex bwan heue. Mai baox om khu dee tan mai lawg dee pa kied singax singeh ka khri heue.Ref 6:22 Lih 30:1-3. 23 Nawh yuh riang Cherubin ra mu pa lhaong kao sawk ka khaox sanlun ka dee pa kied singax singeh heue. 24 Pruik Cherubin an tix plak koe phwan sawk mai plak an tix plak koe phwan sawk, mawh kheu nan jah ka toeh pruik plak in tom hoek toeh pruik plak an lang kao sawk heue. 25 Rieng Cherubin tang mu hoik tiag tix koe kao sawk, Cherubin an khawm ra mawh pa sidu awm paox tix mai awm riang grang Asherax paox tix heue. 26 Krax lhaong riang Cherubin an tix mu koe kao sawk mai riang Cherubin an tang mu kawx sidu awm paox tix heue. 27 Nawh deuh riang Cherubin an ka daux lawg pa kied singax, mai pruik riang Cherubin an di tix lih mai pruik Cherubin an tix mu cux ka ding plak in mai pruik Cherubin tang mu an cux ka ding plak an mai pruik ankiex khawm ra hoik cux paox ti, tix mu tix plak ka daux sigreung lawg an heue. 28 Mai nawh om riang Cherubin an ka khriRef 6:23-28 Lih 25:18-20. heue. 29 Mai nawh saik riang Cherubin mai khaox jhie yaong mai pruh tai hawt vung viang plak praix plak daux nyiex bwan heue. 30 Nawh om phia tawm nyiex bwan ka khri khawm plak daux plak praix heue. 31 Son krax laig ka dee pa kied singax singeh nawh yuh siviex ka khaox sanlun, plah phia siviex mai pang siviex khankix koe phwan son tix son khaing ding heue. 32 Nawh yuh siviex an ra mu ka khaox sanlun mai saik riang Cherubin mai riang khaox jhie yaong mai riang pruh tai khankix ka piang siviex mai om an kix ka khri mai baox phruah rawm khri ka piang riang Cherubin mai ka khaox jhie yaong heue. 33 Son pang siviex laig ka daux, nawh yuh ka khaox sanlun, pa vieh khaing ding pon son tix son heue. 34 Mai siviex an ra mu yuh tix ka khaox gix mai plah siviex an ra mu chix niiep ti mawh tix mu mai plah siviex pa deuk an ra mu kawx chix niiep ti awm an heue. 35 Mai nawh saik riang Cherubin mai riang khaox jhie yaong mai riang pruh tai ka piang ceu an khankix, mai nawh om an khankix ka khri mai nawh baox om khri ka piang rhoi saik khankix heue. 36 Mai nawh hoik kaw jaong ding ka simaox pa hoik saik tix loe thaix mai jaong ding khankix ka phia khaox piak van tix thaix heue. 37 Ka daux pon num tix num khix Zipha khix ra, kix jah tix kaw num riah nyiex bwan Simiang Siyiex heue. 38 Ka daux kao tix num ka khix Bulax khix daix, nyiex bwan hoik sum ti khawmuik mai hoik hoik awm pa bak pa keud kix heue. Kix sum nyiex bwan an aliah num heue.