2
Lox Ghoik Davit Ti Krai Ka Sawlamon
1 Yam hoek bawg yam dex sang yum Davit mai nawh ghoik ti tawm lox ka kawn simex tix Sawlamon ah nin,
2 “Aux tak hu ka daux krax pa hu kawn pui haktiex khankix, mawh kheu nan, teei riang rao tix mai kieh maix awm simex heue.
3 Mai priex ti hawt lox tawm jhawm krai Simiang Siyiex maix mai lawng hu daux krax Nawh Cao mai priex ti hawt lox lai beenli pa deuh Nawh Cao mai gumlox pingnyap Nawh Cao mai lox tat jhawm prawng Nawh Cao mai mhai ruk Nawh Cao, awm pa tiiem ti deuh ka daux gumlox been Mose, sonsang haok hwan ting lhaong maix ka daux ceu pa yuh tix khawmuik mai ka can dee hu maix,
4 sonsang kieh Simiang Siyiex gumlox Nawh Cao grum naog awm pa hoik krai Nawh Cao ka grawng pa dex mai aux yuh nin, phan kawn praix maix chix yuh satix tix mai lawng ti hu plak sivoe Aux daux krax pa mawh pa meh khawm rhawm rhi mai khawm ju tix khawmuik, ru maix tak ang jud khaing dangngeung pui Isarelax khankix heue.
5 Lheu khaing an maix hoik tawng ceu pa hoik yuh Yuabax, kawn simex Zeruya ka aux mai pa hoik yuh nawh ka cao kaing naing ting pui Isarelax pa kaux AbanaRef 2:5 2Sa 3:27. kawn simex Nerax mai AmasaRef 2:5 2Sa 20:10. kawn simex Yeta pa hoik pah nawh ka kiex mai hoik kieh nham kiex jauh ka daux bawg yam pa yiien yawg mai nawh hoik kraix nham kiex ka piang maox rawd nyoi tix mai ka piang kiep pa ceep nawh ka caong tix heue.
6 Mawh kheu nan yuh awm pa koe pingnya cuyi maix mai paw kieh hauk kaing paing nawh, laig ka daux meung yum ka daux pa yiien yawg heue.
7 Viang mawh nan, jhi krax caux rhawm maix ka kawn simex Bazilie pui GilatRef 2:7 2Sa 17:27-29. mai kieh kix ot sinax pui pa ih priex preem ka pheen sawm maix, mawh kheu hoek kix ti yuh bwanson ka aux, yam lih to aux ti luan khaing puxke maix Apsalom heue.
8 Shimix kawn simex Gerax pui Benyamin khaing yaong Bahurim ot tau mai maix, nawh hoik jhax lawg mai sibriem ka aux, yam hu aux ka veng Mahanem, Ref 2:8 2Sa 16:5-13. nawh hoek ti rieb aux ka rawm klawng Yawdan mai aux hoik tiextu ka nawh, plak sivoe Simiang Siyiex ah nin, aux tak ang kieh maix yum ka vaig heue.Ref 2:8 2Sa 19:16-23.
9 Paw keud nawh awm pa ang koe phimap, mawh kheu mawh maix pui koe pingnya cuyi maix tawng ceu pa sang khaw maix ti yuh ka nawh, mawh kheu nan pah ka pui pa paing hauk kaing an laig daux meung yum tau mai nham nawh heue.”
Grawng Yum Davit
(1Been 29:26-30)
10 Simiang Davit laig it tau mai keeing tix mai sipaung nawh ka daux veng Davit heue.
11 Nawh hoik kwang ka piang pui Isarelax tixpon num, nawh kwang ka daux veng Hebron aliah num mai kwang ka daux veng Yerusaliem tixngoe loe num heue.Ref 2:11 2Sa 5:4-5; 1Been 3:4.
12 Simiang Sawlamon ngawm ka piang dangngeung keeing tix simiang DavitRef 2:12 1Been 29:23. mai haktiex pa kwang nawh khankix mawh pa haok hwan kaux cong heue.
Pah Sawlamon Ka Adawniyax
13 Adawniyax kawn simex Hagit hoek ka Batashebax pa mawh miex simiang Sawlamon mai Batashebax ah nin ka nawh, “Mawh hoek maix ka daux krax pa nhim lie?” Mai nawh deeh ah nin, “Aux hoek daux krax pa nhim heue.”
14 Nawh deeh ah nin, “Aux koe lox pa sang chawk ka maix tix ceu, ”Mai Batashebax deeh ah nin, “Chawk heue.”
15 Khaix an nawh ah nin, “Maix hoik tawng ka caw aux ti mawh simiang mai pui Isarelax khankix kawx hoik koe krax keud pot jun pot ka aux, sonsang mawh aux pa kwang ka piang kix heue.” Viang mawh nan haktiex in hoik veeh ti khaing aux mai hoik deeh lih ti mawh cie pux aux, mawh kheu an hoik mawh alo Simiang Siyiex heue.
16 Yam in “Aux simie ti rawg tix ceuceu ka maix, paw doh thiang liak!” mai Batashebax ah nin ka nawh, “Krai heue.”
17 Mai nawh krai ah nin, “Yuh bwan son krai ka simiang Sawlamon, mawh kheu nawh ang pon thiang ka lox maix, kieh nawh tawx aux moeng Abisha kawn bun veng Shunam heue.”
18 Mai Batashebax ah nin, “Mhawm, aux tak sang krai son maix ka simiang heue.”
19 Mawh kheu nan, Batashebax hu ka simiang Sawlamon, sonsang krai grawng Adawniyax mai simiang kaoh ti rieb ka Batashebax mai num kaing tix tawx krax nab yam ka nawh mai tawx dee ngawm dangngeung tix mu son miex tix mai Batashebax ngawm ka plak taix khawn dawm simiang heue.
20 Khaix an nawh ah nin, “Aux sang rawg totaix pa iak tix ceu ka maix, paw thiang ka liak!” Mai simiang ah nin ka nawh, miex aux eue, “Rawg heue, aux ang thiang ka lox maix heue.”
21 Mai nawh ah nin, “Tawx Abisha kawn bun veng Shunam, mawh moeng puxke maix Adawniyax heue.”
22 Mai simiang Sawlamon pawk lox miex tix ah nin, “Jao patix maix lai mhaing Adawniyax moeng Abisha kawn bun veng Shunam, deeh baox mhaing meung haktiex in ka son nawh ha, nawh mawh puxke aux, rawg ka son nawh mai son cao giex kaing li Abiata mai son Yuabax kawn simex Zeruya heue.”
23 Khaix an simiang Sawlamon tiextu ka daux ceu kaux Simiang Siyiex ah nin, “Phan lox pa ah Adawniyax ang mawh pa keung nawh ti yum ka, kieh Siyiex yuh ceu pa nie lang teung ka piang aux heue.
24 Awm im ju Simiang Siyiex mai hoik yaog aux ngawm ka piang dangngeung keeing aux simiang Davit mai hoik tawx aux ot ka daux nyiex haw, awm lox mukheu pa hoik yuh Nawh Cao, Adawniyax tak mawh pa yum daux in singaix heue.”
25 Mawh kheu nan simiang Sawlamon ploi Beneyax kawn simex Yehawyadax hu mai kieh pah Adawniyax yum heue.
Grawng Grheu Abiata Hu Mai Pah Ka Yuabax
26 Mai son cao giex kaing li Abiata simiang ah nin, “Hu ka veng Anadok ka haktiex cao maix, mawh kheu maix keung ti mawh pa yum, viang mawh nan, aux ang nyang pah maix yum yam in, jao hoik klawm maix teug bwan sijax mukheu Simiang Siyiex ka plak sivoe keeing aux simiang DavitRef 2:26 2Sa 15:24. mai maix hoik kham krax kha rhawm ku bawg tau mai keeing aux heue.”Ref 2:26 1Sa 22:20-23.
27 Sawlamon pluat ara Abiata khaing cao giex kaing li Simiang Siyiex mai sonsang pon kieh nawh gumlox Simiang Siyiex grum naog, ka pa hoik krai Nawh Cao grawng pa dex mai doeh nyiex ma Elix ka daux veng Shilaw heue.Ref 2:27 1Sa 2:27-36.
28 Yam hoik mhong Yuabax grawng ceu an, nawh ot ka plak Adawniyax, viang mawh nan, nawh ang ot plak Apsalom mawh kheu nan, Yuabax to laig daux nyiex gox bwan man Simiang Siyiex mai giex ka rung khu dee tan heue.
29 Mai kix krai grawng an ka simiang Sawlamon ah nin, “Yuabax hoik to laig daux nyiex gox bwan man Simiang Siyiex, nawh ot hawt khu dee tan, khaix an simiang Sawlamon ploi Beneyax kawn simex Yehawyadax hu pah nawh yum heue.”
30 Beneyax hu ka nyiex gox bwan man Simiang Siyiex ah nin ka nawh, “Simiang nhie maix lih plak praix, ” Mai Yuabax ah nin, “Ang aux lih, aux sang yum tin, ” Mai Beneyax ing krai ka simiang ah nin, “Yuabax krai mai deeh pawk ah nin ka aux heue.”
31 Mai simiang deeh ah nin ka nawh, “Yuh awm pa ah nawh, pah nawh yum mai sipaung nawh sonsang luan nham pa ang koe phimap pa hoik kieh Yuabax jauh singai khaing aux mai khaing paox nyiex keeing aux khankix heue.
32 Mawh kheu nan, Simiang Siyiex kieh nham phimap pa yuh nawh hoek ka piang kaing cao nawh, mawh kheu hoik pah nawh pui ra kaux pa nie rahsee nie mhawm khaing nawh yum ka vaig, pa mawh Abana kawn simex Nerax cao kaing naing ting pui Isarelax mai Amasa kawn simex Yeta, cao kaing naing ting pui Yudax, daux pa ang keeing aux simiang Davit tawng ka heue.
33 Mawh kheu an nham phimap kix tak hoek ka piang kaing Yuabax mai ka piang kaing doeh ru nawh leeing ju, viang mawh nan, ka piang simiang Davit mai doeh ru nyiex ma nawh mai ka piang dangngeung nawh, krax pa nhim khaing Simiang Siyiex tak koe leeing ju heue.”
34 Mawh kheu nan, Beneyax kawn simex Yehawyadax haok daux nyiex gox bwan man mai pah nawh yum mai sipaung nawh ka daux nyiex cao nawh pa koe daux tiag heue.
35 Simiang deeh yaog Abeneyax kawn simex Yehawyadax mawh cao kaing naing ting ka piang ka dee ot Yuabax mai yaog Zadok mawh cao giex kaing li ka dee ot Abiata heue.
Grawng Pah Shimix Yum
36 Khaix an simiang deeh ploi pui kok Shimix hoek ah nin ka nawh, “Sum maix ot nyiex daux veng Yerusaliem tix lhang mai paw lih hu khaing tan heue.
37 Deuh maix tawng lox in mhawm mhawm, singaix lih hu maix khaing tan mai tiang ka rawm klawng Kidron maix tak yum tete, nham phimap maix tak hoek ka piang kaing maix heue.”
38 Shimix deeh ah nin ka simiang, “Ceu pa krai maix mawh pa mhawm, kawncau maix tak yuh awm pa krai maix simiang, ” Mawh kheu nan, Shimix ot ka daux veng Yerusaliem tom rheung heue.
39 Khaix hoik luan loe num siliex Shimix ra kaux to hu ka Akhi kawn simex Makha simiang veng Gata mai krai grawng an ka Shimix ah nin, “Siliex maix ot daux veng Gata heue.”
40 Shimix kaoh mai sau an brug tix ka piang la mai hu ka Akhi daux veng Gata, sonsang hu sawg ka siliex tix khankiex, Shimix hu mai deeh viex kiex hoek heue.
41 Mai kix krai grawng lih Shimix khaing veng Yerusaliem mai hu ka veng Gata mai grawng deeh hoek nawh khaing tan ka simiang heue.
42 Khaix an, simiang ploi pui kok Shimix ah nin ka nawh, “Aux hoik kieh maix tiextu ka daux ceu kaux Simiang Siyiex mai hoik tawx satix ka maix, deuh ti tawng mhawm mhawm singaix yam lih maix plak praix mai yam hu dee mawx ang ah maix tak yum tete ang mawh lie? Yam an maix deeh ah nin ka aux, lox krai maix ka aux mawh pa mhawm heue.
43 Yuh ka mawh maix lai ang priex ti hawt lox sijax pa yuh tix ka Simiang Siyiex mai ka lox pingnyap pa tawx aux ka maix, ”
44 Simiang baox ah nin ka Shimix, “Maix hoik tang tawng daux rhawm tix, ka pa caox caig pa hoik yuh maix khankix ka keeing aux Davit, mawh kheu nan, Simiang Siyiex tak kieh pa caox caig pa yuh maix khankix hoek ka piang kaing maix heue.”
45 Viang mawh nan, simiang Sawlamon mawh pa pon bwanson mai dangngeung Davit tak mawh pa kaux cong plak sivoe Simiang Siyiex leeing ju heue.
46 Mawh kheu nan, simiang tawx lox ka Beneyax kawn simex Yehawyadax, nawh hu mai pah Shimix yum, awm nan, meung haktiex mawh pa kaux cong daux tawm taix simiang Sawlamon heue.