5
Khrex Tix Sum Nyiex Bwan
(2Been 2:1-18)
1 Yam mhong Hiram simiang veng Turux ka groi kix bee ka Sawlamon mai plud dee ot keeing tix, nawh ploi kawncau ti hu ka Sawlamon, mawh kheu moh Hiram ka simiang Davit jheung jheung heue.
2 Mai Sawlamon ploi pui ti hu ah nin ka Hiram,
3 Maix tawng ka ang keeing aux Davit pon sum nyiex bwan ka daux ceu kaux Simiang Siyiex nawh, kheu yaox nawh ti puing naing kudah tom hoek bawg yam kieh Simiang Siyiex pui koeng nawh khankix, ot greem tiag caong nawh heue.
4 Yam in Simiang Siyiex kieh haktiex hawt vung viang an yiien yawg, mawh kheu ang pui koeng pui khoi mai pui caox caig khankix lai koe heue.
5 Aux keud ti sang sum nyiex bwan ka daux ceu kaux Simiang Siyiex aux, awm pa hoik ah Simiang Siyiex ka keeing aux Davit, kawn simex maix pa sang yaog aux mawh cao pa ngawm piang dangngeung maix mai pa sang plud maix an, nawh tak sum nyiex bwan ka daux ceu kaux Aux heue.Ref 5:5 2Sa 7:12-13; 1Been 17:11-12.
6 Mawh kheu nan, tawx lox ka kawncau maix, sonsang kid kix khaox piak van son aux, khaing gawng Lebanon mai kawncau aux khankix tak teem kawncau maix mai aux tak tawx ngawh riang kawncau maix, maix tawng ang pui yix chix kid khaox awm chix kid pui Sidom heue.
7 Yam mhong Hiram ka lox Sawlamon, nawh kied koe krax gaux rhawm ah nin, “Kieh krax pa yaogyaw bwanson koe ka Simiang Siyiex ka daux in singaix, mawh kheu Nawh Cao hoik tawx kawn simex Davit pa koe pingnya cuyi tix kaux, kwang ka piang pui ting heue.”
8 Khaix an, nawh ploi pui hu ah nin ka Sawlamon, “Aux hoik keud ti yaox lox pa tawm maix ka aux, aux tak tawx khaox piak van mai khaox gix awm pa lo maix heue.”
9 “Kawncau aux khankix tak teei khaox an lih khaing gawng Lebanon mai viex hoek krax rawm sigrit sigra, aux tak kieh kix sibloe khaox an ka piang kram daux rawm sigrit sigra mai viex hoek dee tin mai kix tak rieb khaox an ka dee an mai tak yaox ti tawx pa ih grum naog ka son pui aux khankix, sonsang fah rhawm aux ka heue.”
10 Mai Hiram tawx khaox piak van mai khaox gix awm pa simie nawh ti lo heue.
11 Son priex pa sang ih pui Hiram tix num hoik tix num, Sawlamon tawx gaox nghox ca ra mheen kawrax mai bee pa hoik ciied singax tixnga kawrax heue.
12 Mawh kheu nan, Simiang Siyiex tawx pingnya cuyi ka Sawlamon, awm pa hoik koe lox mukheu Nawh Cao, son ang naing lai koe, Hiram mai Sawlamon yuh sijax mukheu tau mai paox tix heue.
13 Simiang Sawlamon laug pui pa sang yuh kaing ka daux pui Isarelax mai pui pa hoik laug nawh koe loe mheen kaux heue.
14 Mai nawh ploi kix lai loh ti ot ka gawng Lebanon, tix khix tix mheen kaux mai kix yaox ti ot piang gawng Lebanon tix khix mai kix yaox ti deeh ing ot ka daux nyiex tix ra khix mai Adawniram mawh cao kaing pa kwang ka pui yuh kaing heue.
15 Pui pa cau Sawlamon kieh klawm khaox koe aliah mheen kaux mai pui pa kaong simaox ka piang gawng koe daix mheen kaux heue.
16 Mai Sawlamon kieh pui loe rheng loe yieh kaux mawh cao kaing pa bung ka piang pui pa yuh kaing khankix heue.
17 Simiang tawx lox ka kix mai kieh kaong simaox ting mai simaox koe ngawh koe jum mai simaox pa hoik saik tix khankix hoek, sonsang kaw jaong num nyiex bwan ka heue.
18 Mawh kheu nan, cub cangmai Sawlamon mai cangmai Hiram tau mai pui Gebalax khre rien khaox mai simaox sonsang sum ka nyiex bwan heue.