4
Grawng Kwang Sawlamon
1 Sawlamon mawh simiang ka piang pui Isarelax heue.
2 Mai inkix mawh pa kwang greem nawh khankix, Azarix kawn simex Zadok mawh cao giex kaing li heue.
3 Elihawrap mai Ahiyax kawn simex Shisha mawh cao tiiem lai, Yehoshaphat kawn simex Ahilut mawh cao kaing priex carang heue.
4 Beneyax kawn simex Yehawyadax mawh cao kaing naing ting ka piang kru naing, Zadok mai Abiata mawh cao giex kaing li heue.
5 Azarix kawn simex Natan mawh cao kwang ka piang cub cao kaing, Zabuk kawn simex Natan mawh cao giex kaing li mai mawh paox grawm simiang heue.
6 Ahisha mawh cao kwang ka daux nyiex haw mai Adawniram kawn simex Abada mawh cao kwang ka piang cub pui yuh kaing heue.
7 Mai Sawlamon deuh cao pa kwang piang haktiex pui Isarelax kao ra kaux, pa sang tawx pa ih son simiang mai son pui pa ot daux nyiex haw nawh, daux tix num, tix khix tix kaux, mawh cao teei beeh glawm khre rien ka pa ih heue.
8 In mawh ceu kaux kix, Hurax mawh cao kwang ka piang gawng Epharem,
9 Bendeka mawh cao kwang ka veng Makat, veng Shalabim, veng Bietshemiet mai veng Elonbiethanan khankix,
10 Benhashiet mawh cao kwang ka veng Arubot mai veng Sawkhaw mai haktiex pa koe hawt veng Hepha khankix,
11 Benabinadat mawh cao kwang haktiex Dawrax khawmuik, nawh teei ti moeng kawn bun Sawlamon pa kaux Taphat heue.
12 Banax kawn simex Ahilut mawh cao kwang veng Tanak, veng Magidaw mai veng Bashan khawmuik, pa koe praok veng Zaretan pa koe greem veng Yezerelax khankix, jah ka veng Bietshan tom hoek ka veng Abelamehawla hu tom hoek ka plak laong veng Yawkanam heue.
13 Begebax mawh cao kwang ka veng Ramat pa koe ka daux haktiex Gilat mai dee ot doeh ru Manashe yaong Ya-irax pa koe ka daux haktiex Gilat mai veng Aragawbax, pa koe ka haktiex Bashan mai khawm veng ting tixgliah veng, pa koe guh veng mai pa yuh jhong siviex veng ka tawng lheung khankix heue.
14 Ahinadat kawn simex Idaw, mawh cao kwang ka veng Mahanem,
15 Ahima mawh cao kwang ka daux kien Napthalix, nawh kawx teei ti moeng Basemat kawn bun Sawlamon,
16 Banax kawn simex Hushie mawh cao kwang ka daux kien Asha mai veng Alot,
17 Yehoshaphat kawn simex Parua mawh cao kwang ka daux kien Issakha,
18 Shimix kawn simex Elax, mawh cao kwang ka daux kien Benyamin,
19 Gebax kawn simex Urix, mawh cao kwang ka daux haktiex Gilat, haktiex cie simiang Sihong pui Amawrix mai cie Awgax khaing haktiex Bashan mai nawh mawh cao kwang ka haktiex an nong nong heue.
Pingnya Cuyi Sawlamon Haok Hwan
20 Pui Yudax mai pui Isarelax hoik kied haoh hun awm mhaik praok rawm sigrit sigra, kix ih nyaux mai gaux rhawm ti heue.
21 Sawlamon kwang haktiex khawmuik, jah ka rawm klawng Yufrethi tom hoek ka haktiex pui Philitix, tom hoek ka mee haktiex Ejiptux, Ref 4:21 Jah 15:18; 2Been 9:26. kix viex keen hoek mai yuh kaing jhaw son Sawlamon, glang yam im ju nawh heue.
22 Priex ih Sawlamon tix ngaix uik phawng gaox nghox ca tixngoe kawrax mai phawng gaox koi tixgliah kawrax heue.
23 Mawie pa laung kieh kluing kao mu mai mawie bla sawm daux gwang rib tixnga mu mai yung tix yieh mu, lheu khaing an mawh cak, pex rang, kiah mai sim ceu pa bee khankix heue.
24 Mawh kheu hoik pon kwang nawh haktiex plak klip singaix rawm klawng Yufrethi khawmuik, jah ka veng Tiphasa tom hoek ka veng Gaza mai nawh hoik kwang ka piang simiang haktiex can pa koe ka plak klip singaix rawm klawng Yufrethi mai hoik kieh haktiex koe hawt vung viang nawh yiien yawg tix heue.
25 Pui Yudax mai pui Isarelax yaox ti ot yiien yawg ka greem veei nhu plix siiet mai greem veei khaox ruh tix, jah ka veng Dan, tom hoek ka veng Berashebax, glang bawg yam kwang nawh haktiex heue.
26 Sawlamon koe kawg brung pon mheen lhang, son ling lawx naing nawh mai pui naing brung tix mheen ra rheng kaux heue.Ref 4:26 1Sim 10:26; 2Been 1:14; 9:25.
27 Cao kwang kao ra kaux hoik tang teei beeh glawm tix kaux tix khix mai khre rien pa ih son Sawlamon mai son pui pa ot daux nyiex haw khawmuik mai yaox ti khre grum naog heue.
28 Kix baox viex nghox koi mai brex nghox hoek ka son brung mai law kaux mawh kaux an, awm koe beeh glawm kix heue.
29 Mai Siyiex tawx pingnya cuyi ka Sawlamon mai pa vieh va rhawm awm mhaik rawm sigrit sigra heue.
30 Mawh kheu nan, pingnya cuyi Sawlamon lheu khaing pingnya cuyi pui pa ot ka plak lih singaix mai khaing pui pa koe pingnya cuyi pa ot ka daux meung Ejiptux heue.
31 Sawlamon nie lheu koe pingnya cuyi khaing pui khawmuik mai khaing Ethan pui EzarahiRef 4:31 Yaog 89 Title. mai Heman, Khalakhawla mai Narada kawn simex Mahawla khankix mai min ceu kaux nawh hoik tah hu ka piang haktiex khawmuik heue.
32 Nawh ah lox kab loe rhengRef 4:32 Kab 1:1; 10:1; 25:1. gum mai lai rhaxRef 4:32 Song 1:1. tix rheng mai phwan phuk heue.
33 Nawh baox krai grawng khaox khankix, jah ka khaox gix pa koe ka haktiex Lebanon, tom hoek ka khaox taux im krim pa kuah ka piang guh veng, nawh baox krai grawng totiag kuceu mai grawng sim kuceu mai viag pa chix chuh chix mu mai grawng kax daux rawm khankix heue.
34 Mai simiang pui ka piang haktiex khawmuik, pa hoik mhong ka grawng pingnya cuyi nawh khankix, hoek sonsang nghiet tix pingnya cuyi pa chix simiang Sawlamon heue.