3
Sawlamon Teei Kawn Bun Pharaw
1 Sawlamon yuh paox pie tau mai Pharaw meung Ejiptux mai nawh teei ti moeng kawn sibun Pharaw, khaix an nawh viex sibun an ing ka veng Davit mai kiex ot tan tom hoik sum nawh nyiex haw tokaux tix mai nyiex bwan Simiang Siyiex mai guh veng vung viang veng Yerusaliem heue.
2 Yam an mawh kheu ang nyang sum nyiex bwan son ceu kaux Simiang Siyiex tan tix lhang kawx, pui khankix yuh krax tan pa appong ka dee pa lhaong heue.
Sawlamon Rawg Pingyang Cuyi
(2Been 1:1-13)
3 Sawlamon moh ka Simiang Siyiex mai nawh hawt grawng lawng khaix beenli pa deuh keeing nawh Davit mhawm mhawm, lheu khaing an nawh appong krax tan mai gleeing nyawng bhawng ka dee pa lhaong heue.
4 Yam an simiang lih hu ka veng Gibun, sonsang appong krax tan tix, mawh kheu dee an mawh dee pa kied ting lhaong, Sawlamon tan to tan pa gleeing ka piang khu dee tan tix rheng mu heue.
5 Simiang Siyiex lih bleeh ka Sawlamon daux veng Gibun, ka daux camaox ponsawm ah nin, “Simie maix Aux tawx ceu patix ka maix leh.”
6 Mai Sawlamon ah nin, “Maix Cao hoik jhi krax pa caux rhawm tix ka kawncau Maix keeing aux Davit, mawh kheu nawh hawt grawng lawng khaix Maix Cao daux krax pa mawh meh mai pa rahsee mai pa rah rhawm tix sivoe Maix Cao, Maix Cao hoik tawx krax caux rhawm pa ting lhaong ka son nawh mai hoik tawx kawn simex ka nawh pa sang ngawm ka piang dangngeung nawh, awm pa koe daux in singaix heue.
7 Simiang Siyiex eue, Maix Cao hoik yaog kawncau Maix mawh simiang pa plud keeing aux Davit, viang mawh nan, aux kawn mawh kawn nyawm, aux ang tawng grawng pa sang lih sang laig tix heue.
8 Mai kawncau Maix Cao ot sigreung pui Maix pa hoik laug Maix ti teei mawh pui ting mai pa ang lai uik simin heue.
9 Mawh kheu nan, tawx pingnya krax tawng ka kawncau Maix, sonsang chix prawng ca aux ka pui Maix khankix mai sonsang chix gwieh aux ka pa mhawm mai pa caox, mawh pui mawx pa sang pon prawng ka cup pui haoh pui hu nie ding nie dod lie?”
10 Lox bwan pa rawg Sawlamon an, mawh pa khaw rhawm Simiang Siyiex ka heue.
11 Simiang Siyiex ah nin ka nawh, “Mawh kheu maix ang rawg krax lang ju lang phan mai ang rawg krax mag mi mai ang rawg sonsang laux ju pui pa koeng ka maix khankix, viang mawh nan maix rawg ngie pingnya krax tawng sonsang chix prawng ca tix ka daux pa rahsee,
12 Aux tak tawx awm pa rawg maix, jhak heue, Aux hoik tawx rhawm pa naog mai pingnya cuyi ka maix, ang koe pui pa awm maix sivoe in tix kaux kawx mai ang lai koe pa awm maix khaix in tix kaux kawx heue.
13 Mai Aux baox deeh tawx ceu pa ang maix rawg, krax mag mi mai min plakngai ka maix, glang singaix yam im ju maix, simiang pa awm maix tak ang koe tix kaux kawx heue.
14 Phan maix lawng hu daux krax Aux mai priex ti hawt beenli Aux mai lox pingnyap Aux khankix, awm hoik lawng keeing maix Davit khaix Aux, Aux tak kieh singaix im ju maix lang heue.”
15 Yam siduad Sawlamon khaing it tix, nawh tawng ka mawh camaox, khaix an nawh hu ka veng Yerusaliem mai cung ka plak sivoe teug bwan sijax mukheu Simiang Siyiex mai tan krax tan pa gleeing mai krax tan pa nhim mai yuh pawie khan kheu son kawncau tix khankix heue.
Krax Prawng Ca Sawlamon
16 Yam an sibun coh kaux ra kaux hoek cung ka plak sivoe simiang heue.
17 Sibun an tix kaux ah nin, “Simiang eue, sibun in mai aux ot daux nyiex tix lhang, aux hoik keh glang yam ot yiex tau heue.
18 Yam hoik naog loe singaix, sibun in kawx keh mai yiex ot tau, pui tang kaux ang ot tau mai yiex tix kaux kawx daux nyiex heue.
19 Mai kawn simex sibun in hoik yum ponsawm, kheu jao gut nawh yam it tix heue.
20 Mawh kheu nan, nawh kaoh greung sawm, yam laig it aux mai teei kawn simex aux khaing aux mai deuh kawn simex aux ka piang naok tix mai deuh kawn simex yum tix ka piang naok aux heue.
21 Yam kaoh aux khaing it tix ponngawb, sonsang tawx kawn simex tix peue, aux yaox ka hoik yum nawh, viang mawh nan, yam jawg aux ti jhak ponngawb, kawn an ang mawh kawn simex pa keh aux heue.”
22 Khaix an, bun tang kaux an tix kaux ah nin “Ang mawh, kawn ngie pa im ju an, mawh kawn simex aux, kawn simex pa yum an mawh kawn simex maix, ” Mai bun sivoe an deeh ah nin, “Ang mawh, kawn simex pa yum an mawh kawn simex maix, kawn simex pa im an mawh kawn simex aux, ” Awm an kiex thung thiang paox ti ka plak sivoe simiang heue.
23 Mai simiang ah nin, bun tix kaux ah nin, “Kawn simex im in mawh kawn aux, kawn simex pa yum an mawh kawn maix mai bun tang kaux ah nin, ang mawh, kawn simex pa yum an mawh kawn maix mai kawn simex pa im mawh kawn aux heue”
24 Khaix an simiang ah nin, “Viex vaig hoek ka aux tix kre, ” Mawh kheu nan, kix viex vaig tix kre hoek ka simiang heue.
25 Mai simiang ah nin, “Lug kawn ngie pa im an koe ra plak mai tawx ka bun an kiex tix kaux tix plak heue.”
26 Khaix an, miex pa im kawn simex an, krai ah nin ka simiang, mawh kheu kied caux rhawm kiex ka kawn simex tix, kiex ah nin, “Simiang aux eue, tawx kawn pa im an ka kiex, paw doh pah kawn simex an liak!” Viang mawh nan, bun tang kaux an pawk ah nin, “Paw kieh mawh cie aux mai paw kieh mawh cie maix, kieh gwieh heue.”
27 Simiang deeh pawk lox nawh ah nin, “Tawx kawn pa im an ka bun sivoe, paw doh pah kawn simex an, nawh mawh miex kawn ngie an tete heue.”
28 Pui Isarelax khankix mhong grawng pa prawng ca simiang, kix kied koe krax lhat graung kah, mawh kheu yaox kix koe pingnya cuyi Siyiex ka daux nawh, sonsang pon kwang nawh haktiex daux pa rahsee heue.